Эдуард ХIажиев, ЩайхахIма АхIмадов
дучри ххяххан баврил бяст-ччаллий ххув хьуминнащал
Лавгсса бигьалагай гьантрай Хъусрахь хьунни Дагъусттаннал лайкь хьусса юрист, Жавраиллул арс АьвдурахIманов АьвдурахIманнул аьпалун хас дурсса
волейболданул турнир ва дучри ххяххан баврил бяст-ччал. Ва даврил сиптачи хьунни ДР-лул Шяраваллил хозяйствалул министерствалул отделданул каялувчи Эмил Ттаттаев. Цувагу хъанахъиссар АьвдурахIманнул ссил арс.
Зулайхат Тахакьаева
Лавайсса даражалул юрист ушивруцIун,, АьвдурахIман чIявучин бусравсса ия, буттал кIану ххишала бакъа ххирасса ва му хьхьичIунмай бансса ххуллурдах луглагисса, дусшиву дангу, дуруччингу кIулсса, жямат цачIунмай бан бюхъайсса ия. Вай цинярда хасиятру ирсирай дирну дур Эмиллунгу.
АьвдурахIман АьвдурахIманов увссар Хъусращиял шяраву 1955 шинал. ХьхьичIунну Дагъусттаннал паччахIлугърал университетгу къуртал бувну, зий ивкIссар Дагъусттаннал ХIукуматрал Шяраваллил хозяйствалул иширтталсса буллалисса комитетрай юристну, Дагъусттаннал ХIукуматрал хъурунная дучIаймунилсса байсса комитетрал отделданул хъунаману, шяраваллил хозяйствалул министерствалул ишру бачин бувуну. Оьрмулул махъсса шиннардий зий ивкIссар «Дагюрсервис» тIисса цува заллусса адвокатътурал ккуран сакин дурну. АьвдурахIманнул цIа кIулминнан ва дакIний ливчIун ур закондалул ххуллу-хха куртIну кIулсса, Ухссавнил Ккавкказнаву цавагу процесс бух хьун къаавцIусса адвокат хIисаврай.
ДакIнийн бутанну, ацIниясса шиннардил хьхьичI ванал дартIссия МахIачкъалалив ялапар хъанахъисса хъусращиял жагьилтурал футболданул команда. ХьхьичIва-хьхьичI миккун кIункIу бувна цала ссурахъал, хъинирвал, миннал оьрчIру. ХIаллицIух вайннацIун цачIун хьунни цайми жагьилталгу. ХIала бухлай бур миннал оьрчIругу. Гьарца бигьалагай гьантрай ттуплий буккан батIлай, цачIун бунни шагьрурдай ялапар хъанахъисса жагьилтал. ХIакьину Хъусращиял футболданул команда «Лакку улклул кубокрай» гьурттусса командарттаву хьхьичIунсса ххуттай дур.
Интту Эмиллул сипталийну, шагьрурдаясса жагьилталгу гьурттуну, шяраву бувгьуссар мурхьру. Ттинин дурцири акцияртталгу, ниттиуссин цIа кусса турнирданулгу агьамсса мурадну Эмил ккаклай ур шяравусса ва шагьрурдайсса жагьилтал цачIунмай баву, миннал оьрчIру кувннащал кув кIул баву.
Турнир дайдишин хьхьичI АьвдурахIман дакIнийн утлатисса ихтилатру бувуна шяраваллил администрациялул бакIчи Эдуард ХIажиевлул, школалул директорнал хъиривчу Аьбдул Гъазиевлул, Ккуллал райондалул бакIчинал хъиривчу Ажув Халидовлул, АьвдурахIманнул ниттиуссу, Дагъусттаннал халкьуннал учитель ХIасан АхIмадовлул ва хьхьичIунсса дус-ихтивар Жабир Абакаровлул.
Турнирданий гьуртту хьунни шагьрурдая бувкIсса ва шяравусса жагьилтурая сакин хьусса 5 команда. ХьхьичIунсса кIанттурду бувгьусса 4 командалун буллунни кубокру, дипломру ва арцуйнусса бахшишру. Бахшишру дуллалисса шадлугърай гьуртту хьунни АьвдурахIманнул уссурвал – Артур, Муса ва Халикь.
Дучри ххяххан баврил бяст-ччаллий гьуртту хьунни Хъусращиял ва Ккуллал шяравасса дучри. Ххув хьунни ЩайххIасанов ХIажи, кIилчинмур кIану бувгьунни ванала уссил ЩайххIасанов Халидлул, шамилчинмур кIанугу бувгьунни Исупаев АхIмадлул. Вайннан бахшишру дуллалисса шадлугърай гьуртту хьунни Ккуллал райондалул бакIчи Шамил Рамазановгу.
