ДР-лул Культуралул министерствалий хьунни «Дагестан» ВГТРК-лул хъунаманал хъиривчу Ссалам Хавчаев бакIчисса миллатирттал театрдал хIакьинусса тагьарданун хас дурсса батIаву.
Зулайхат Тахакьаева
Аьрасатнал магьирлугърал лайкь хьусса ишккакку Гулизар Султановал бувсунни Дагъусттаннал театрдал Аьрасатнал театрал магьирлугърал системалий ци кIану бугьлай буссарив.
— ЦIусса ттуршукулул дазуй Дагъусттаннал театрдал кулпатравун бувхссар цIусса коллективру: Азирбижаннал драмалул театр (Дарбантлив), опералул ва балетрал театр, Нугъайнал ва Табасараннал театрду. Цала миллатрал драматургия дакъашиврийн бувну, ттизаманнул миллатирттал драматургиялул иш оьнихун багьну буссия.
Махъ байбивхьунни Дагъусттаннал миллатирттал чичулт фольклорданул сюжетру хIаласса тарихрал темалийн багьайсса пьесарду чичлай, — увкунни Гулизар Султановал.
Ванил кIицI лавгунни махъсса шиннардий республикалий лув ялув лайкьсса даражалий хьушиву Каспи хьхьирицIухсса ва ЛухIи хьхьирицIухсса билаятирттал Дунияллул Халкьуннал дянивсса Оьрус театрдал фестиваль.
Бувсунни фестивальданий «За лучшую режиссуру» дипломран лайкь хьусса Лакрал театрданул «Оьтту ва макь» спектакльдания.
Хаснура цIа дурунни Гулизар Султановал республикалул пахрулун лайкьну, шиная-шинайн усттаршивугу дюхълай, хьхьичIунмай хьуну нанисса Дагъусттаннал Ссихьрал театрдания.
Дагъусттаннал миллатирттал театрдаясса ихтилат къуртал буллай, ванил кIицI лавгунни театр хъунмав къахьуншиврул багьлай бушиву актертурал ва тамашачитурал кIану бугьансса цIусса ник тарбия дуван.
Къумукьнал ПаччахIлугърал театрданул директор Мавлет Тулпаровлул балжину бувсунни республикалул театрдан жагьилсса актертал ва режиссертал хIадур баврия.
КIицI лавгунни махъсса шиннардий ялун ливчусса актертурал дикция хьхьарасса душиврийн багьайсса суал цимилвагу ххал бивгьуну бушиву культуралул министерствалул жяматийсса советрал батIавурттай.
Сукку бунни паччахIлугърал театрдал материал-техникалул базарду ва творчествалул зузалт къатрал дузал баврийн багьайсса суаллу.
Хьунабакьаврий ххал бивгьунни цаймигу агьамсса суаллу.
