[dropcap]И[/dropcap]нсаннал оьрмулуву ганал жиплил «куклу-кIушиврул» биялсса кIану бугьлан бикIай. Аьлимтурал мунин дирзун дур «Кулпатрал бюджет» тIисса цIа.Муна му бюджет щаллуну бикIаншиврул инсаннан зун багьлай бур хIукуматрал харж булайсса даврий, ягу цалла цанна сакин дурсса давурттай, бизнесрай.
24Ялагу, хIукуматралмур бюджет хIасул хъанай бур идарарттал, организациярттал ва таксса инсаннал дулайсса налогирттая. ХIасил, кIира цанниха ца лархьхьусса сакиншин. Амма оьрмулуву чIявумур чIумал жучIара, Аьрасатнаву, таксса инсанналми ихтиярду ссуссукьу хъанан дикIай. Муна мукун ссуссукьу хьуссар, СССР лирну махъ, чарив щяйтIаннул къуршилува дуркни куннасса НДС тIисса налог ялун личаву. БакIрайра ва дурчIлай дия цукунсса ци налог дуссарив. Ва дия 1990-ку шиннардий жула къуруш кьюкьаврийн бувну, цаппара хъуслил багьри лахъ шаврицIун дархIусса налог. Гай хьхьичIава бивкIми багьрайн ххи хьусса арцуя ласун ккаккан бувну бивкIссар ва налог. Мукун тIисса дур ванил мяънагу (налог на добавленную стоимость). Амма цаппара шиннардива, хьхьичIавами багьригу дакIния лавгун, ласлан бивкIуна гьарца итадаркьусса хъуслил багьлуяту. Улу, ласлан бивкIунни ичIаллил хIаллихшивурттаятугума.
Инсаннал хIукумат цала чулухуннай дургаврил даража хIисав бувай ттучаннайсса хъуслил багьрайну. Багьририв тIурча, лахъ хьурча бакъа, лагь хъанан къабикIай.
Буслан бикIайва Хъун дяъви къуртал хьусса шиннардияр махъ, инттухунмай ччатIул, навтлил, кирпитIрал ва цаймигу чара бакъасса ичIаллил хъуслил багьри чансса бунугу ялавай буллай бивкIшиврия. Гьай-гьай, бувчIлачIисса зат бур жула уттисса оьрму буруччиншиврул цIакьшиву дикIан багьлай бушивугу. Мунингу, гьай-гьай, аьркинни чIярусса арцу. Мунияту, ХIукуматрай аьйрду дуллансса ишру бухьурчагу, ссавур дуллан багьлай бур.
Вана, уттигъанну телевизорданувух бувсунни ахъулссаннул багьрал ялун диллалисса НДС 20%-рая 10%-райн дутантIишиву.
Вагу шяраваллил хозяйствалуву зузисса инсантуран ца чарансса ишну хъанахъиссар. КьюкьинтIиссар сокругу, ахъулссаннуя дувайсса цайми-цайми затругу. Хьунхьуви цаймигу кукулушиннарду.
ХIажимурад ХIусайнов
