Дагъусттаннай июньдалул 28-нния июльданул 5-ннин нантIиссар ЮНЕСКО-лул хъаттиралусса «Зунттал агьлу» тIисса IX-сса дунияллул халкьуннал дянивсса фольклорданул ва аьдатрал культуралул фестиваль.
З. АьбдурахIманова
Ва фестиваль жучIара дувайссар Дагъусттан Республикалул БакIчи, АьФ-лул Культуралул министерство, Аьрасатнал ПаччахIлугърал Халкьуннал творчествалул къатта ва ЮНЕСКО-лул иширттаха зузисса Аьрасатнал хасъсса комиссия чIарах бацIаврийну.
Гьар шинах кунма, гьашинугу фестивальданий гьурттушинна дуван бучIантIиссар Чехиянавасса, Словакиянавасса, Сербиянавасса, Ираннаясса, Индиянавасса, Азирбижаннаясса, Къазахъисттаннаясса ва жула билаятрал 20 региондалиясса фольклорданул коллективру.
Фестивальданул лагрулий хьунтIиссар гала-концертру, фестиваль тIитIлатIисса ва лакьлакьисса шадлугъру, республикалул каялувчитуращалсса хьунабакьавуртту, халкьуннал усттартурал дурсса затирттал ярмукIартту.
