«ТтурчIиял щар щавур, цIалайнна лирчIсса»

ХIасан-ХIусайн Даудов

[dropcap]Л[/dropcap]акрал шаэртурал творчество ххираминнан ххуйну кIулссар ТтурчIиял шяравасса ХIасан-ХIусайн Даудовлул цIа. Ванал шеърирду личIи-личIисса иширттан, инсантуран хас був­сса, цала асарду ва щугълурду бюхханну аьч буллалисса бур. Миннуву ца агьамсса кIану бугьлай бур цала буттал шяраваллихасса шеърирдал.


Андриана Аьбдуллаева
Буттал шяравалу кьаритансса бувксса чIумал, ХIасан-ХIусайн ца-кIира шин хьусса чIиви оьрчI ивкIун ур. Тай чIуннугу ванан хъунмурчIин хъуниминнал бусласимунийну кIулну дур.
Бявкъусса, гъарал сив-сив тIисса март барз. Жяматран, шярава буккан бувну, аьравалтту дулуннин ялугьлай, 23 гьантта Ккурклив бан багьну бур.

— Цала думур кIидачIлай, Ккурккуллал жяматрал дур­сса аякьалийн барчаллагьрай бикIайва жул халкь, — тIий, буслай ур ХIасан-ХIусайн. Шанма-мукьва кулпатран кIира аьра­ва дулайсса диркIун дур. ЧIявуминнан бахьтта бачин багьну бур. Шярава Щурагьун бияннинсса ххуллийх чIявусса инсантал ливтIуну бур. Мигу ххуллул тий-ший бувччуну бур.
Щала оьрму бизан був­сса цIусса миналий гьарчагу, ТтурчIиял шяраваллихсса ччаву оьтту-ттурчIаву цIакь хьуну дур. Ва ччаврил гьавасрал увцуну, цимилагу ивну ур эяллайн дурксса буттал шяравунгу:

Ттул эшкьи ва ччавур
ТтурчIайнна-Зунтту,
ТтурчIиял щар щавур,
цIалайнна лирчIсса
Эяллава гьаз дан
дакъар кашигу…
Увну ур ХIасан-ХIусайн 1942 шинал ТтурчIиял шяраву Муртузялил ва Гьидаятлул кулпатраву. Вайннал къушлий 6 оьрчI бивкIун бур. КIива оьрчI кIийва, кIива шилун бивзун махъ ливтIуну, ХIасан-ХIусайнгу, ца уссугу ливчIун бур. Ниттил хъунмасса захIмат бивхьуну бур цилалу вай ччаннай бацIан буллай.
— Ца хъалул банка дулайва захIматрал кьинилун. Уртту-щин хIала дурну, ххункI буллай, ккашил литIун къабивтссару жу ниттил. Нину дакIнийн дагьувкун, язугъ хъанан бикIай, дакI хъювсул дуклан дикIай, — тIий ур ХIасан-ХIусайн.

ХIасан-ХIусайн кулпатращал ва оьрчIащал

ДакIнийна дикIара,
бавай, инагу,
Колхозрал даврия
чIалну дучIайсса,
Вил бурхIайн лархънасса
хъун ххалал къаргу,
Ца канил бувгьусса
хъалул банкIагу,
ЗахIматрал кьинилун
винна дулайсса.

ЧIанкъатлул дяниву
чарил нигьругу,
Хъалуя хъувухъу
буллай вардишсса,
КIачлий бивзна бивкIсса
лухIи кIункIургу,
Хъалул хъувухъулул,
мюрш бувсса мечIал
Ккурч дуллай, ккашища
оьрчIру зевххусса.

Укун ххяп-шап тIий, бакI бу­ккан бувну бур Гьидаятлул кIиягу арс. Ванил захIматрал ахиргу хайрданийн дурккун дур. КIиягу арсная ххаллил­сса арамтал хьуну бур. ХIасан-ХIусайннул хъунама уссу Давуд биологиялул элмурдал доктор, профессор ур. Цала оьрмулул ва захIматрал ххуллу ХIасан-ХIусайннулгу лайкьну бивтун бур.
ЦIуссалаккуй лавайсса даражалий школагу къуртал бувну, ХIасан-ХIусайн увххун ур дуклан Ухссавнил АьсатIиннал шяраваллил хозяйствалул институтравун, инженер-механиктал хIадур байсса факультетрайн.

— Дуклан уххан муксса гъира бияхха, уссил, документру булун ца кьини дакъа да­къар, ччяни шихун нану куну, МахIачкъалалия оьвчайхту, ЦIуссалаккуя Хасаврайн ахьтта лавгра. КIюрххицIун ссят мукьра хьусса чIумал на шийх ияв. Гичча поездрай Гьанжилив увкIун, най уна институтравун экзамен дулун лавгссара, — буслай ур ХIасан-ХIусайн.
Мукьра экзамен дуллуну, шамуннин «ххюва», цаннин «мукьва» лавсун бур. Гьан увну ур Орджоникидзелийн, шяраваллил хозяйствалул институт­рал инженертал-механиктал шайсса факультетрай дуклан.
Дагъусттаннал шяраваллил хозяйствалул институтраву инженертал шайсса факультет бакъа, Орджоникидзелийн тIайла буккайсса бивкIун бур ва факультет язи бувгьуми.

Институт бувккуну махъ ХIасан-ХIусайн лавгун ур аьралуннаву къуллугъ бан. Ца шинайсса къуллугъгу бувну, зана хьуну ур. Амма, 6-7 барз лагайхту, лайкьну къуллугъ буллай ивкIун тIий, кIилчингу увцуну ур. Къуллугъ буллай ивкIун ур Прикарпатиянал аьрали округ­рал 10-мур танкардал дивизиялуву, автомобиллал роталул командирнал хъиривчуну. Ванал сурат лархъун диркIун дур аьра­ли округрал ХIурматрал улттуй. Зана хьуну махъ ХIасан-ХIусайн зий ивкIун ур личIи-личIисса жаваблувсса давурттай: «Гостехнадзорданул» хъунама инженер-инспекторну, ЦIуссалакрал райисполкомрай, Даггосагропромрай, Профсоюзирттал обкомрай, райисполкомрал председательнал хъиривчуну. Махъсса 10-нния лирчусса шиннардий райондалул ремонтрал ва техникалул предприятиялул директорну ивкIун ур ва идара лакьиннин. Чув зий ухьурчагу, цала даву лавайсса даражалий дай­сса диркIун дур.

«Шеърирду чичлан та айивхьура?» – куну цIувххукун, буслай ур, школалий 6-мур классраву дуклакисса чIумалва чичай­сса бивкIшиву, ми «ЦIуссалакрал колхозник» тIисса райондалул кказитрайгу бивщуну бивкI­шиву.
Шиккува кIицI лаган, 2015 шинал «Мовел» издательствалул итабавкьунни «Оьрмулул щавурду» тIисса ХIасан-ХIусайннул шеърирдал жуж.

Инсаннал бивтсса ххуллул кьимат ганал наслулух бурувгун бишлан бикIай. Цала кулпат Савдатлущал (ва ЦIуссалакрал азарханалул хIакин бур) ду­ккингу бувну, ххуллийн бивчуну бур шанма оьрчI. Рязину ур ХIасан-ХIусайн тIайла бавцIусса, цала хIарачат цала буллалисса оьрчIая. Умудрайгу ур вайнная бивзсса наслугу яхI-къирият, адав-инсап дусса хьуншиврийн.