Июль зурул 17-нний Дагъусттан Республикалул Миллатир­ттал политикалул министерствалий хьунни гьашинусса шинал хIажлийн бачаврил хIакъиравусса хIадуршиннардан хас дур­сса пресс-конференция. 

22 Шикку гьуртту хьунни хIажлийн агьали ххилаххисса кампаниярттал вакилтал.

---

Имара Саидова
Миллатирттал политикалул министр Энрик Муслимовлул кIицI лавгунни Миллатирттал политикалул министерствалул ДР-лул Муфтиятращал ва «Марва-тур» компаниялущал цачIуну дачин дурну бушиву ХIажлицIунсса тагьар агьалинан бувчIин буллалисса давуртту. ХIажлийн агьали наниссаксса хIаллай Миллатирттал политикалул министерствалий зий дикIантIий дур «Горячая линия».

Гьашину Аьрасатнава хIаж­лийн гьантIий бур 25,500 бивсса инсантал. ХIасил, вайксса квотарду личIи дурну дур Саоьдуллал Аьрабусттаннал.
Дагъусттанная, муданма кунма, яла чIявуми инсантал лаглай бур хIажлийн. Мунийн бувну жула республикалун личIи дурну дур 10 000 квота, ялагу ххишала дан най дур 1500 квота. «Марва-тур» ООО-лул каялувчинал бувсунни хIаж буван наниминнан ккаккан дурсса тIалавшиннардая ва электрон журалий визарду щаллу дан­сса куц.

— Ларгсса шинал, личIи-личIисса багьана-сававрттайн бувну, Дагъусттаннай къадагъа дирхьуну дуссия хIажлийн наними аьрщарайхсса транспорт­рай буцин къабитансса. Гьашину хIажлийн нанисса агьалинаща ишла дан бюхъантIиссар «ЮТэйр» авиакомпаниялул ва «Флай-Дубай» госавиакомпаниялул хIаллихшиннарду, — увкунни «Марва-Тур» ООО-лул директорнал.