Чичрулун чаран бакъассар учай. Чичрулул кIункIу увну увцухьунссия отпускалийсса Тенгиз ХIусайновгу ЦIуссалакрал шяравун гай баласса сентябрь зурул гьантрай.

Чичрулул бувцухьунссия, инженернал пишагу лавсун, заводрай зузисса Мурад Майрамовгу,чил билаятрай къуллугъ бувну зана хьусса МахIаммадкамил Аминовгу ЦIуссалакрал РОВД-лий зун.Заннал чивчумунин чаран къалявкъуну, цал архIал бяливчIунни шамунналагу жагьилсса оьрмурду.

---

Андриана Аьбдуллаева
МахIаммадлул арс Тенгиз ХIусайнов. Увну ур 1977-ку шинал ЦIуссалакрал райондалийсса Гьамиящиял шяраву.Аьрали къуллугъгу лавхъун зана хьуну махъ ЦIуссалакрал РОВД-лийн зун увххун, дахьра кIира шин хьуну диркIун дур.Зий унува дуклан увххун ур милицанал школалийн.Та шинал, август зурул ахирданий,сессиялийн увкIун МахIачкъалалив ивкIун ур Тенгиз.Сентябрь зурул мукьунний ниттищал ЦIуссалакрал шяравун ссийчIан хъамалу увкIун ивкIун ур.Хъирив кьини кIюрххил Тенгиз чантI учин увну ур биту-ххитулул чIурдал.Шяравун къачагътал бувхсса кIул шайхту,мугьлат бакъа дустуран кумагран райотделданийн авчуну ур.БухкIуллуву дарцIуну арс аглан ан кьаст лархIуну дур ниттил.
Шайссияв.АцIайссияв.КъакIулссияв ниттин цила арс. Анаварсса бущилий рай­отделданучIан нанисса Тенгизлун хьунабавкьуну бур мукунма дустуран кумагран нанисса Мурад Майрамов ва МахIаммадкамил Аминов. Вайннал бувсун бур райотделданучIансса ххуллу боевиктурал бувгьуну бушиву.

Шамунналагу пикри бувну бур ялттуххуллийх, багъирдавух райотделданучIан буккан.Амма шиккугу вай боевиктурал кьюкьрайн тIайла бавцIуну бур.Шяравусса циняв кIичIиртту миннал бувцIуну бивкIун бур.Милицалтрангу ярагъуннил балгусса боевиктурайн данди бацIан багьну бур.Душманнал ккуллардал увтун ур Мурад Майрамов.Тенгиз ва МахIаммадкамил чIаравсса Нураттин ХIусмановлул чIаркIув бувххун, тива битлан бивкIун бур.Ярагъ щяв бивхьуну бу­ккияра тIий милицалт мютIи къавхьукун,боевиктурал гранатометрава бивтун чIаркIницIух цIу лачIун дурну дур.ЧIаркIнил заллу вай цукун хассал бан хъинавав тIий къазразан увну ивкIун ур.ЧIаркIув увхсса ванан Тенгиз ва МахIаммадкамил оьтту­вунгу бахьлавгун, патроннугу духларгун ,ца бухкIуллучIа, ца чIавахьулттичIа багьну лявкъуну бур.Къачагътуран хIисав къахьунну буккан банна тIисса Нураттиннухь вайннал душманнал увтсса дус кьаивтун чунчIав къабачиншиву бувсун бур.Цивппагу жан дукканнин цала позициярдая хIура къавхьуну бур.

Вайннал бивчусса боевиктуравасса ца Хаттаблул телохранитель ивкIун ур.Мунийн сси бивзун, гьалак бувксса боевиктурал щаллусса кьини цучIав гъан хьун къаивтун ур милицалт­рал жаназарду ларсун дуччин.Бувччуну бур вай хъирив кьини цала жан дуллусса кIанай, Нураттиннул багъраву.Так дяъвилул ишру къуртал хьуну махъ цIунил бувччуну бур цала-цала минардай: ца-МахIачкъалалив, ца-Гьамияхь, цагу-ДучIиннал шяраву.
Тенгизлун диркIун дур дахьра 22 шин.Бухьунссия ванал ччиссагу,кулпат бансса,оьрчIру канил бугьансса хияллугу.Амма ца лахIзалул бяличIан бувну бур ванал жагьилсса оьрмугу, чаннасса хияллугу.
Тенгиз ивкIун ур чурххал бюхттулсса, цIуллу-цIакьсса жагьил.Кьянкьа-кьурчIисса, сивсусса зузала ххирасса ивкIун ур командирнангу.Къуллугърал бурж биттур буллай жан дуллусса Тенгизлун аьпалул хьуну махъ Къучагъшиврул орден дуллуссар.
Юсуплул арс Мурад Майрамов увну ур 1962-ку шинал МахIачкъалалив.Школа ванал Лакрал райондалий къуртал бувну бур.Мунияр махъ Дагъусттаннал политехничес­кий институтгу къуртал бувну, цаппара шиннардий заводрай инженерну зий ивкIун ур.ЦIуссалакрал райондалул виваллил иширттал отделданий зун айивхьуну ур 1997-ку шинал.

Мурад ивкIун ур ППС-рал штаб­рал хъунаману.Зий унува дуклай ивкIун ур Ростовуллал юридий институтравугу.Сентябрьданул 5-сса кьини кIюрххил боевиктал шяравун бувхсса баяйхту, кулпат ва чIивисса душгу шанай кьабивтун, райотделданийн гьан увккун ур Мурад..КIичIиртту боевиктурал бувцIуну бивкIун бур.Ххуллийх мукунма райотделданийн нанисса Тенгиз ва МахIаммадкамилгу хьунабавкьуну бур.Амма отделданийн бияннин кьамул дан багьну бур вайннан талатаву. Шама милица данди бавцIуну бур ярагъуннил балгусса къачагътурал кьюкьлуйн.Гьай-гьай,боевиктурал гуж цукссагу ххишаласса бушивугу чIалай, ахир ци хьунссаривгу къабувчIлай акъахьунссия.Автоматравусса патронну къуртал хьуну махъ, пистолет буккан бувну талай, жан дукканнин кьянкьану авцIуну ивкIун ур.

Аьпалул хьуну махъ Мурадлун Къучагъшиврул орден дуллуссар.
МахIаммадлул арс Аминов МахIаммадкамил увну ур 1971-ку шинал февраль зурул 23-нний ЦIуссалакрал райондалийсса ДучIиннал шяраву, ряхва оьрчI, бусса кулпатраву.Хасаврай шяраваллил хозяйствалул техникумгу къуртал бувну, мунияр махъ Псков шагьрулий гьавалул ва десантрал аьралуннаву къуллугъ буллай ивкIун ур.Ца шин лирчIсса чIумал «Голубые каски» составраву Югославиянавун тIайла увккун, ца шинайсса ялагу контрактрай къуллугъ буллай ивкIун ур.Зана хьуну махъ ЦIуссалакрал РОВД-лий зун увкIун ур.Къачагътурайн данди бавцIусса шамагу зузалава махъра- махъ ванал дуллуну дур жан.

Къучагъсса милицалтрал ва боевиктурал данди бацIаврил бардулт хьуминнал бусласимунийн бувну, цала оьрму хха­ссал бан бюхълай бунува, цала позициялия сукку ан къавхьуну ур МахIаммадкамил.Аьпа­лул хьуну махъ ванан дулуссар Къучагъшиврул орден.Ватан дуручлай жан дуллу­сса виричунал аьпа абад бан ДучIиннал шяраву дацIан дурну дур гьайкал.МахIаммадкамиллул уссу АбутIалиб шикку «Савлугърал аллея» бан дакIний ур.Гьайкалданул лагма-ялттусса кIанттурду бакьин буллай цIанагу давуртту най дур.