Лахъан бюхъайманал бакIрачIанни
захIматсса кьини дучIайсса учай

ЧIявусса ккавксса, чIявусса бакIрачIан бувкIсса ЦIуссалакрал агьулданун цал уттигу нясив хьунни хъинну хъуннасса ва оьсса кьини лахъан. 1999 шинал сентябрь зурул 5-нний,

кIюрххицIуннай, ярагъуннил балгусса къачагътурал кьюкьри дурхссия паракьатну шанашисса ЦIуссалакрал шяраваллавун.
ЦIуссалакрал район канийн ласун бюхъарча, Дагъусттаннал чIярусса районнайн ххуллу тIитIлай бивкIун бур. Къачагътал ши­кку цанма тIайлабацIу хьуншиврийн вихну бивкIун бур. Вайннал ца яла агьаммур мураднугу «Телевышка» ласунсса бивкIун бур. Цалла аьрщарайн бувкIсса къачагътурайн данди бавцIуну, цалчинсса цIу цайнна ларсъссар таний ЦIуссалакрал РОВД-лул зузалтрал. Цалчинсса кьинира къучагъшиврий жанну дуллуссар ацIнияхъайсса миннал зузалтрал.

Руслан ХIаммадаев чантI учин увну ур биту-ххитулул чIурдал. Хъап бувну цалва ярагъгу, анаварну кьатIув ххявххун ур. Къатраву милицанал зузала усса кIулну, къапулух кьюлтI хьуну бивкIсса къачагътурал чIивисса арснал хьхьичI бивтун увтссар Руслан. Аьпалул хьуну махъ ганан дуллуссар Чувшиврул орден.
Мура чIумал милицанал хъунама лейтенант Мурад Майранов, хъунама сержант Тенгиз ХIусайнов, сержант Ма­хIаммадкамил Аминов, райотделданийнсса ххуллу бувгьу­сса къачагътуращал баранбал бувккун, талай бивкIун бур. Гуж къалаллан бивкIукун, ххюя боевикгу увтун, чIаравсса къатрал чIаркIув бувххун, мива битлан бивкIун бур. Милицалтрал сисаврил ва нигь дакъашиврул ссибизан бувсса боевиктурал миннайн цIу дирхьуну дур. Щавурду дирну бунугу, патронну духлаганнин талай бивкIун бур шамагу. Милицалт рухI дуну канийн къабучIаншиву бувчIукун, къачагътурал цIу щуну дур чIаркIницIух. РухI дуссаксса, вирттал кунма талайгу бивкIун, цIараву жанну дуллуну дур шамунналлагу. Шамуннаннагу аьпа­лул хьуну махъ дуллуссар Чувшиврул орденну.
Хар-хавар бакъа ххявххун, ца лахIзалий «Телевышка» ласун­сса пикрилий къачагътурал яла хъунмур гуж, язи-язими кьюкьри кIиккун дирчуну дур. Миннан хавар бакъахьунссия «Телевышка» дуручлачиминнал кьюкьа чIиринугу, кьянкьасса вир­ттаврая салкьи хьусса душиву.
Милицанал лейтенант Халид Мурачуев, чIивима сержант Мутай Исяев, сержант Кьурбан АхIмадов, рядовой АхIмад Кьурбанов, гужру архIалсса бакъанугу, «Телевышка» дуруччин кьянкьану бавцIуну бур. Тагьар дурчIусса Мурачуевлул, ярагъгу бавчIуну, лагмава бацIан бувну бур цащалами. Укунмагу къачIявусса ярагъ, архния битлай, нахIакьдан харж къабан, боевиктал хъинну гъан хьунцIа бавцIуну бур.ЧIявусса ливтIуссагу, бивщуссагу хьуну, жиндрал хьусса боевиктурал, ахиргу, ларсъссар «Телевышка». Ми махIатталсса вирттаврал бат увну ур, цавайннал бусласаврийн бувну, 50, цайминнал тIутIимунийн бувну, 70 боевик. Яла-яларив, зия хьуну дур ца мутталий лахъазан ласун­сса план. КIа ласаву бивкIун бур щалва операциялул мурадгу. ЧIун ларгун махъ ляркъуссар Басаев «ТелевышкалучIасса» цалва командиртурайн гъалгъа тIутIисса видеокассета. «Телевышка» къаласурча, операциялун тIайлабацIу къавхьушиврун ккаллиссар, зуща ваксса хIаллай кIа ласун хъанай бакъар», — тIий ур Басаев.
ЦIуссалакрал РОВД-лул БППСМ-рал взводрал командир, милицанал лейтенант Халид Мурачуевлун ва ЦIуссалакрал РОВД-лул БППСМ-рал взвод­рал милица, чIивима сержант Мутай Исяевлун аьпалул хьуну махъ «Аьрасатнал Виричу» тIисса цIа дуллуссар.
Мура чIумал «ТIюхчардал» блокпострай жанну дуллуссар милицанал лейтенант АхIмад Давдиевлул ва чIивима сержант Аьвдулкьасин МахIам­мадовлул.
Мура кьини, ярагъуннил балгусса террористурайн данди бавцIуну, жанну дуллу­ссар ла­ккучу, МВД-лул ОМОН-далул батальондалул командир, милицанал капитан Сиражуттин Аьлиев­лул ва ОМОН-далул 1-мур батальондалул 3-мур роталул взводрал командир, милицанал хъунама сержант Уручрату­сса Назирхан МахIаммадовлул.
Хъирив кьини, сентябрьданул 6-нний, цIансса хьхьуну террористал бувххун бур Гьамиящиял шяравун. Шяравун буххайсса кIанттурдай блокпострай му чIумал къуллугъ буллай ивкIун ур ур милицанал 4 зузала. БлокпострачIан гъан шайхту, боевиктал миннахь канийн нанияра тIун бивкIун бур. Миннан жавабран Рустам ХIамзатовлул, блиндажрава увккун, автоматрава цIу дирхьуну дур. Тамур чулуха битлан ивкIун ур чIивима сержант МахIаммад Юсупов. Махъра-махъсса патронну духлаганнин талай, къучагъшиврий жанну дуллуссар кIинналлагу. Аьпалул хьуну махъ миннангу дуллуссар Чувшиврул орденну.
ЦIуссачIурттащиял пострай мукунна жанну дуллуссар милицанал лейтенант ХIусайн Адамовлул ва прапорщик МахIаммад Рамазановлул. ЦIуссалакрал шяравун буххайсса пострай – милицанал сержант Неъматуллагь Айгуновлул ва хъунама лейтенант Икрам ХIусмановлул. ХIусайн Адамовлун, МахIаммад Рамазановлун ва Неъматуллагь Айгуновлун аьпалул хьуну махъ дуллуссар Чувшиврул орденну.
Сентябрьданул 29-нний террористуращалсса талатавриву жан дуллуссар милицанал прапорщик Оьмар Оьмаровлул, декабрьданул 15-нний щавурдал оьрмулуцIа увссар милицанал лейтенант Юсуп КъитIлаев. Аьпалул хьуну махъ миннангу дуллу­ссар Чувшиврул орденну.
Сентябрь зурул ахирданийннин най бивкIссар дяъвилул ишру. Амма, шинну ларгун махъгу, тай иширттал чIявусса баларду бувцуссар инсантурал бакIурдичIан.
2000 шинал августрал 24-нний миналий пIякь увкуссар милицанал прапорщик Аьли Ккурккиев, милицанал рядовой Ширвани Мурачуев, 2001 шинал августрал 20-нний, мина пIякь увкуну, оьрмулуцIа хьу­ссар милицанал старшина Султанбеков.
Цимирагу шин ттигу гьан­ссар. Амма жунна тачIав дакI­ния къадуккантIиссар, цала инсаншиврул ва къуллугърал бурж биттур буллай, Ватандалул цIаний жанну дуллусса вирттаврал цIарду, бакъа тIий вирттавран бивкIу.
Андриана Аьбдуллаева