Ттуплисуллал агьаммур кIичIираву нюжмардул мутталий хъанахъисса ишир­ттахгу къабурувгун, Бухмур Ттуплисуллал кIичIирттавух заназисса туристал та-бухьурчагу чан бакъар.

---

Зулайхат Тахакьаева
Цимил бучIарчагу, я къабу­ччайсса хьхьичIазаманнул архитектуралух хIайранну буруглай нанисса ттул хьхьичIун: «Ина ва кIичIиравух цимилвагу лавгунна, калбатоно. Ци кумаг аьркинни тIий?» — машиналува таксист увккунни. Тиху-шихунмай буруглай нанисса на патирданух луглагисса кунма бивзхьунссия ганан. «Бухзаманнул рухI-ccихI ххал дуллай бура,» – учав, гьанавиххул хьуну.

«Чату бувкIра?»- цIувххунни ялагу. «Дагъусттанная,» — увкукун: «Чансса хIаллай аглан хьула. Ттул гьалмахчугу Дагъусттаннаясса ур, ши­ккува ялапар хъанахъисса. Явала ванащал зула мазрай ца калима дува, ванайн Камил учай­ссар», — увкунни таксистнал. «Дагъус­ттаннай циксса мазру буссарив кIуллив? На ла­кку инсан бура?» — чайхту. «Яр, вагу лаккучури­хха»,- куну, трупка ттухьхьун буллунни. Нагу, вих бакъанма: «Цукун ура?» — куну цIуххав. «Ххуйну ура, инава цукун бура?».

Хъягу, хъяй, вани-тания цIух­лай бура. Гагу гьарца суалданун марцIну лакку мазрай жаваб дуллай ур.
«Ачу анаварну шиккун. Вила ватандалиясса душнищал кIул хьун. Ява вия ттун магаришгу багьлагьиссар,»- увкунни таксистнал. КIира-шанна минут къаларгун, увкIунни.
«НицIавкIратусса ХIайда­рахъал тухумраяссара», — увкунни.

[pullquote]«Гьалмахчунал ватандалия увкIсса
инсан ттулгу хъамаличури, ламус къабувну, ттучIангу оьвчин бюхъайссар,»- куну, таксистналгу визитка дуллунни. [/pullquote]

[dropcap]К[/dropcap]амиллул буттал ппу Аьв­дурахIман Ттуплислив цIа дурк­сса заргал ивкIун ур. Камилгу шиха увну, шиха хъуна хьуну ур. УчIайсса ур Дагъусттаннайнгу. КIирисса ссалам буслай ур лакрахь.
Ччимур чIумал оьвча тIий, номергу буллунни. Ттисса аьр­ххилий бувкIукун, Ттуплислив кIанттул хьусса лакращалгу кIул бан махъ буллунни.
«Гьалмахчунал ватандалия увкIсса инсан ттулгу хъамаличури, ламус къабувну, ттучIангу оьвчин бюхъай­ссар,»- куну, таксистналгу визитка дуллунни.