Фестивальданул лагрулий хьунни шанма ташугу

Июнь зурул 5-нния 7-ннийн бияннин Кулпатрал ва ччаврил кьинирдан хасну дуллалисса фестиваль.

[dropcap]Ф[/dropcap]естивальданул сакиншинначиталну бия Дагъусттаннал бизнес-клуб, МахIачкъала шагьрулул администрация. Мунивух хъуннасса гьурттушинна дунни «Лакку билаятрал рухI» ва «Инсан» тIисса ихIсандалул фондиртталгу, World FOLK VISION конкурсрал вакилтуралгу.


Андриана Аьбдуллаева
Байрандалийн бавтIун бия хъуними, жагьилми, мюр­щими. Щалагу паркраву тIивтIуну бия спортрал, дялахърулул, творчествалул майданну, ккаккан буллай бия мастер-классру. Хъиннува мюрщими бялахъан буллай бия аниматортурал ва клоунтурал. Кулпатирттал дянив най бия личIи-личIисса бяст-ччаллал тIуркIурду.
Фестивальданий гьуртту хьун Дагъусттаннайн бувкIун бия кьатIаллил билаятирттаясса, личIи-личIисса республикарттаясса ва Аьрасатнал регионнаясса хъамал.
[pullquote]Ташу буллалисса нину-ппу бакъасса, интернатрай хъуни хьу­сса Плотников Вадимлун (бусурман дин кьамул дур­сса) ва Миралиева Наидан ххуйсса ка-кумаг бунни ишбажаранчитурал, личIи-личIисса министерстварттал ва каши ду­сса инсантурал. [/pullquote]
Фестиваль тIитIлай, ихтилатру бунни шагьрулул администрациялул, ЦIуллу-сагъшиву дуруччаврил, ЗахIматрал ва социал иширттал, Жагьилтурал министерстварттал, Жяматий­сса организациярттал ва Бизнес-клубрал вакилтурал.
Кулпатрал кьинилун хас дур­сса мероприятиярттал лагрулий ЗахIматрал ва социал иширттал министерствалул Давурттал дузал баврил центрданул сакин дурну дия вакансиярттал ярмарка. Шикку давурттах луглагиминнаща ххал дан бюхълай бия цанна дакI дакьинсса даву, ми­ккура дан бюхълай бия даврий ацIаву мурадрайсса экспресс-собеседование ва стажировкалул икьраллу. Вакансиярттал ярмарка ххал дан бувкIун бия Дагъусттаннал ЗахIматрал ва социал иширттал министрнал хъиривчу Мурад Казиев, Да­гъусттаннал Предпринимательтурал ихтиярду дуруччаврил вакил Мурад ТIалхIатов хIаласса делегация.

Кулпатрал фестивальданул лагрулий бунни шанма ташу. Вай гьантрай ташу буллалисса нину-ппу бакъасса, интернатрай хъуни хьусса Плотников Вадимлун (бусурман дин кьамул дур­сса) ва Миралиева Наидан ххуйсса ка-кумаг бунни ишбажаранчитурал, личIи-личIисса министерстварттал ва каши дусса инсантурал. СахIналийн буккан бувну, дунни вайннан ххаллил­сса бахшишру. Ятинтал щаллу бунни кулпатраву аьркинмунил. Утти вай къатта-къушлил дузал бансса чарангу лякъинтIий бур. Шиккува кIицI бан Наидал бур ряхва уссу-ссу. Мигу аякьалийн лавсунни.

Махъра-махъсса кьини фестивальданул хъамаллурал хьхьичI магьаргу бивхьуну хъатIи бунни цаппара шиннардил хьхьичI Украиннава бивзун бувкIсса КIулшивуртту дулаврил центрданул каялувчи Марина Игуменцевал ва футболист, респуб­ликалул оьрчIал ва жагьилтурал спортрал школалул тренер Эдуард Исмайловлул.
Вай цивппагу Дагъусттаннал Бизнес-клубрал членталли ва кIинналагу хъуннасса гьур­ттушинна дурссар Кулпатрал фестиваль тIайла дуккан.
Фестиваль наниссаксса хIаллай тамашачитуран ххуй-ххуйсса балайрду увкунни Да­гъусттаннал эстрадалул машгьурсса артистурал.

Концертрал программа хъиннура ххуй дунни World FOLK VISION фестивальданул Гран-при лайкь дурсса Лаващиял райондалиясса «Авадан» ансамбльданул. Ххаллилсса балайрду увкунни жула «Лакку билаятрал рухI» группалувасса Иринал арс, чIярусса конкурсир­ттай ххув хьусса ва нукIува тамашачитуран ххира хьусса Мурад Хушлаевлул. Ца кьини ва волонтертуравух ия, гайми кьинирдай фес­тивальданул программагу дачин дурну, балайрдугу тIий ия. Тамашачитал, хаснува кьатIату бувкIми хIайран бунни «Пагьламан» ансамбльданул хьхьуттай­сса гьунардал.
Кулпатрал фестиваль ларгунни хъинну гурну ва мюнпат буну.