[dropcap]З[/dropcap]унттавусса гъинтнил кьинилул дахьа бургъил цила кару тIабиаьтрайх дирчуну, га ххира дуллалисса кIюрх. Гьавагу марцIсса , урттугу личIи-личIисса кьункьардил янхьа тIисса чIун.

Укун­сса кьини, «Илчи» кказитрал маслихIатрайн бувну,ттула хъув бувгьусса нувщул къатIрайн гипс зурзу бан лавгун, на шавайн най уссияв.Гипсрал колорадуллал гъангъаратIив лихъан бай­сса бусса бур.ЧIаланссар. Жул Вихьуллал шяраваллил баргъбуккавал чулий буссар шяравалу ххуйну чIалачIисса лахъ ба­къасса ТтуккулбархI тIисса кIану. Шиккун ияйхту на шяраваллих зиярат буван, чан-кьансса хияллахьхьунгу ххуллу итабакьин, ца кувссал лахърулий щяивкIссияв. ЧувчIав ттуруллул касакгу бакъая. Лахъзунттурдугу ликкавай бия кIяла «яннарду». ЧIал къавхьуну аьсавращалсса ца хъунбавагу дуркIун, ттул чIарав щядиркIуна. Вагу, на кунна, цила оьрчIсса шинну дакIнийн дичин дуркIун духьунссия.

На зухь тIайланма тIий ура, зунттавусса гьава — му чур­ххан хъинну дарувсса гьава бур. Хъуннабавангу кIулну бия му мукун бушиву. Жу жула-жула пикрирдаву буссияв.Ихтилат ссаячIав къавхьуна. Амма цакуну ца аьжаивсса, нажагь бакъа къабаяйсса, лелуххул чIу баллан бивкIуна. Яла га лелуххи чув бурив ххал буллай жу лагма буруглан бивкIссияв. «Ванахха на шиккува» тIий, бувкIун, жучIату арх бакъасса уркъутул къатIуйгу щябивкIун, цила чIурду буллан бивкIуна. Ххал барча, лахъисса, авурсса магъгу дусса вяркъу бия га. Жул кIинналагу дакIру ганил хъиннура тирх учин дуруна.На яла шавайн лавгссияв…

Цаппара гьантрал хьхьичI ттучIан — жула Лакку билаят­рал тIабиаьтрах ябитан, зун­ттурду ххал бан, увкIун ия Дарбантлия мукьа хъамаличу. Къалавгун бия гай Ахттиял, Рутуллал, яруссанналми районнайн. БувкIун бия жучIанма. Ванил тIиссар жучIара дуссар хъинну исвагьисса, яру батIин къашай­сса тIабиаьт.

Инсаннан чара бакъа, мудан лякьлулсса къабуллай, дакIнилссагу дузал буллан багьлан бикIай. Ца кьадиртун, гамур дуллан аьркинссар тIиссагу цучIав акъахьувкун, булухьхьияра зунттавун бигьалагаван.