Июньдалул 28-нний Дагъусттаннал БакIчи Владимир Васильев хьунаавкьунни Аьрасатнал Федерациялийсса Ираннал Ислам Республикалул вакил Магьди Санаищал ва мунацIух архIал бивзминнащал.
Владимир Васильевлул бусравсса хъамаличунахь барча кунни мунан ДГУ-рал хIурмат лавайсса профессорнал цIа дулаву. Мунил хъуннасса мяъна дуссар увкунни В. Васильевлул, цанчирча Дагъусттаннал университет хIала-гьурттуну зий буну тIий Ираннал Ислам Республикалул вузирдащал.
Дагъусттаннал БакIчинал бувсунни мукунма ДГУ-лул филологиялул факультетрачIа парснал хъунасса шаэр ХIапиз Ширазлул гьайкал тIитIлай бушиву. Ираннал чулухагу хIукму хьуну бур Дагъусттаннал цIа дурксса шаэр Расул ХIамзатовлул гьайкал Ираннал вузрачIа дацIан дуван.
Владимир Васильевлул бувсунни кIива чулухаллил машлул арардал хъунисса ялун чIалачIисса каширду душиву. ЦIанасса ппурттувугу ххуйсса арарду дур шяраваллил хозяйствалувусса, промышленностьравусса, логистикалул комплексравусса иширттал. Хъуннасса хIала-гьурттушиву дур мукунна АПК-лул аралувугу: гьашину Дагъусттаннал ризкьичитурал Ираннан дарххуну дур 900 тонна яттил дикIул.
Владимир Васильевлул сукку бунни Дагъусттаннал ва Ираннал дянив тIайланнасса авиадахIаврил рейсру тIитIаврил ва хьхьирил туризмалул аралуву хIала-гьурттуну зузаврил масъалартту.
Хъирив ихтилат буллай, Магьди Санаил бувсунни махъсса ппурттуву Дагъусттаннал ва Ираннал дянивсса арарду гьарта-гьарза хъанай душиву. «Ттул умуд бур жулла дянив хьхьичIуннайгу машлул ва экономикалул арарду гьарта дуван бюхъаншиврийн», — увкунни Ираннал вакилнал.
Мунал мукунма бувсунни Ираннал инвестортуран тамансса хъиншивуртту хьунтIий душиву, МахIачкъалаллал портрал даврил лябукку хьурча. «Аьмну лавсун, Дагъусттаннал хъунмасса кIану бугьлай бур Ираннал ва Аьрасатнал дянивсса дахху-ласулул иширттаву – сайки 30%. Агарда жува цIакь барча хьхьирийх ва хьхьирийх заназаврил бутIри, му процент тамансса лахъ хьунссия» — увкунни мунал.
Магьди Санаил бувсунни Дагъусттаннай Ираннал хъус-хъиншиву даххан дишайсса машлул къатта дузал буван аьркинну бушиву. Мукунсса къатта бувну бур Аьшттарханнайгу, тиккугу зий бур Ираннал чIявусса инвестортал.
«Жу хIадурссару зущал хIала-гьурттуну зун. Зул пикри-зикрирдах жу вичIи дишарду, жу ми ххал бигьинну ва ца пикрилийн бучIанну», — увкунни Дагъусттаннал БакIчинал.
ХIадур бувссар
ХI. Аьдиловлул
