1984-ку шинал Гъумучиял школа къуртал бувсса оьрчIал хьунабакьаву хьунни

Ларгсса нюжмардий, июльданул 26-нний, МахIачкъалалив «Барракуда» ресторандалуву хьунни Гъумучиял дянивмур даражалул школа 1984-ку шинал къуртал бувсса оьрчIал хьунабакьаву.

Му хас дурну дия школа къуртал бувну 35 шин хъанахъисса таварихран. Ва хьунабакьавугу хьунни му выпускравухсса Дагъусттаннал паччахIлугърал медициналул университетрал ректор Сулайман Маммаев сиптачину.

---

Бадрижамал Аьлиева
Хьунабакьаврил мажлис тIитIлатIисса ихтилатгу бувна Сулайман Нураттиновичлул. Цащала архIал ванияр 35 шинал хьхьичI ца парталух щябивкIун бивкIсса, цIанасса чIумал личIи-личIисса кIанттурдайх ппив хьусса, личIи-личIисса давурттай, къуллу­гъирттай зузисса чIун­архIал оьрчIахь хьунабакьавугу барча дурну, ванал тавакъю бунни, жагьилсса оьрмурдай ливтIусса цаппарасса цала одноклассниктал ва гьашину аьпалул хьусса цала учительница, 1984-ку шиналсса выпускрал шанма класс­равасса цаннил каялувчи Багъдуева Алла Ивановна дакIнийн бичин.

Гъумучиял дянивмур даражалул школалуцIун оьр­мулул чIи­ви-хъунсса бутIа къабавхIусса арсру, душру нажагьсса жямат­рал бакъа бакъахьунссар. Ва хьу­набакьаврийгу му кIану тасттикь хъанай бия: Читтур, ШавкIул, Ури-Мукьар, Бурши, ЧIурттащи, Ххюлуссун, Аьхъар, Хьур, ХьурукIул… Бия вайннавух, чIявусса цайми кунма, шагьрулул инсантуравух бяв­ххун къалавгун, зунттавува зий-заназиссагу, миннахь барчаллагь увкунни Сулайман Маммаевлул, Лакку улча ябуллай, мунива рухI дуккан къаритлай ялапар хъанахъаврихлу.

Ва кьинисса культуралул прог­раммалулсса буван цайнма лавсун бия Расул МахIаммадовлул (цIа дурксса лакрал артист Садикь МахIаммадовлул арс) ва Луиза Шагьдиловал. Миннал щаллу буллалисса номердал лях-карах, кувннащал кувннал ихтилатру буллай, хаварду буслай бия ванияр чIярусса шиннардил хьхьичI Гъумучиял школалул дус бувсса жагьилтал.
Вайннавасса цаппараннащал ихтилат бувансса му­ттардугу биривуна ттухьхьун.
Ванияр 35 шинал хьхьичI Гъумучиял школа къуртал бувсса шанма классравасса цанний каялувшиву дуллай ивкIсса Раджабов Раджаб

Жабраиллул арс:
— Райондалул УО-рал каялувчисса Будайчи Будайчиевлул на Кьубиял школалия учIан увнав Гъумучиял школалийн. Директорну ия, аьпа биву, Бад­руттин Ханов. Карашатусса Ибрагьим ХIажиевичлуща кьамул був­ссия 30-нния ливчусса оьрчIру бусса класс. Мукун, на 8-мур классрая тинмай ттуйнма лавсун, шанна шинайсса каялувшиву дурссар 1984 шинал Гъумучиял школа къуртал бувсса 10 «б» классрай. Школа къуртал буллалисса чIумал ттул класс­раву ия 5 медалист: ХIайдаров МахIаммад, ХIайдаров Ибрагьим (цIана Американаву ­уссар), Маммаев Сулайман, Абачараев Руслан, Багъдуева Алена (аьпа биву). Амма га чIумал райондалий бивкIсса дянивмур даражалул 8 школалун ккаккан дурсса квоталийн бувну, Лакрал райондалий икIан аьркинну ия увагу 9 медалист. На хIарачат бувссия, шаймур буллай, хъирив уклай, амма медаль так ХIайдаров Ибрагьимлун дакъа къадуллуна. Нагу, туну, жагьилсса учитель ияв, коммунизмалул чIун дия, цилла низамру, кьараллу дусса, цичIав бан къавхьуна. ЦIанарив къабитантIиссия багьайминнан цинявннаннагу медаллу тIалав къадурну. Гания шиннай ларгунни чIярусса шинну, амма, чIярусса шиннардил хьхьичI кунма, ца хъунма­сса нахIусса кулпат кунма, жу цачIу буссару, ххаришивуртту ва кьурчIишивуртту кIидачIлай, кувннащал кув хьунабакьлай, бухлай-буклай. На хъинну ххарину ва пахрулий ура Дагъус­ттаннайх ва щала дунияллийх кIама бивщусса ттула учениктурая. Аьркин бакъасса ххул­лийн увксса, тIулдакъашиву дурсса цаягу оьрчI къавхьунни, ялунмагу хъуни-хъунисса хьхьичIуннайшивурттайн лавхъунни. Ттунмарив чIа тIий ура вайннал школа къуртал бувну 50 шин шаврин хас дурсса батIаврий 80 шинавусса навагу гьуртту шаву.

Маммаев Сулайман Нураттиннул арс, Дагъусттаннал паччахIлугърал медициналул университетрал ректор:
— Жун мудангу пахру бикIай республикалул дуккаврил идарарттаву ца яла хьхьичIунмунин, язимунин ккаллину бивкIсса, жува къуртал бувсса Гъумучиял школалия, микку дарс дихьлай бивкIсса учительтурая, жун ми тачIав дакIниягу къабуккай. Школалул цIа хьхьичIра-хьхьичI дувайсса язисса учительтуралли, мукун жухь дарсру дихьлайгу бия язиминнавугу язими. Жул выпускраву ия сайки 10 отличник. ХIайдаров Ибрагьим увхссар Москавуллал физикалул ва техникалул институтравун, билаятрай га чIумал ца яла захIматмур ва сийлимунин ккаллийсса, 1991-92-ку шиннардий дурурччуссар элмурдал кандидатнал цIа ва лавгссар Американавун, цIанагу тийх мува биогенетикалул аралуву зий уссар. Ва хьунабакьаврийн учIанмур буванна увку­ссия Ибрагьимлул, амма цIанасса чIумал бигьа бакъар Американава шихунай учIангу. Руслан Абачараев увхссар Москавуллал авто­ххуллурдал институтравун. Аьралу­ннаву къуллугъ бувну махъ перевод ларсъссар Бауманнул цIанийсса Москавуллал техникалул университетравун – билаятрайсса техникалул вузирдаву ца яла сий думунин ккаллий­сса. Цалва хIарачатрайну, цалла кIулшивурттайну ххуллу битлай най, хIакьинусса кьини Руслан хъанахъиссар Центробанк­рал каялувчинал хъиривчуну. Вай бакъасса, чIявусса цаймигу оьрчIру буссар жул классрал ва Гъумучиял школалул пахруну хъанахъисса, личIи-личIисса арардаву зузисса.

Кантулаева (Сулайманова) Шарипат Анвардул душ, Гъумучиял дянивмур даражалул школалул тарихрал учитель:
— Школа къуртал бувну махъ, ДГУ-лул тарихрал факультетгу бувккуну, зана хьура зун ттула аьзизсса школалийн учительну. Школалий жул хъинну бавкьу­сса нахIусса класс бикIайссия. Барчаллагь Сулайманнун ва хьунабакьаврихлу. Уттинин був­сса ихтилатирттаву кIицI лавгсса куццуй, мяйжаннугу жул класс­рал каялувчитал гьарца шинал баххана шайва, му жуй­сса тахсирданун хIисав буллайгу бикIайва, хIатта жул оькки­сса класс къабивкIнугу. Раджаб Жаб­раилович жул классрал каялувчину увкIун махъ, жувусса гьунарду биялну итххявххуна, ду­ккавриву, спортраву, жяматийсса оьрмулуву, военкоматрал дуллалисса давурттаву жул класс­рал хьхьичIунсса кIанттурду бугьайссия.
Школа къуртал бувну 5 шин шаврин хас дурсса батIаву дурну махъ жагьилсса оьрмулий аьпа­лухьхьун лавгуна жул язи­сса одноклассница Багъдуева Алена, муния махъ дакIру гъаргъун, цачIун къабатIлай мадарасса хIал хьуссия. Бур учинсса, гьарцагу чулуха итххявхсса душ бикIайссия.

Тумалаева Фируза Хизрил душ, Роспотребнадзорданул Дагъусттаннайсса Управлениялул административ ва хозяйствалул отделданул начальник:
— Жул класс чIявуну хьунабакьайхьурчагу, хIакьину хъуннасса ххаришиву дур биял­сса хIаллай къаккавкми одноклассникталгу, жула учительгу ккавккун. Сайки цинявнная ттаттахъул-бавахъул хьуну буру, хъуни хъанай, хъунив хъанай бунугу, симаннуми гара школалий куннасса, аьзизсса дур.

КьурбанмахIаммадова (Хъун­буттаева) ПатIимат Хъунбуттал душ, МахIачкъалаллал 2-мур роддомрал хъунмур акушерка:
— На Ури-Мукьардал шяравассара. Жул классраву лакрал чIяруми щархъавасса оьрчIру бикIайва. ХIакьину ва хьунабакьаврийн бучIан бюхъаврия хъинну рязира. Барчаллагь хъунмасса жул пахруну хъанахъисса Маммаев Сулайманнуйн ва хьунабакьаву сакин даврихлу. Ттинияр тинмайгу ванияр ххуйнугу, хъиннугу, ххалли-ххаллилсса иширттай батIлай ккакканнав.

МахIачев Рамазан Мяммал арс, ишбажаранчи (цIа дурксса ию Ислам МахIачевлул ппу):
— На, Буршиял школалий 3 классгу къуртал бувну, дуклан лавгссара ЦIуссалакрал райондалийн, ЦIуссаккуллал шяраву 6-мур классравун ияннин дук­лайгу ивкIун, муния махъми классру бувккуссар Ххюлусмав. Гъумучиял школалийн дуклан увкIссияв лавайми классирттаву. Школа къуртал бувния махъ. «а», «б», «в» къаувкуну, шанмагу класс, ца класс кунма, ца хъунмасса кулпат кунма хьунабакьару.

Вана укунсса хьуна 1984-ку шинал Гъумучиял дянивмур даражалул школа къуртал бувсса оьрчIал хьунабакьаву. Шикку ва кьини хьусса ихтилатирттаву увкусса куццуй, арцурду, къуллугъру, власть лагай­ссар, личIайссар так дусшиву, кувннал кувннан бувсса хъинбалартту.
Утти, августрал 23-нний, ва выпускравух ивкIсса Ххюлу­ссуннал шяравасса, Сочи шагьрулий мина дирхьусса Аьлишаев Юрислан ХIасаннул арснал сипталийн ва сакиншиндарайн бувну, вай наниссар Лакрал райондалийсса Буршиял шяравусса бигьалагай базалийн.