Августрал 21-нний ДР-лий аьдлу-низам щаллу даврил координациялул батIаврий ххал бивгьунни КIулшивурттал кьини ва чIурду булаврил цасса кьини жямат нигьачIаврия мюхчан баврил масъалартту. БатIаву дачин дурну ия ДР-лул БакIчи Владимир Васильев.
Дагъусттаннал БакIчинал тIимунийну, аьмну ларсун, дуккаврил система зий дур цалий дарцIуну, амма бур дузал буван аьркинсса масъаларттугу: 1462 школарттава 26-нния ливчусса бур лапва бух бувксса, авариялул тагьарданий бур 144 школа, кугьна хьусса тагьарданий (в ветхом состоянии) бур 117, мукунма 588 школа мюхтажну бур капремонтрах.
Васильевлул бувсунни «150 школа» тIисса проектрал лагрулий дурсса, дуллалисса ва дансса давурттая, миннун буккансса харжлугъирттая.
Яла республикалул каялувчинал бувсунни сентябрьданий хьунтIисса кIанттул цилакаялувшиврул органнавунсса бувчIавурттая.
ЦIусса дуккаврил шинайн хIадур шаврил ва му кьини нигьачIаврия мюхчан шаврин хасну дуллалисса давурттая бувсунни ДР-лул ХIукуматрал Председательнал хъиривчу – дуккаврил ва элмулул министр Уммупазил Оьмаровал.
ЧIурду булаврил цасса кьинилийн хIадур шаврил хIакъираву махъ лавхъунни ДР-лул БувчIавурттал комиссиялул председатель МахIаммад Дибировлул.
БатIаврий ихтилат бунни мукунма ДР-лул виваллил иширттал министрнал буржру чIумуйну биттур буллалисса Дмитрий Гутырял.
Ххал бигьлагьисса масъаларттал хIасиллугу дурну, цаппара тапшурлугъругу дунни ДР-лул БакIчинал.
