Ухссавнил Ккавкказуллал Федерал округрал дунияллул халкьуннал культуралул коммуникация хьхьичIуннай даву мурадрай,
дунияллул халкьуннал фольклорданул фестиваллал лагрулий июльданул 18-нния августрал 19-ннийн бияннин Франциянаву наниссар Дагъусттаннал халкьуннал Творчествалул кьинирду.
Бадрижамал Аьлиева
Дагъусттанная му проектравух гьуртту хьун лавгссар Республикалул Халкьуннал творчествалул къатлучIасса «Эхо гор» (ш. Хасавюрт) ансамбль, УнцIукIуллал шяравасса усттар МахIаммадаьли МахIаммадаьлиев ва Къайтагъуллал накьичрал усттар Зубайдат ХIасанова.
[dropcap]Ф[/dropcap]ранциянал шагьрурдай уттинин хьуссар личIи-личIисса концертру, халкьуннал канил пишардал выставкартту, мастер-классру ва цаймигу давуртту. Дагъусттаннал, ккавкказуллал культура палангнан ккаккан даву дакъасса, жулва артистътал кIул хъанай бур му билаятралмур культуралущалгу. Мукун, жулва делегациялунсса культуралул программалул лагрулий, «Эхо гор» ансамбльданул коллектив бивссар Монтуар шагьрулийсса халкьуннал музыкалул инструментирттал музейравун.
Миву бусса бур, 1973-ку шиная шинмай байбивхьуну, личIи-личIисса шиннардий дунияллул халкьуннал дянивсса халкьуннал творчествалул «Festival de Montoire» фестиваллал гьурттучитурал пишкаш бувсса, музыкалул инструментру – Кьиблалул Американавасса, Африканавасса, Азиянавасса, Европанавасса. Артистътурал вичIи дирхьуну дур ми инструментирттайсса макьаннах, хIатта цалвагума бивщуну бур ми. Хъинну махIаттал ва ххари хьуну бур ми, му музейраву дагъусттаннал къумуз ххал хьуну, ва 20 шинал мутталий цалчинма-цалчин музейрал чIирттан бавну бур дагъусттанналмур музыкагу.
Ангул шагьрулий «Эспас Матисс» тIисса культуралул центрданий палангнал тамашачитурал хъунмасса гъирарай ххал дурну дур «Дагестан мастеровой» тIисса выставка, муний МахIаммадаьлил ва Зубайдатлул бувсса мастер-классру. Дагъусттаннал артистътурал ва палангнал тамашачитурал телефоннаву цикссагу хьуну дур цачIу рирщусса суратру ва кIулшивурттал ххуржинтту цукссагу кIу дурну дур кувнная кувннан кIул хьумунил.
