[dropcap]И[/dropcap]юльданул 15-нний ДР-лул БакIчи Владимир Васильевлул МахIачкъалалив дунни Дагъусттаннал БакIчиначIасса Советрал батIаву. Му хас дурунни инвестициярттал иш-тагьар ххуй-хъин даврил масъаларттан.

Республикалул каялувчинал бувсунни ми масъаларттан хасну цаппара кIанттурдай хъинчулийсса давуртту дурну душиву: «Жунма лавхьхьуссар ми ма­съаларттал ялув бацIлан, хъирив бизлан. Мунияту дукIу 37700 зузи кIанттурдал хIакъираву чирчуну дия захIматрал кьутIирду. Мунил дакI ххари дуллай дур».
МуницIунма Владимир Васильевлул бувсунни кабакьу буллан аьркиншиву ххютула дуклакисса бизнесрацIун.

Дагъусттаннал БакIчинал тIимунийну, республикалий дузал бувну бур цаппара лябуккулул институтру: «ДР-лул чIиримур ва дянивмур ишбажаранчишиврул субъектирдан кредитру итадакьаврин кумагран­сса фонд», «ДР-лул чIиримур ва дянивмур ишбажаранчишиврул субъектирдал микрофинансированиялул фонд», «Дагестанская лизинговая компания» тIисса фонд, «Центр поддержки предпринимательства РД» тIисса ДР-лул ГАУ, «Корпорация развития Дагестана» тIисса АО.

Амма миннуй бивхьусса умудру барткъалавгна ливчIун бур. «Региондалий бур норматив-правалул база, жува дузал барду 2 ТОР (территория опережающего развития), 6 индустриал парк, 6 бизнес-инкубатор, амма лябукку хъанай бакъар бизнесраву», — увкунни Владимир Васильевлул.
Республикалул каялувчинал тIимунийну, ишбажаранчитал анавар буклай бакъар кредитру ласунгу.

[dropcap]Я[/dropcap]ла батIаврий гьуртту хьуминнал ххал диргьунни Каспийскалий дузрайн дуккан дуллалисса кIира инвестицияр­ттал проект: «Уйташ» площадкалийсса ООО «Ириб» (сокру дуккан дайссар) ва ООО «Агромир» (дикIул сурсатру дай­сса комбинат). Ми проектирдал хIакъираву гьартану бувсунни миннул каялувчитурал.
Цалла захIматшивурттая бувсунни ххютула буклан бивкIсса автозаправкарттал вакилтурал.
БатIаврий ххал бивгьунни бизнесрал хIакъиравусса цаймигу масъалартту.