Августрал 2-нний ДР-лул БакIчинал ва ХIукуматрал Администрациялул Каялувчи Владимир Ивановлул муниципал сакиншиннардал
бакIчитуращалсса видео-конференцсвязрал журалийсса батIаврий дащуй дирхьунни муниципалитетирттал дуллалисса газрал сетирдал инвентаризациялул давуртту.
12Владимир Ивановлул тIимунийну, районнал бакIчитурая бувкIун бур минначIа заллу акъасса газрал сетру душиврул хIакъиравусса 35 чагъар. Миннувасса 20 иширан хасну дайдирхьуну дур давуртту дуллай, мигу хъанай дур аьмну дуван аьркинминнул анжагъ 31%. Давуртту къадуллалаврил сававртту чIярусса дур тIий бур. «ЧIал къавхьуну дайдихьлай дур къатравун гъилишиву нани даврил чIун. Хъама мабитари, гьарцаннан жаваб дулун багьантIишиву – хIукуматрангу, муниципалитетирттангу», – увкунни Администрациялул каялувчинал.
Владимир Ивановлул кIицI дунни заявкарду къадуллуми муниципал сакиншиннарду ва миннул бакIчитуран ккаккан дунни тапшурлугъру бартдигьлансса чIун. Мунал дюъ дирхьунни районнал ва шагьрурдал бакIчитурай миннал ласласишиврий ми давуртту барткъадигьаврихлусса жаваблувшиву.
Яла газрал сетирдал инвентаризациялул хIакъираву гьартану бувсунни ДР-лул ХIукуматрал вице-премьер Владимир Лемешкол. Мунал тIимунийну, газрал сетирдал инвентаризация дувансса заявкардай ми давурттахсса арцу шамлий ххишала ккаккан дурну дур. Ми тIайла дацIан дан тIий бур экспертътурал ххал дурну махъ. Мунал тапшур бунни дуллалисса давурттал хIиса-китав (отчет) дулаван аьркиншиву гьарца нюжмардий.
БатIаврий хIасиллу дуллай Администрациялул Каялувчинал увкунни: «Зу дуллалиссару зула-зула кIанттурдай дагъусттанлувтурал оьрмурдалгу, миннансса къулайшиннартталгу жаваб, му зул тIайланмасса буржри. «Зун ччай бакъарув – букьияра къуллугъирттая». Мунал тIимунийну циняв газрал сетру дуллалиссар Дагъусттан Республикалухьхьун, мунил хIакъиравусса хIукму хьуну бур. Мунийн бувну цIуххавугу кьянкьассар дикIантIисса.
