КIундиннал шяравасса ЦIаххаев Мирзабуттал ахир-минану хьун нясивну диркIун дур
Краснодардал крайрайсса Славянскаллал райондалийсса Прикубанский тIисса мащи (хутор), тиккусса уссушиврийсса гьав.
«Дяъвилий ивкIусса махъа-махъсса саллатI къаувччуссаксса дяъви къуртал къавхьуссар» тIисса, ччянива оьруснал полководец Суворовлул увкусса мукъурттил мяъна хIакьинугу лагь къархьунни. ЧIявур уттигу бакIрачIан бувкIмур къакIулсса, ялун гьансса гьаврагу чув хьуссарив къакIулсса вирттаврал цIарду. Бюхттулсса Ххувшаву ларсъсса чIун цуксса арх хъанай дурив, мукссава чIиви личIлай бур ятIа-тIар бакъаминнаясса хавар баянссар тIисса хьул-умудгу. Амма баллайнма бур уттигу вирттавраясса хаварду, ляхълай бур ми бувччусса кIанттурду.
Бадрижамал Аьлиева
Ца мукунсса ххарисса хавар бивунни уттигъанну КIундиннал шяраваллил жяматрал ялунгу – лявкъунни ва шяравасса ЦIаххаев Мирзабутта ЦIаххуйл арс увччусса кIану. Мунал ахир-минану хьун нясивну диркIун дур Краснодардал крайрайсса Славянскаллал райондалийсса Прикубанский тIисса мащи (хутор), тиккусса уссушиврийсса гьав.
Увну ур Мирзабутта 1906-ку шинал. Дяъвилийн увцуну ур сентябрьданул 15-нний 1941 шинал, яла акъа хьуну ур 1943-ку шинал октябрьданий. Гихунмай Мирзабуттал бакIрачIан ци бувкIссарив кIулну бивкIун бакъар.
Паспортрай ванал фамилиялий кIива «х», цIаний кIива «т» бусса бур. ЛичIи-личIисса вариантирттай ванал цIа-бакI чичлай, интернетраву ххал дуллай, ахиргу уттигъанну бакIрайн дагьну дур «Цыхаев Мирза Бушна» тIисса чичру. ТIайла дацIлай диркIун дур увсса чIун, аьрайн увцусса чIун, Лакрал райвоенкоматрал цIа, кулпат Жариятлул цIа. Так цалла цIа-бакI ва шяраваллил цIа («Кунды» чичиннин, «Кунудья» чивчуну) дяйкьуну чирчуну диркIун дур. Хъирив лаллай, кIул хьуну бур Мирзабутта увччуну ушиву ялув кIицI бувсса кIанттай.
157-мур битултрал бригадалул командованиялул донесениялий укун чивчуну бур: «Цыхаев Мирза Бушна, 1906 года рождения, призванный Лакским райвоенкоматом, уроженец с. Кунудья Лакского района Даг.ССР, супруга Жарият Абачараевна, погиб 29 апреля 1943 года и похоронен в братской могиле в хуторе Прикубанский Славянского района Краснодарского края вместе с 238 воинами 157 стрелковой бригады, погибшими за 10 дней, с 20 апреля по 1 мая 1943 года».
Ва давривух акъагу, цала жяматрал дянивсса агьамсса иширттавух мудангу чялишну гьуртту шайсса Низами Умаров буслай ур:
— Мукун, чIявусса чагъарду, документру ххал буллай, мяйжан бан бювхъунни Мирзабуттал бакIрачIан бувкIмур. Оьвкуну тихун администрациялийн, тайннал кумаг бунни аьркинмур щаллу дуван. Жу шиха тихун бияннин чарийсса ва цайми кIанттурдайсса цIагу тIайлану чирчуну дия. Тихун оьвкуну, бувсъссия жува бучIан ччай бушиву та цува ивкIусса кьини – апрельданул 29-нний. Каспийск шагьрулул аьрали комиссарну зузисса жула шяравачу Кьурбанов Геннадийл чивчуна тихун военкоматрайнсса чагъаргу, шайсса ка-кумаг бувара тIисса.
Яла лавгру жу тихун: на, Мирзабуттал чIивима арс Ибрян, Мирзабуттал ххюя оьрчIал оьрчI, КIундиннал шяраваллил имам АьлиасхIаб. Пятигорскалий жул хьхьичIун бувккуна Мирзабуттал арс ЦIаххуй (та тикку ялапар хъанай уссар) ва Москавлия увкIсса мунал арс Мурад цалама арснащал. Чаргаснавугу (Черкесскалий) жул хьхьичIун увккуна ва гихунай жущал авчуна Мирзабуттал ссил оьрчI Агаров Аьбдулгу. Цинявппагу жу 13 инсан хьунав.
Тийх жу хьунабавкьунну багьайсса куццуй. Чара бакъа кIицI лаган ччива Семко Александр Григорьевич – кIанттул администрациялул бакIчи, Белоус Ирина Николаевна – аьрали учетралсса буллалисса инсан. Жу бияннин миннал гьарца аьркинмунилсса бувну бия. Уссушиврийсса гьав цурдагу дия школалул аьрщарай, хъинну ххуйсса кIанай, уртту-тIутIавун, щюллишиврувунгу дахьларгун, дуклаки оьрчIал хъуннасса аякьалийн ларсун. Махъми ялун бияннин (жу тихун ччяни кIюрххил бивунав), жу багьайсса кьулгьу-кьуран буккарду. Ссят 10 хьуну бувкIуна ялун махъмигу: кIанттул администрация, Ветерантурал советрал хъунмур, тIутIал кацIурдищалсса дуклаки оьрчIру ва м.ц.. Цинявппагу бавтIун, уссушиврийсса гьаттачIа дуруна митинг. Та гьаттаву увччуну усса ия 580 инсан, тайннавух – жула шяравасса Мирзабуттагу. Махъру лавхъуна ЦIаххуйл, Мирзабуттал хъунама арснал Нуруллагьлул оьрчIал Абачарал, АьлиасхIаблул.
Хъин-хъинсса махъру лавхъуна тиччаллил администрациялул хъунаманал, музейрал, клубрал хъуниминнал, кIанттул хъунисриннал. Дуклаки оьрчIал дурккуна дяъвилиясса назмурду. Администрациялул чулуха бия тIутIал хъунмасса кацI, шиха жухьгу буссия тIутIал шалкарду. Цинявппагу хIалану дишарду гьаттацI тIутIив. Лаккуя, КIундия ларсъссия тихун аьрщарал ххяппа, тихасса аьрщигу ласарду КIундив дичин.
ШколалучIа бия аьрали музей, жуйн оьвкуна му ххал бувангу. Тайннал тавакъюрайн бувну, тиву дишин Мирзабуттал суратгу, ванал оьрмулиясса чичрурдугу, дяъвилул чагъардугу буларду. Бувцунну кIанттул клубравунгу, мивугу бия чIиви-кьивисса музей. Бия цамур хъунмасса музейгу, мивун хъинну чIярусса экспонатру дартIун дия дяъвилул иширттацIун дархIусса.
КIира-шанна хутор цачIун дурсса, миннувух Прикубанскийгу, администрациягу бусса Анастасиевский тIисса хъуннасса шяравалу дия, миккугу дия хъуннасса уссушиврийсса гьав – 800-лийсса инсантал бувччусса.
Шагьрулувух жун экскурсиягу бувна. Хъинну марцIсса кIану бия, лагмарасса хъуру гъайкуну, дургьуну дия, ххуллуцIух чIярусса щюллишиву, мурхьру бия, кутIану учин, чIалай бия аьрщарал заллу ушиву.
Муния махъ бавтIун ца кафелувун, хъунмасса кулпат кунма, щябивкIру, буварду гихунмайсса ихтилатругу, дуларду кувннахьхьун кувннал телефонну. Жулла чулухасса бахшишран кIяласса къутта-кьяпагу, варсигу, ххаржангу кьаритарду. Мигу гара цIана цала музейраву дирхьуна тайннал. Бувсуна жу тихун бучIаврин хас бувсса мурцIугу бувантIишиву музейраву. Зана хьуру ххишала бакъа рязийну.
Низамил ялагу бувсунни Лаккуй, КIундив, Мирзабуттан цIа куну ччянива бацIан бувсса кIалабарз бушиву, ятIа-тIар бакъа акъа хьушивугу чивчусса. Утти хIадур дурну дусса дур кIикку рищунсса цамур ула, дяъвилийн увцусса ва ивкIусса чIун, увччусса кIанугу ккаккан бувну. Му давугу дувантIий бур Зумаритавал кьинилул хъиривра, шяраваллил агьлу ва хъамалгу бавтIун, мавлидгу дурну.
Мирзабуттал ва Жариятлул дянив хьуну ивкIун ур 3 арс: хъуна-хъунама – Нуруллагь, 1934 шинал увсса (аьпалул хьуну ур 2010 шинал), хъирив – ЦIаххуй (1937 ш.) ва Ибрян (1940 ш).
Мирзабутта дяъвилийн лавгун махъ муная я чагъар, я цамур тIар-хавар къабукIлай, ялун дирсса дардирдал къашавай хьуну, 1944-ку шинал Жариятгу бивкIуну бур, шамагу оьрчIгу ятинну ливчIун ур. Ми Мирзабуттал хъунама уссил ЦIаххуйхъал МахIаммадлул цачIанма бувцуну, цала ххювагу оьрчIащал архIал хъуни бувну бур. Ибрян ялапар хъанай ур Шамхаллай, ЦIаххуй – Пятигорскалий, вайннал бур ххаллилсса оьрчIру, миннал ирс.
Укун арулцIаллахъул шинну хьуну махъгу букIлай бур Хъун дяъвилул майданнаясса тIарду, зунттал арсурвавраясса, виричусса талаталтраясса хаварду. Вайннан бивкIу бакъассар, вайннал цIарду зумух ласласисса, вай дакIнийсса инсантал буссаксса.
