Рамазаннул арс Тумалаев
Нариман
Июль зурул 21-нний ахиратрал хьунни хъунасса аьлимчу, биохимиялул профессор, ДР-лул ПаччахIлугърал премиялул лауреат, А. Швейцардул цIанийсса Европанал институтрал кIяла арцул дипломат Рамазаннул арс Тумалаев Нариман.
Нариман Аьрасатнал яла машгьурми биохимиктураясса цар. Промышленностьрал аралуву ванал ххал диргьусса биохимиялул элмийсса давуртту ххуйну кIулссар, Аьрасатнал бакъассагу, чил хIукуматирттал ва пишалул хасъсса уртакьтуран.
Элмулул куртIнивун уххан бювхъусса, дакI хъинсса, даврил уртакьтуращал, цала учениктуращал авкьусса Нариман эбратну хъанахъиссар махъа нанисса никиран.
Ванал мудангу гьурттушинна дувайссия дунияллул халкьуннал дянивсса конгрессирттай (Испаниянаву, Турциянаву, Египетнаву, Италиянаву, Австриянаву, Грециянаву, Венгриянаву в м.ц.).
Нариман Рамазанович цала захIматрахлу лайкь хьуссар Павловлул цIанийсса медальданун, «Почетный эколог года» тIисса лахъсса цIанин ва чIярусса цаймигу бахшиширттан.
Лакрал райондалийсса ШавкIуллал шярава увксса арснал бивтссар, хъунама преподавательная айивхьуну, профессорнайн иянцIасса ххуллу. Хъунасса аьлимчу ушаврицIун ва ия цала буттал кIану ххирасса, Дагъусттаннал мяйжаннугусса патриотгу.
Жула «Илчи» кказитрайгу, буккултран дакIний бикIантIиссар, Нариман бусраврай нани бувну икIайссия «Аьлимтурал маслихIатру» тIисса рубрикагу. Нариман Тумалаевлул цала ххуйсса цIа кьариртссар элмулуву, жяматийсса давурттаву, гьарцагу ва кIулсса инсантурал дакIурдиву.
Нариман ахиратрал шаврил хъуннасса кьурчIишиву кIидачIлай, дакIнихтунусса жижара буллай буру ванал кулпатрахь, гъан-маччанахь, агьлу-авладрахь. Цал гьав нурданул дуцIиннав, алжаннул ххари аннав, махънал оьрмурдай барачат бишиннав. Амин!
ШавкIуллал жямат
МахIадлул арс НикIуев АьбдуллатIип
Оьрмулул 85 шин бартлагансса мутта къавхьуну, аьпалувух ивхьунни ххаллилсса зунтталчу, дяъвилул ятинтуравасса ца яхI-къириятрал заллу, чIавасса оьрмулий чIявусса ккавксса, ххишалдаран, нинугу яла ларгун, ятин хьуну ивкIсса, Вираттиял шяраватусса МахIадлул арс АьбдуллатIип НикIуев.
АьбдуллатIип увссар 1934 шинал августрал 25-нний Вираттиял шяраву. Къанясивну бивкIун бур 85 шинал юбилей хьунадакьин уссурссуннал дянив.
АьбдуллатIип кьянкьасса, захIмат ххирасса, цащава шаймургу, ца ххишалагу буллай оьрму бувтсса чуври. Ванал багъраву бакъасса журалул мурхь къабикIайва, цумур цукун шайрив опытру буллайна икIайссия.
ЧIаважагьил хьувкун, АьбдуллатIип увцуну ур буттал Аьшттарханнайн маэшат буллан. Тичча лавгун ур армиялийнгу. Кулпат бувну махъ ивзун МахIачкъалалийн, зий икIайва Приборостроительный заводрай, дуллуна ванан диялсса грамотартту ва бахшишругу, захIматрал ветераннал медальгу. Чув, ци даврий зурчангу, архIал зузиминнал дянив хIурматрай икIайва АьбдуллатIип.
Хъуннасса кьурчIишивугу кIидачIлай, жижара буллай буру кулпат Рукьижатлухь, душваврахь, вайнная бивзминнахь, цинявппагу уссурссуннахь, щалвагу агьлу-авладрахь. Махънал оьрмурдай барачат бишиннав.
АьбдуллатIиплул гьав нурданул дуцIиннав, рухI алжаннул ххари даннав.
Вираттиял жямат
Насруттиннул арс Зиркьуев
Сулайман
Оьрмулул 53 шинаву аьпалухьхьун лавгунни ас-ламусрал увччусса, ххаллилсса инсан, Зиркьухъал Сулайман.
Увну ур Сулайман Ккуллал райондалий 1-мур ЦIувкIуллал шяраву 1966-ку шинал март зурул 25-нний. Къуртал бувну бур буттал шяраву дянивмур даражалул школа. Мунияр махъ дуклан увххун ур Богородскаллал техникумравун. Му къуртал байхту, зий ивкIун ур Ставрополлал улклуй, Георгиевск шагьрулий, цала касмулий техник-технологну, цехрал хъунаману. 2015-ку шиная шинай яхъанайгу, зийгу уссия МахIачкъалалив.
Сулайман ия гьарцаннащал хIал бавкьусса, дакI-аьмал хъинсса, дустуран, гъан-маччанан бусравсса инсан.
ЦIуну увсса оьрчIал оьрчIаягу ххарину уссия, щалиххан къаивтунни.
Хар-хавар бакъа ялун бивсса апатIрайну ахиратравун лавгсса Сулайманнул кьурчIишиву кIидачIлай, жижара буллай буру кулпатрахь Лиманатлухь, арснахь, душнихь, ниттихь Зулайхатлухь, уссурваврахь, ссурваврахь ва махъсса цинявппагу гъан-маччанахь. Ванан бакъамур оьрму махънан булуннав. Цал рухI хъинний дишиннав, алжаннул ххари аннав, гьав нурданул дуцIиннав.
1-мур ЦIувкIуллал жяматрал цIания ХIажиева Камилат
Лавгунни Чакъаллал МахIаммада
Лакку билаятрайсса Чакъаллал аьрщи ятин хьунни ца язисса ванил заллу ахиратравун лагаврийн бувну. Хаварду бикIай ца инсаннаща цичIав бан къашайссар, кьун ккуру битан къашайссар тIисса.
Жижаралун кIанай
Валлагь- биллагь, хъинну шайсса бивкIун бур. Ттул дакI пахрулий дикIайва МахIаммадащал кIул хьуну махъ. Ва ия, буниялагу, махъру бивтун даву дуллалисса инсан. Му давугу дия Лакку билаят цанма ххирашиву ккаккан буллалисса. Ва инсаннал цала кулпатращал, мукунма ххаллилсса хъамитайпа – Зумрутлущал архIал ядуллай уссия щаллусса шяравалу. КIа шяравугу муданнагу тавлуву цIу дуссия. ЧIявусса лакрал интеллигенция кIа цIарал гъили бувссар.
Гьай-гьай, дуниял кумпаякум къархьунни ва ца инсан ахиратравун лагаврийн бувну. Амма аьлтта чIалан бивкIунни ца-ца укунсса виричунал бакъа Лакку билаят къаябантIишиву. Цибанссар, жущава Аллагьнал дуллусса кьинирдаяр ххишала яхьун къашай. Аьпа баннав ва хъуннасса дакIнил заллуну ивкIсса лаккучунал – ХIусайннул арс ХIусайнов МахIаммадал. Ва цинявннан кIулссия, Чакъаллал МахIаммада тIий. Ва ядуллай уссия цала Зумрутлущал Ккуллал райондалия 1944 -ку шинал арандалийн дизан дурсса Чакъаллал шяравалу.
МахIаммадал хъунбуттайн Ися, хъунбавайн Залму учайсса бивкIссар. Миннал бивкIун бур кIия арс МахIаммад, Паша, ца душ – Лайли. «Жу армиялийн лавгсса арсру зана къавхьуну къабизанну», — тIий, кIай кIиккува ливчIун бур. Лайли ХIусайн тIисса чувнан щар хьуну, 1940-ку шинал увну ивкIун ур МахIаммада. Ванал ниттиуссурвал ва бутта дяъвилия зана къавхьуну бур.
Лайлищал МахIаммадагу изан увну ивкIун ур ЦIуссалаккуйн. Яла, 1947-ку шинал, баллан бивкIун бур Лайлин нину-бутта ургала акъа ливчIун бушиву. Гила нитти-буттачIан зана хьуну, зун бувххун бур ЧIяйннал колхозравун. МахIаммадагу дуклан ивкIун ур Ваччиял школалий. Школа 1960-ку шинал къуртал байхту, ятин хIисаврай армиялийн къаувцуну, зун ивкIун ур ЧIяйннал Бярнихалу тIисса кIанттайсса пирмалий учетчикну. Бувккуну бур ганияр махъ Буйнакскаллал кооператив техникум. Зий ивкIун ур ттучаннай, райпорай, загатскотрай, статуправлениялий. Пенсиялийн увккун махъ, Чакъалив КФХ тIиртIуну, къушгу бивщуну, яхъанай уссия.
Вайннал кулпат хъинну хъамал ххирасса инсантал бия. На навагу цимилагу хьуссара вайннанний. Ца чIумал Лаккуйн кореянал гастарбайтертал букIлакIисса чIумал, вайнначIа бикIайва гай къуш бивщуну. Вай яхъанахъисса къатригу дия хъинну цIакьну, 18-ку аьсрулийра дурсса къатри.
Вайннал наслулия цу-унугу укканхьуви хъунбуттал тав лещан къабитансса. Умуд бур.
Яраппий, я Аллагь, ина найунува Алжаннавун агьаннав, жул МахIаммадай. Ина кунмасса лакрал чиваркI чан къабаннав. Вил бунагьирттал аьпа баннав!
ХIажимурад ХIусайнов,
ш. Вихьул
Насруттиннул арс Сунгъуров Юрий
Тамансса хIаллай шануцIухгу ивкIун, аьпалувух ивхьунни зунтталчунал яхI-къирият цаву цIакьну яхьуну диркIсса, ГьунчIукьатIрал шяраватусса Насруттиннул арс Сунгъуров Юрий.
Юрий увссар 1939 шинал ГьунчIукьатIрал шяраву. Та чIумалсса кулпатру кунма, вайннал кулпатгу бивзун бур Каспийск шагьрулийн. Дуккаву къуртал дурну дур шагьрулул школданий. Зун увххун ур « Дагдизель» заводрайн, зийгу ивкIун ур 41 шинай кьюлтIсса цехраву. ХIурматрай ивкIун ур архIал зузиминнал, жяматрал, чIахху-чIарахнал дянивгу. Дуссия ванан бивхьусса захIматрахлу дуллусса бахшишру ва хIурматрал лишаннугу.
ДакI хъинсса, чIявусса ихтилат бакъасса Юрий ия ххуйсса кулпатрал ттарцIгу, цалва язи бувгьусса КIямашрал шяраватусса хIакьсса зунттал хъамитайпа Аьишатлул бакIрал заллугу, оьрчIан ххирасса мяммагу, хъунмяммагу.
Цибанссар, лавгунни цува ххирамигу хъирив хъювхъу тIий кьабивтун. Алжаннул ххари аннав цув, гьав нурданул дуцIиннав.
Юрий аьпалувух ишаврил кьурчIишивугу кIидачIлай, жижара буллай буру кулпатрахь Аьишатлухь, арсурваврахь, душнихь, уссурссуннахь ва щалвагу агьлу-авладрахь. Юрийл барачат махъ ливчIун лякъиннав. ОьрчIал ва оьрчIал оьрчIал оьрму лахъи баннав.
ГьунчIукьатIрал
ва КIямашрал жямат
