Августрал 17-нний Дагъусттаннал БакIчи Владимир Васильев хьунаавкьунни хьхьичIунсса федерал СМИ-лул журналистътуращал. Цаппара кьинирдал мутталий ми кIул хъанай бия жула республикалул культуралущал, магьирлугъращал, тарихрал ва тIабиаьтрал ккаккан лайкьсса кIанттурдащал. Мичча зана хьуну махъ журналистътурал цайнма бивсса асардая бувсунни республикалул БакIчинахь.
Родопуллал бульварданийх сайр бувну мукьах балжисса ихтилатру хьунни чяйлул пинжаннахун.
Хьунабакьаврий гьуртту хьунни «НТВ» телекомпаниялул дирекциялул каялувчинал советник Владимир Чернышев, «Российская газета» кказитрал хъунама редакторнал хъиривчу Михаил Чкаников, ТАСС-рал дунияллул халкьуннал информациялул редакциялул жаваблувсса итабакьайма Павел Мальцев, «Новости» РИА-лул, «Комсомольская правда» ва «Аргументы и Факты» кказитирттал, НТВ телеканалданул, ВГТРК телеканалданул ва 5-мур каналданул вакилтал.
Хъамаллурахь аьла-ссаламгу бувну, Владимир Васильевлул ми кIул бунни республикалийсса иш-тагьарданущал, мукунма бувсунни захIматшивурттаятугу. Мунал бувсунни «Шяраваллил (земский) учитель» ва «Шяраваллил духтур» тIисса проектирдая. Дагъусттаннал БакIчинал журналистътурахь бувсунни мукунма хIакьину хъуннасса къулагъас дуллай бушиву инвалидтал яхьунсса къатрал щаллу баврих, инсантал марцIсса щинал дузал баврих. Яла Владимир Васильевлул жавабру дуллунни хьунабакьаврий гьуртту хьуминнал суаллахьхьун.
«Комсомольская правда» кказитрал спецпроектирдал отделданул редакторнал хъиривчу Елена Богдановал суал бия давриву яла захIматмур кIанттуясса. Мунихьхьун жаваб дуллай, республикалул каялувчинал увкунни: «Яла захIматмур – ялун бучIанмуния гъалгъа тIий бунува, цIанамур лайкьну дузал бан къахъанахъавур.
Мудан бур, ци дулларчагу, ххишаласса дуван бюхълай бакъашиврул, чIявуссаннан кумаг буван къахъанахъишиврул асар. ЧIярусса давуртту дуллайгу буру. Мисалдаран, жуща учин бюхъанссар, ххуй-хъин хьунни мюхтажсса инсантал дарурттал щаллу баврил иш-тагьар», — куну. Журналистътурал суал буллунни 1999 шинал боевиктуращал талай бивкIсса ополчентурал дяъвилул гьурттучитурал статус дулаврил хIакъиравугу. Дагъусттаннал БакIчинал бувсунни му масъалалух къулагъас хъуннасса душиву. Ополчентурал сияхIру дуллай, ми тIайла дацIан дуллай бушиву.
НТВ каналданул корреспондент Фатима Дадаевал буллусса, Дагъусттаннал инсантурал чулухасса кабакьу асар хъанай бурив тIисса, суалданухьхьун жавабран Васильевлул увкунни: «Ттун хъинну асар хъанай бур инсантурал чулухасса вихшала. Му дакъа зун къашайссар…»
Журналистътурал буллунни цаймигу суаллу. Миннухьхьун балжисса жавабру дуллуну махъ, республикалул каялувчинал бувсунни Дагъусттаннай социал-экономикалуву, дуккавриву хъанахъисса дахханашивурттая.
