Дагъусттаннал ХIукуматрал Председатель Артем Здуновлул муниципал сакиншиннардал бакIчитурайн тапшур бунни «150 школа» тIисса проектрал давуртту анавар дуккан дуван.
БатIаврий гьашину проектрал давуртту ссайн дирну дуссарив бувсунни ДР-лул экономикалул министрнал буржру чIумуйсса бартбигьлагьисса ХIажи Султановлул. Мунал тIимунийну, гьашину республикалул бюджетраву проектрал давурттан цIу бутIуй ккаккан дурну диркIун дур 300 млн къурушрал, амма заявкарду чIяруну душиву хIисавравун ларсун, ми арцу ххи дурну дур ялагу 100 млн. къурушрал. Миннух бакьин бувну бур гьашину 217 школа, хьхьичIмур шинал бакьин бувну бивкIун бур 117.
Проектраву гьуртту шаврил хIакъираву дуркIун диркIссар 251 заявка 46 муниципал сакиншиндарая. Миннува батIул бувну бур 217 школа 44 муниципалитетрая.
Районнал бакIчитурал бусаврийну, школартту бакьин буллай байбивхьуну бур.
ДР-лул ХIукуматрал Председательнал хъиривчу – ДР-лул дуккаврил ва элмулул министр Уммупазил Оьмаровал тIимунийну, муниципалитетирттай школартту бакьин баврил давуртту чялиш дурккун дур, умуд бур проектру сентябрьданийннин къуртал даншиврийн.
Артем Здуновлул барчаллагь увкунни парламентрал депутатътурахь ХIукуматрал къуллугъчитуращал архIал проект бартбигьаврил давурттал ялув бацIаву даврихлу.
Дагъусттаннал парламентрал вице-спикер Елена Ельниковал тIимунийну, цIанасса ппурттуву депутатътурал ххал буллай бур районнай школартту бакьин баврил давуртту цукун дуллай буссарив.
БатIаврий ихтилат бунни мукунма Дагъусттаннал ХIукуматрал Председательнал 1-ма хъиривчу ХIажимахIаммад ХIусайновлул.
Ххал бигьаврил хIасиллу дуллалисса махъ лавхъунни Артем Здуновлул.
