Халакки
КутIасса справка

Халаккиял шяравалу диркIссар Гъумучату кьиблалул чулийннай ца ряхра километралул манзилданий, Закьу-Зунтту тIайлану Хъунне­ххал киямур чулух, кьасса къурнил зуманив. Мунил лагма-ялттусса шяраваллуну хъанахъиссар Ххюлуссун, ЧIурттащи, Хъуннащи. Ххюлусмату Халаккав ца километрарагу дакъассар.
Шяравалу хIасул хьуну шин цими хьу­ссарив аьщуйн щуну учин захIматри, амма, хIатталлий яхьусса чар­ттал чичрурдах бурувгун, инсан шикку миналул хьуну ивкIун ур биялну хьхьичIавасса заманнай.

Щар диркIсса кIанттай бур чIярусса щин нани­сса кьулла-зийлу. ЧIаравва бур цIувцIучарил къуппагу бусса Гъазинал зиярат.
1882-ку шинал Аьрасатнал паччахIлугърал дурну диркIсса переписьрайн бувну, Халаккиял шяраву бивкIун бур 31 пуркIу (къатта), яхъанайгу ивкIун ур 163 инсан. Арандалийн бизан бан хьхьичIсса 1943-кусса шинал шикку бивкIун бур 52 къатта.
Цайми-цайми лакрал жяматирттал кунна, Халаккиял агьалинал дянивгу ишлану диркIун дур хIалтIилухун заназаврил касму. ХъунмурчIин лагайсса бивкIун бур Нальчикрайн, Армавирдайн, Майкопрайн, Ашхабад­райн. Хъинну цIа дусса заргалталну бивкIун бур Ттаттаевхъул, Аьдуевхъул ва Узуновхъул.

Шяраву колхоз сакин дурну дур 1929-ку шинал, 1-мур Майрал цIанийсса. 1929-1930 шиннардий зузи бувну бивкIун бур ликбезрал школа. ХхюцIаллий кIива къа­тта бусса Халаккиял шяравату 1941-ку шинал ­аьрайн лавгун ур 28 инсан – ярагъ кIунттил бугьан шайсса сайки гьарца чув. Минная махъунай зана хьуну ур 14 – дурусну бачIи. Берлиннайн ияннин талай лавгун ивкIун ур диялсса наградарттал заллу, Сталинградуллал талатаврилгу гьурттучи, полковник АьвдурахIман Ттаттаев.

1944-кусса шинал, цивппа буттал миналия бизан буллалисса хавар бувкIсса чIумал, Хала­ккиял жяматрал дянива­сса 12 хъамитайпа Балла Буттаевагу бакIчину бачIва ччаннахь лавгун бивкIун бур КIулушацIун, Совет Союзрал Виричунал цIагу ларсун, цаппара чIумул хьхьичI ­аьрая увкIун ивкIсса Ризван СулаймановлучIан, цив­ппа бизан къабитан­сса чаран лякъи учин – фронтраяту ласру, арсру, уссур­вал бучIаннинмагу кьабитан бувансса кабакьу бува учин. Шайссияв (хIатта Виричунащагума) Сталиннул амру аглан буван, баххана буван?!
Бивзун мукьах Халаккиял жямат яхъа­най бивкIссар цаймигу шяраваллащал цачIуну райцентрданий – ЦIуссалакрал шяраву.