Спорт – дакьаврил вакилли

[dropcap]М[/dropcap]ай зурул 27-нний Каспийскаллал «Энергетикалул колледж­рал» актовый залдануву хьунни «Спорт – дакьаврил вакилли» тIисса викторина. Микку гьуртту хьунни му колледжрал ва Машиностроениялул колледжрал студентътал.

Имара Саидова
Бусравсса хъамаллуравух мероприятиялийн бувкIун бия Каспийск шагьрулул округрал хъунаманал хъиривчу Руслан МахIмудов, лачIун буккаврил спортрал дунияллул чемпион Насруллагь Аьбдуллаев, ДР-лул Спортрал министерствалул ДЮСШ-рал директор Жабраил Минкаилов, боксрал СДЮШОР-рал директор, ДР-лул боксрал спортрал федерациялул директорнал бигарду биттур буллали­сса Аслан Пенжалиев, Дагъус­ттаннал боксрал федерациялул президент, Каспийск шагьрулул мажлисрал депутат Зайнулаьбид Абакаров, хIала-ккаласса данди буккавурттал спортрал дунияллул чемпион, МахIачкъала шагьрулул мажлисрал депутат Жамалуттин Кудаев ва цаймигу.
Гьуртту хъанахъими ва хъамал хьунабакьлакьисса ихтилат бунни жагьилтурал центрданул каялувчи Сайгид Жамалуттиновлул.

Викториналул бяст-ччаллал низамрая бувсуна ва тIуркIурду байбивхьуна Дагъусттаннал дакьаврил фондрал председатель Мухтар Давудовлул.
— Бакъахьунссар дагъусттаннал жагьилтал гьуртту къавхьу­сса, хьхьичIунсса кIантту къабувгьусса спортрал цавагу жура. Гьарца шинал щалагу дунияллий дуллай бур цикссагу журалул спортрал хьунабакьавуртту, спартакиадартту, дусшиврул ва дакьаврил девизрай. Кьянкьану учин бюхъанссар спортрал жула инсантурал дянивсса дусшиву хъиннура цIакь дуллали­ссар куну. Спорт – му дунияллул инсантал цачIун буллалисса вакилли, — увкунни ванал.

Дагъусттаннал машгьур­сса спортсментурал бувсунни спорт­рал лаваймур шачIану лахъан цалва бувсса захIматрая ва бунни оьрчIан гихунмай­сса оьрмулуву бучIи лякъинсса маслихIатру.

Яла дайдирхьуна викторина. Цалчинсса кIану бувгьунни Энергетикалул колледжрал студентътурал, кIилчинмур – Машиностроениялул колледжрал студентътурал.
Мухтар Давудовлул хьхьи­чIунсса кIантту бувгьусса командарттан буллунни Аьрасатнал дакьаврил фондрал чулухасса дипломру ва арцуйнусса бахшишру. Мукунма барчаллагьру баян бунни Энергетикалул колледжрал директор Аслан Хаппалаевлуйн ва Машиностроениялул колледжрал директор МахIаммадрасул Муслимовлуйн.