[dropcap]И[/dropcap]юльданул 16-нний ДР-лул БакIчи Владимир Васильевлул дунни паччахIлугърал властрал органнал каялувчитал гьуртту­сса нюжмардий цал шайсса батIаву.

Республикалул каялувчинал тIимунийну, жува цIана циняв цачIуну зий буру каялувшиврул сакиншинналул система даххана давриха. Дур ккаккиялунсса хъин чулийсса давурттугу.
ДР-лул БакIчинал пикрилий, хъин чулийсса дахханашивур­ттал дайдихьуну хъанахъиссар республикалул бюджет щаллу шаву. «Утти жунма бувчIлай бур, ххишала бюджетравату арцу къадацланшиврул ци бан аьркинссарив», — увкунни Владимир Васильевлул.
ДР-лул БакIчиначIасса Инвестицияртту дучIан даврил советрал дуллалисса давурттал хIакъираву бувсунни ДР-лул ХIукуматрал Председатель Артем Здуновлул: «Советрал ярглийсса батIаврий жу ххал дигьарду 2 инвестициярттал проект ва цинявннал цачIусса хIукмулийну ми проектру ккаллиссар приоритетссаннун ва ми дузрайн ду­ккан дуллалисса чIумал, миннун бучIиссар личIи дуван аьрщи (ца-цаннун ххю-ххюра гектар) тургру къадунна». Артем Здуновлул тIимунийну, Совет батIаврил мурад хъанахъиссар заявкарду ххал дигьаву, проектран аьрщи личIи даву ягу арцу итадакьаву, бизнесрал, паччахIлугърал вакилтал, дагъусттанлувтал цачIун баву ва проектрал хIакъиравусса миннал пикри-зикри хIисавравун ласаву.

Ххал бигьлагьисса масъа­лалул хIакъираву ихтилат бунни 1-ма вице-премьер ХIа­жимахIаммад ХIусайновлул. Мунал тIимунийну, инвестортуращалсса давурттаву агьаммину хъанахъиссар цинявннан цасса шартIру дузал даву ва конкуренция хьун даву. Мукунна чан дуван аьркинссар ялув бацIаврил органнал бизнесчитал ххал бавуртту, хъирив лаявуртту, «ххютуйминнахсса» къулагъас хъун даву.
БатIаврий ххал бивгьунни Дагъусттаннай кьянкьасса коммунал лув лирчIмур дукьаву цIусса системалий дуллай байбишаврил масъала. Муния ихтилат буллай, ДР-лул ТIабиаьтрал луртаннал ва экологиялул министр Набиюлла Къарачаевлул бувсунни утти цIинцI дукьан даврихлу жаваб дулайшиву региондалул операторнал, площадкартту дузал даврихлу – муниципалитетрал.
Яла ххал бивгьунни Дагъус­ттаннай электросетру низамрайн дуцаврил масъала. БатIаврий ихтилатру бунни цаппара шагьрурдал бакIчитуралгу.