АхIмадхан Султаннул цIанийсса МахIачкъалаллал аэропортрал директор Арсен ПирмахIаммадов хьунаавкьунни израилнал туриндустриялул вакилтал Рони Мордехай ва Карина Руденкощал.
Хьунабакьаврий гьуртту хьунни «Ухьхьу Кавказрайн» тIисса фондрал директор Станислав Аристов ва Дарбант шагьрулул чулухасса кьатIаллищалсса дахIавурттал хасъсса вакил Сави Ханукаев.
Имара Саидова
Шикку ххал бивгьунни МахIачкъалаллал аэропортрая Тель-Авиврайн самолетру лехлахи даврил хIакъиравусса масъалартту. Израилнавун Дагъусттанная самолетру лехлахи даврийну республикалийн цаймигу туристътал букIлансса сант ххишала хъанахъиссар.
Станислав Аристовлул кIицI лавгунни цивппа хIадурну бушиву вай рейсру тIитIаву мурадрайсса давуртту дачин дан. Ванал бувсунни «IMTM» тIисса Дунияллул халкьуннал дянивсса туристътурал выставкалул даврихсса хъунмур харж бишин пикрилий бушиву, мукунма израилнал туриндустриялул вакилтурансса информациялул тур дан ва аэропортрая Дарбантлив туристал биян буллансса ва буцлансса масъалартту дузал бавриха зун дакIний бушиву.
Хьунабакьаврий гьуртту хьуминнал ххал бунни МахIачкъалаллал аэропортрал даража. Арсен ПирмахIаммадовлул хъамаллуран ккаккан бунни туристътурал автобусру бацIан буллансса цIусса майдан.
МахIачкъалаллал аэропортрая Тель-Авиврайнсса цалчинсса рейсру дуллан пикрилий бур 2020 шинал инттухунмай.
ЦIанасса ппурттуву тIурча, кIивайвагу зий бур вай рейсирдал хIакъиравусса масъаларттаха.
