[dropcap]И[/dropcap]юльданул 11-нний Ленинградуллал областрай тIиртIунни «Щалвагу Аьрасатнал хъунил кьини – 2019» тIисса билаятрай ца яла хъунмур агротехникалул выставка.
Муний гьуртту хьунни Аьрасатнал шяраваллил хозяйствалул министр Дмитрий Патрушев ва Ленинградуллал улклул губернатор Александр Дрозденко.
Дагъусттанная выставкалий гьуртту хьунни ДР-лул ХIукуматрал Председательнал хъиривчу – ДР-лул шяраваллил хозяйствалул министр Аьбдулмуслим Аьбдулмуслимов, «Минмелиоводхоз РД» ФГБУ-лул директор Залкип Кьурбанов, «Россельхозцентр» ФГБУ-лул филиалданул каялувчи МахIаммад ХIажимахIаммадов.
Пленар батIаврий дунни билаятрай хъуру дугьаврил давурттал хIасиллу ва ххал бивгьунни гьашину хIаллил лакьаврил масъалартту.
Дмитрий Патрушевлул бувсунни чIявуми регионнай шяраваллил хозяйствалул давурттал лябукку хъанай бушиву. Мунал тIимунийну, хIакьинусса кьини билаятрай ссуттил хъуру дургьуну дур 17-я лирчусса млн. гектардай. Гьашину дазул кьатIув баххайсса къалмул – лачIал, хъалул ва цайминнулгу хъуру дургьусса аьрщив гьарта дурну дур, миннуя ласайсса бакIлахъиягу гьарза хьуну дур.
ЦIанасса ппурттуву билаятрай аьмну гьавуну бур 5,7 млн. гектардания лавсъсса 23 млн. тонна къалмул. Гьашину къалмул бакIлахъия хьун тIий дур 118 млн. тонна, миннувух лачIалсса 75 млн. тоннаксса. Аьрасатнаща бюхъан тIий бур виваллил тIалавшиннугу щаллу дурну, дазул кьатIув даххаймур бакIлахъиягу гьарза дуван.
Ихтилатру бунни цайминналгу. Миннал ихтилатирттаву сукку бунни шяраваллил хозяйствалул аьрщив мюнпатну ишла дуллан аьркиншиврул, аьрщарал оьргъашиву сахла даврил, гьанна ххуй-хъин баврил, АПК-рал техника ва технология цIу дуккан даврил, хъузалт минерал оьргъашиврул дузал баврил ва цаймигу масъалартту.
ХIадур бувссар
ХI. Аьдиловлул
