Кьурбанов ХIусайн (Аьишат на вайнначIан бивсса кьини шагьрулийнмай лавгун бия)
ДукIу ссуттихунмай бихху бувну, кьакьан лавхъсса бахIахъирттал дянив бавцIусса, 1-мур ЦIувкIратусса Кьурбанхъал ХIусайннул ва ванал кулпат Ажубхъал Аьишатлул сурат социал сетирдайгу, «Илчи» кказитрайгу дулайхту, чIявусса инсантал бия ттучIан оьвтIий, ХIусайннул номер булакьай, вайнначIату кьаркь дикI машан ласун ччай буруча тIий. ХIусайнма ия гьарманан бувчIин буллан багьай дикI гассят хъямала дувайшиву ва ссуттихунмай бакъасса бихху къабувайшиву тIий.
ПатIимат Рамазанова
Шяраваллил жямат буслай байкъалитIавай бикIайва шяраваллил зума-къирагърайсса, Гъели ХхяллацIсса ферма дакьингу дурну, тикку, шагьрулий кунмасса хIаммамрая тIайла хьуну, циняр къулайсса шартIругу дузал дурну, ХIусайннул ва Аьишатлул ххаллилсса хозяйство дурну душиврия. Наварив, ябитан, ххал дуван гьанна тIий бунува, уттинин къалавгссияв. Утти лавгра агьали вакссара укун цIарду дуллай бурхха, дурагу ци давурттив дурну дурив тай инсантурал ххал дуваннача тIий. ХьхьичIра тикку колхозрал ферма дикIайссия, гьай-гьай, ХIусайннул захIмат къабувссания фермалиягу уттинин эяллу хьуну дикIантIиссия. Магъивгу цIакь дурну, чIирттугу бакьин бувну, цIу дуккан дуван багьаймургу цIу дуккан дурну, буниялттунгу чIярусса давурттив дурну дур.
Шагьрурдай куннасса къатри дур, цимурцаннул дузалсса. Ва яла-яларив, ххяллайсса хъачIний къурату аьрщи ххилай бювхъусса багъ бувну бур. Вайннал багъраву, къур, нувщи, чIикIунтIа, калан, накьлил уртту дакъагу, салатрал чIапIайн дияннин тамансса ахънилссагу, ххяххиягу дур. Ттуршунниха ливчусса гъаттара ябуллай бур, хIухчушивугу цува ХIусайн дуллай ур. «На тачIав гъаттара я шяравух, я дуцансса лухччайх къаитабакьара, ттун низам ччан дикIай давриву. Хъювугу, ичIурагу, ппалавгу. Ттущал хъар дургьуну кулпатгу зий бур, гьай-гьай. Гъаттаралссагу, ичIаллилссагу буллай. Ябуллай буру аьнакIив, урдакругу. Маэшатгу щукру бувансса бур.
Арцу-муси тIун бикIай, муси – зузи дурсса карур, ккурчIав щяикIарча хавардайн сси багьайссар», — тIий ур ХIусайн. ХIукуматрал фермертуран цукунчIавсса кумаг бурив, уккарав кумаграл хъирив тIисса суалданухун жаваб дуллай, ва ур чIявусса документру батIин багьлагьисса, аварасса даву дур, миннал хъирив лечлайнияр, ца-кIива оьл ххишалану ябувавриву къулайшинна дур тIий. Гьай-гьай, захIмат буллан ччинан ххуйну бур Лаккуй, химикатру дакъасса ахънилсса вилва багъраву ххяххан дулларча, авадансса уртту-щинай ябувсса ятту-гъаттараха багьайкун захIмат булларча, виннассагу, дахханссагу дикIгу дур, цирдагу нахIура-нахIусса тIий ур.
ХIусайн ва Аьишат бур так цалва кулпатрайнгу, цалла каруннайнгу, цалва бувсса захIматрайнгу хьул бивхьусса захIматчитал. Вайннал ахIвал, маэшатгу ххуйсса бур, цивппагу агьалинаву сийгу дуну, бусравну бур. Шагьрурдайсса цIувкIуллал ссуттихунмай биххугу вайннал ужагърай бувай, аьркинмургу вайннаща ласай. Хъамал хъин битаван дяшяраву, ккурчIавсса къатригу ххуйну дакьин дурну дур ХIусайннул ва Аьишатлул. Буниялттунгу, вайннал цала тIийкун, муси – зузи дурсса карур.
