[dropcap]Л[/dropcap]акку билаятрал баргъбу­ккавал чулий, ЧIаящиял ва Уручуллал шяраваллал дазурдавун буклакисса кIанттай, лагмарасса мюрщи-хъунисса хIаллал вив лавсъсса оьнтIуллуву,

 диркIссар ца исвагьину чIирисса Муккурдал шяравалу.Инсантал яхъанай ба­къахьурчагу, хIакьинусса кьинигу тикку буссар щарнил диц-куц лаласун бюхъайсса гьанурдугу, чIирттугу. Та шяраву 1929-кусса шинал увну ур чIярусса шиннардий Дагъусттаннал шяраваллил хозяйствалул элмий­сса хъиривлаявурттал институт­рал отделданул каялувчину зий ивкIсса хьхьичIунсса специалист, шяраваллил хозяйствалул элмурдал кандидат, ДР-лул шяраваллил хозяйствалул лайкь хьусса зузала, МахIаммадлул арс Аьбдуллагь Оьмаров.

---

Залму АьбдурахIманова
Аьбдуллагьлул буттал ппу ОьмарихIажи жяматрал дянив хъинну бусравсса, дин-чаклил ишругу нани бувсса, аькьил­сса инсан ивкIун ур. Та заманнайва Мисиду тIисса цала кулпатращал Макка-Мадиналийн хIажлив лавгун, исламрал кьануннугу лархьхьуну, аьрабрай буккин-чичингу лав­хьхьуну, зана хьуну ур. Зана хьуну мукьах цала арсурваврангу ислам диндалул хIакъираву биялсса зат­ру лахьхьин бувну бур.

[dropcap]О[/dropcap]ьмарихIажинал хъунама арс, Аьбдуллагьлулгу ппу, зий ивкIун ур къалайчину Киславрай. Тикку 1935-ку шинал мунаща бювхъуну бур тIитIин мизит. Мивун занайгу бивкIун бур биялсса бусурман агьлу: къарачай, балкьар, чаргас, лак ва цаймигу. МахIаммад цувагу увчIуну ивкIун ур му мизитрал имамну. Амма яла, бала-хатIасса 37-ку шинал, цичIав вари чинсса багьанагу бакъанува, МахIаммад, НКВД-лул

увгьуну, дуснакьрайн авкьуну ур. Угьаву, акьаву ца, муная яла 28 шинал мутталий цукунчIавсса хавар къабивкIун бур. Так 1965-кусса шинал Ставрополлал улклул прокуратуралул ва КГБ-лул кIул бувну бур, мунал дело 1958-ку шинал Къарачай-Чаргаснал областрал судрал цIунил ххал диргьуну, «тройкалул» хIукмугу щялушиврий ккаккан бувну, МахIаммад щаллуну реабилитациялул хьун увну ивкIшиву.

Ппу увгьуну лавгсса чIу­мал хъуна-хъунама арснан Оьма­рихIажинан диркIун дур 10 шин, Аьбдуллагьлун – 8 шин, АхIмадханнун – 4 шин, ссин – 1 шин. Гьай-гьай, муния махъ оьрчIангу, туну, оьрмулуву диялсса захIматшивуртту ккар­ккун дур.
Лас увгьуну мукьах СалихIат шамагу арснащал ва душнищал бивзун бур Лаккуйн, Му­ккурив.
Киславрай бусса чIумал Аьбдуллагьлул бувккуну бивкIун бур 4 класс, Муккурив бивзун махъ 5-7 классру бувккуну бур чIаххувсса Карашав. 1947-ку шинал, кулпат кIилчингу шагьрулийн бувкIун махъ, Аьбдуллагьлул ЯтIул дипломгу хъиривну къуртал бувну бур Совет машлул техникум. 1955-ку шинал дуклан увххун ур Дагъусттаннал шяраваллил хозяйствалул институт­равун – агрономтурал факультетрайн.

Дагъусттаннал Шяраваллил хозяйствалул элмийсса хъиривлаявурттал институтраву зий ванал хьуну дур 57 шин: хъунама элмурдал зузала; кадрардалгу, аспирантуралулгу хъунама; институтрал элмийсса секретарь ва м.ц. Зузаврил уртакьтурал дянив ванал авторитетгу дур жард къаувкусса. Хъиннура хъуннасса бусравшиву дур цала агьлу-авладрал ва кIулминнал дянивгу.
Институтраву зузиссаксса хIаллай Аьбдуллагьлул чIалачIи бувну бур цува хъинну ларайсса квалификациялул специалист ушиву. Хъунмасса хIаллай ва ивкIун ур аьрщи зузи даврил ва ххяххияртту хьун даврил методикалул советрал председательнугу. Ва каялувчину ивкIсса цIу бусса аьрщарай чIирисса чIумул мутталий лазундарал бакIлахъия ххяххан даврицIун дархIусса хъиривлаявурттахлу буллуну бур авторшиврул свидетельство. Ванал кIунттила дурккун дур 160-нния лирчусса элмийсса давур­тту, цирдагу шяраваллил хозяйствалул аралуву личIи-личIисса кIанттурдай тIайлабацIу буну ишла дуллалисса.
Цала институтран 60 шин хъанахъаврицIун бавхIуну, Аьбдуллагь Оьмаровлул хIарачат­райну итабавкьуну бур «Достижения науки –сельскохозяйственному производству» тIисса лу.
Ца-кIира шинал хьхьичI був­ккун бур дунияллийн Аьбдуллагьлул цала буттал шяраваллил тарихран хас бувсса, хъирив нанисса никиран ххуйсса хъусну лякъинсса жужгу.

Цала оьрмулул дус Саратлущал цачIу нахIуну-хIалалну яхъанайгу хьуну дур 63 шин. Машаллагь! Вайннал дянив бивзун бур мукьва оьрчI – шанма душ ва ца арс. Ниттин ва буттан духIангу багьну бур чIун дакъанура бивкIулул хьусса кIива душнил дард-хажалатгу.

Амма, ци ккавккун, ци бухIан багьнугу, ччинал дахIалай чинну оьрмугу бувтун, вай гьант­рай цIуллуну-сагъну Аьбдуллагь хьунадакьлай ур оьрмулул 90 шин. ЧIа учинну жувагу ванан вания тиннай итадаркьусса шиннардийгу цIуллушиву, ххуй-хъиншиву! Ябаннав Заннал вин Саратгу, Саратлун инагу!