Исмяиллул арс Шарип Шарипов

Увну ур 1964-кусса шинал ЦIуссалакрал райондалий Чапаевкаллал шяраву.
ЯтIул дипломгу хъиривну Тамбовуллал областьрайсса

шяраваллил хозяйствалул техникум къуртал бувну махъ зий ивкIун ур агроном-мелиораторну «Волна революции» тIисса тиккурасса колхозраву. Муния махъ мукунма ххаллилну къуртал бувну бур К.А. Тимирязевлул цIанийсса Москавуллал шяраваллил хозяйствалул академия.
СССР-данийсса 106 сельхозвузрал дянивсса Щалагу союзрал агрономиялул олимпиадалий цалчинсса кIантту бувгьусса жагьилсса специалист тIайла увккун ур стажировкалий США-навун (1991-1993 шш.).
Муния мукьах зий ивкIун ур цала пишалуцIун бавхIусса личIи-личIисса давурттай. ЧIарахва ялагу бувккуну бур (с отличием) Ростовуллал экономикалул университетгу.
2012-2013-ку шиннардий зий ивкIссар ДР-лул шяраваллил хозяйствалул министрнал заместительну.
2013-2015-ку шиннардий биттур буллай ивкIссар ДР-лул ХIукуматрал председательнал заместительнал къуллугъ.
2016-ку шинная шинай зий ур ООО «Югагрохолдинг» тIисса теплицардал проектрал каялувчину.
Экономикалул элмурдал доктор, профессор, 170-нния лирчусса элмийсса давурттал автор.

---

1. Цукунсса хьуна оьрчIний вийнма яла гужсса асар биян бувсса зат, иш?
ЦIусса шин дайдишин хьхьичI жу, дусталсса оьрчIру, лавгссияв Хъун вацIлувун елкалул хъирив. Яла, жунмавагу хавар бакъа, вацIлуву бяйкьуну лявкъунав, къаляхълай бия махъунмай бу­ккансса ххуллу. Лахъну вев-гьарай тIий занази­сса чIурдал кумаграйну ахиргу жу лявкъунав гъан-маччаминнан. Ца-кIира хъатгу духIан багьуна яла. Му ишгу тачIав хъамакъабитай.
2. Инсаннал хасиятраву винна яла ккарккун къаччимур лишан?
Лажинлякъу. Инава усса кIанттай виятува ххаллилссагу, ххуйссагу тIий ивкIун, яла кIул шайссар гава «чувнал» инава акъаний виятува тIий ивкIмур.
3. Цими никирайн дияннин­сса кIулли вин вила ппухълуннал нясав? Буси яла архманал цIа.
ТIайланма учин, ттун тIай­лабацIу къавхьуна: на дунияллийн увксса чIумал, дунияллий акъая цаягу ттатта, да­къая царагу хъуннабава. Утти, нава шамийла ттатта хьуну мукьах, ттун бувчIлайгу бур цуксса къачIирисса агьамшиву ду­ссарив оьрчIан хъунбавахъал ва хъунмяммахъал дянив хъуна хьунсса кьисмат нясив бавриву. Так ниттил бусаврийну кIулли ттун ттула кIирагу чулухасса ттатта-бавахъаясса цаппара затру, цуксса хIайпнугу.
4. Вила оьрмулуву яла алши бакъамур шин?
ЗахIматну бур цания ца шин кIицI дан. Кув чIумал ца чIивисса мутталулгу, 365-рагу кьинилувасса цания цаннилгу, бюхъайсса вил оьрму якьатIавай кIура баен бан, чIири личIан дан къашайсса дардирдал угьан ан. Мукунсса кьинирдуну дия ттун на ттула нитти-буттацIагу, уссурваврацIагу хьусса шиннардил кьинирду.
5. Яла алши бумур шин?

1986-ку шин, нава Тимирязевлул цIанийсса академиялувун дуклан увхсса шин – му ттул дакIнилгу, кIулшилулгу хиялъя.
6. ВичIара циксса арцу хьувкун, дигьаларгун дикIанссия вил дакI?
Цуксса бизарсса махъруну бухьурчагу, тикрал банна: талихI арцуву бакъассар. Амма ми душивруцIун ва дакъашивруцIун дархIусса дур инсаннал тархъаншиву ва къатархъаншиву, иш багьсса чIумал, ми ча лякъин хъиннивав тIий, буру­ккин буллай къазананшиврул, вила оьрмулул чара бакъа­сса мурадру бартбигьин къахъанай къаличIаншиврул. Ттухь цIуххавай, хIакьинусса чIумал инсаннан лайкьсса харж байбихьлай бикIан аьркинссар 50 азарунния тинмай.
7.Инсаннал тахсирдава­сса цумур тахсир хьун­ссия вища бигьану ба­гъишла битан?
Бюхъавай, чIявусса затру багъишла битан аьркинссар. На мукун бугу-бувара, агарда банна тIий бувсса оьбала ба­къахьурча.
8.Бувагу къабитан?

Лавмартшиву.
9. Ссан диял къашай вил чIун?
Гьарца затирттанна диял къашай! Вила аьзизсса инсантуращал щяикIансса, изансса, жап учинсса. Гайннан виятура, мугу, вил цIуллушивугу дакъа цамур цичIав тIалавнугу да­къахьувкун.
10. Бартлавгун ччисса вила шанма мурад?
Ттула маччасса инсантал ттула оьрмулуву муданма битаву. ОьрчIал ва оьрчIал оьрчIал кьадарду бахтти-талихI бусса шаву. Ва шамилчинмургу – жула республикалий инсаннал инсаншиврул, за кIулшиврул ва профессионализмалул кьадру-кьимат бюхттулнийн гьаз був­сса чIун дучIаву. Шамилчинмур мурадрацIун чара бакъа бавхIуну бикIантIиссар хьхьичIми кIива мурадгу.
11. Вила оьрмулуву хъинну ххирасса кIантту бувгьусса шама инсаннал цIа?
Баху (нину), Баху (ттула душ), Руслан (арс) ва Халун (душ).
12. Винма ххуй бизайсса хъамитайпалул сурат?
Ттулла нину.
13. Вина кьамулсса чув-адаминал сурат?
Цайнува цува дузал­сса, тIай­ласса принципру ду­сса, сагъ-саламатсса, захIмат-жа­пасса иширахун агьувкун, бан-битанмур лякъин шайсса.
14. Агарда бюхъайсса бивкI­ссания, инава ци кIанттай, ци чIумал увну ва ци билаятрай яхъанай ччива вин?
Ттул оьрму гьарцагу чулуха лащу-щаллусса, мяъна-мурадирал вибувцIусса бур, цамур чIумал, цамур кIанттай увну хъинахха тIисса зат ттул бакIраву аглан хъанайвагу бакъар.
15. Ссаяту бикIай вил яла хъунмур пахру?
Укунмасса, Дагъусттаннай чIявусса цайми кунмасса, шяраваллил къушлугърая шагу лавсун, ттула миллатрал вакилнан ккаккан бувссар тIисса ца яла хъунмур къуллугърайн ияннинсса лахъисса ва къабигьасса ххуллу битаврия, ва му битаврил манзилданийгу щилчIав ка-кумаграх ялугьлай къаикIаврия, ва му ишла къабаврия.
16. Цукунсса дур вил виятурасса къарязишиву?
Нара кьаст лархIуну данна тIисса давуртту къадурнура личIлан дикIай, цайми мюрш-кьюршсса иширттахух лавгун. Кув чIумал карчIгу ялтту дук­лан дикIай.
17. Яла ххирамур дук­ра?

Гьай-гьай, ххункI. Хъинну ччан бикIай дахьа шавхьсса ччатI нисирахун букан.
18. Яла къаххирамур дукра?
ЛичIи дангума захIматну бур. Накьлил дукра личIину хьурдай тIун къаикIара.
19. Ссаятусса бикIай яла хъунмамур хIучI?
Ттула ххирасса инсантурацIа къавхьуния тIисса.
20. Хьуссарив вил оьрмулуву винна инара ттинин багъишла ритан къахъанахъи­сса къел?
Хьуссар.
21. Лавгсса заманардавасса цIанихсса инсантуравасса цуманащал хьунаакьин ччива вин?
Ми чансса бакъар. Амма ца яла хъунмур асар ттуйн биян банссия ттула буттащалсса хьунаакьаврил. На мунацIа хьу­ссара лап чIавану унува. Ппугу чIиви-хъунсса мурадирайн иян­ссия, цала арснал бивтсса оьрмулул ххуллу кIул хьувкун.
22. Цукунсса бур, вил пик­рилий, лакрал миллатрал яла хъунмур буру­ккин, цукунсса бур мунил ялун бучIантIимур?
Ваймигу миллатирттал кунма, лакралгу буссар жула Да­гъусттаннал ялун бучIантIимунил буруккин. ТIайлассар, лакралмур миллатрал ялун ливккун бивкIмур, ликлакимур хъанай бунуккар хъиннува хъунмасса, му кIантту сававну мунил генетикалул кодрайнгу щусса ххай ура биялсса щавщи. Дур жулла идентификация дуруччаврицIун дархIусса дард – мархри, традицияртту, маз… Жагьилминналгу, бугьараминналгу дянив сакин хьуну дур диялсса тапаватшиву.
23. Ци дахчилай дур хIа­кьину Дагъусттаннахун, цил аьнтIикIасса кIанттун ва надир­сса миллатирттан лав­хьхьуну, ххуйнугу, ххаллилнугу ялапар хъананшиврул?
Жухунна дахчилачимунил дур системалийн дурксса хасият – цачIун хьуну бур бартбигьин къахъанахъисса масъалар­ттал хъунмасса къав, ттериххин къахъанахъисса ттуп. Ми­кку ца яла хьхьичIунмурнугу хъанахъиссар кадрардал масъала. Властьрал личIи-личIисса къуллугъирттай битлай бивкIшиву «бавкку ххуллурдайх» бувкIсса биялсса бигьабукулт. Ца яла цIакьмур низам дикIан аьркин­ссар кадрарду хIадур баврил ва битаврил ххуллий.