[dropcap]В[/dropcap]анияр ца-кIира шинал хьхьичI дунияллийн був­ккунни Уручуллал шяраваллил тарихран хас бувсса «Село Уллучара» («Уручуллал шяравалу») тIисса лу.

Му лу­ттирал авторталну бур цаннаяр ца ххаллил­сса, чантI увкусса инсантал, Уручуллал жяматрал лайкьсса арсру – математик, профессор ХIажи МахIаммадов («Польский доктор») ва гьунар ххисса филолог Чупан Чупанов. Лу цуппагу чивчуну бур оьрус мазрай.

Уручуллал щарния вайннал чивчуну бур, шярал хавардугу арх бувну, хIуркI чин бан къашайсса хIуччардайн чул бивщу­сса хъинну лайкьсса тарихий­сса очерк. Му лу бувккуну махъ ттун ччан бивкIунни мунивасса цаппара зат­ру ттухьвагу, зухьгу аьлтту бан. БикIувча оьрус­ная лаккунайн бувцусса кунма­сса иш хьуну.

Революция хьуннин Уручрав бивкIун бур 201 къатта. Жула чIявуми лак кунма, уручу­лгу хIалтIилухун заназисса агьлу бивкIун бур. Ца ппурттуву Пермь шагьрулийгума уручуллал бивкIун бур 80 къатта.
Къалайчи Рамазан (ЧIиви Разу) ивкIун ур хъинну канил махшил бусса инсан. Шяраву гьарахъал­тту мунал дурну дур, хьхьичIва-хьхьичI нувщигу Уручрав мунал бучIан бувну бур, хIатта цалла дурсса лисапIитIрай бигьлангума икIайсса ивкIун ур.
Уручуллал мадарасса чиваркI ссуннатчишиву дуллалиссагу бивкIун бур. Мунилшиврий ми лагайсса бивкIун бур Азирбижаннайн бияннингума.
Жунма кIулсса куццуй, Да­гъусттан ханхъуслил мяъданнал чулуха къаавадансса кIантту бур. Амма 1933-ку шинал Уручуллал аьрщарай лявкъуну бивкIссар хъуручIул мяъдан. Тикку сакин дурнугу диркIссар хъуручI буккаврил давуртту. Та шахталул каялувчину ивкIун ур жува гъалгъа тIисса луттирал цалчинма авторнал ппу – Аьвдулкьадир МахIаммадов. Зун­ттавусса халкьуннан та шахталул биялсса хъуручI буллай бивкIун бур — шинай дянивну 300-500 тонна.

ТIантIиял шяравату арх ба­къа, Лявзунтту тIисса кIанай, жул, Къяннал, колхозрал ферма дикIайссия. Ттун дакIний бур кIи­ккугу, цаппара кIанттурдай, ялунма чIалай бикIайва хъуручI. Тичча цанма ишла буллан хъуручI буккан байссия жул шяравату­сса муххал усттар, аьпа­биву, Тажу­ттиннул.
1948-ку шинал Уручрав увкIсса Маркшейдер тIисса инженернащал архIал шахталувун лавгун унува, махъунай ­уккан къабювхъуну, Аьвдулкьадир шахталувува ливчIун ур. Анжагъ ряххилчинмур кьини водолазтурал костюмирттаву шахталувун бувхминнан ляркъуну дур Аьвдулкьадирдул жаназа. Хъинну аьсивсса кьадар бувкIун бур мунал бакIрачIан.
1958-ку шинал тиккусса хъуручI буклакавугу кьадиртун дур, аьрщигу зана дурну дур колхозра­хьхьун. Та шахталул вари чинсса хайр Уручуллал жямат­ран биян бувнугу бакъар.
Та чIумалва дуккаврихун, кка­лаккаврихун багьсса агьлу бивкIун бур Уручуллал агьлу. Миннал дянивату був­ккун бур ххуй-ххуйсса муаьллимтал. Уручрав дук­лай ивкIун ур щайх Ахъушиял Аьли-хIажигу. Цайми щархъава­сса мюталимталгу бучIайсса бивкIун бур тиккун. 1905-1907-кусса шинал тикку ккалай ивкIун ур хIатта Гьарун Саэдовгума.
ХIасил, къачансса бивкIун бур Уручуллал шяраву аьраб­райсса кIулшиву ларсъсса инсантал. Польский ХIажинал ппу Аьвдулкьадир МахIаммадовлул бувккуну бивкIун бур Кьукнивсса ХIажи-Муса-хIажинал мадраса. Мунал ларсун диркIун дур ларайсса аьраб­райсса кIулшиву.
Зувилку шиннардия тIайла хьуну, Уручрав зий бивкIун бур оьрус учительталгу: Петр Астратов, Анна Унурченко, Александр Коваленко, Екатерина Тимченко, Михаил Рыбалченко, Мария Ештокина. Миннавасса кIива – Нина Чулкова ва Тамара Упырева, уручра-оьрчIангу щар хьуну, тиккува миналул хьуну бивкIун (кIивагу аьпалухьхьун лавгун бур).
Ахъушиял райондалий кIилчин­ма элмурдал докторну хьуссар жува ихтилат буллалисса луттирал автор ХIажи МахIаммадов. Цалчинсса докторну хьуну ивкIссар Дагъус­ттаннай ца яла цIанихма тарихчинан хIисавсса, Шявшиял шяравату­сса Расул МахIаммадов.
Вава Польский ХIажинал чIавама уссу Зайнуттингу цIа дурк­сса аьлимчури, цувагу чIя­русса шиннардий зийгу, ялапар хъанайгу ур Москавлив.
Ахъушиял райондалий цалчинсса ларайсса кIулшиву ларсъсса хIакин-хъамитайпану хьуну бур Уручратусса Хамис Аьлиева. Мунил 1942 шинал къуртал бувну бур мединститут. Ахъушиял райондалул азарханалий хъунмур хIакинну зийгу дурну дур диял­сса шинну.
Учин бучIир, дуккавриву хьхьичIун ливчусса, итххявхсса уручуллая эбрат ласлай, лагма-ялттусса даргиял щархъал инсанталгума кIулшиву ласаврил ххуллийн буккан хIарачат буллай бивкIун бур куну.
Медициналул элмурдал доктор, Аьрасатнал лайкь хьусса ревматолог, Нажмуттин Каллаевлул нину Уручратуссар, ппу Бархъаратуссар.
Луттирал автортурал бувсун бур цалла шяраваллицIун бавхIусса тамаша бизансса ишир­ттаятугу, хIатта кьиссагума чичин бучIисса. Масала, Гьуйннал шяравату Уручрав щар хьуну бивкIсса, Уручуллал цалчин­сса изба-читалнялул хъунмурнугу зий бивкIсса, СалихIат тIисса хъамитайпалул оьрмулул кьадар, драма, бавну, хъамабитан­сса бакъар.
Республикалулгу, Аьрасатналгу лагрулий, ттинин кIицI лавгми къахIисавну, ялагу чан­сса ба­къар Уручуллал шяраваллил цIа чивух машгьур дурсса лайкьсса арсру, душру.
ЯтIул партизантуравух Совет хIукуматрахлу талай ивкIун ур 18 уручрачу.
КIулну бур 1904-1905-ку шиннардийсса Аьрасатнал Японнащалсса дяъвилийгу талай ивкIшиву Уручратусса Рамазан тIисса чув (ЧIев-Разу).
Хъун дяъвилул хьхьичIсса шиннардий виваллил ишир­ттал даврий хIаписарталну къуллугъ буллай бивкIун бур Расул МахIмудов, БахIмуд Буттаев, Апанни Оьма­ров. ХIакьинугу мура аралуву хIаписартурал чиннавусса уручул биялсса бур: Нураттин Амирханов (къуллугъ кьабивтсса подполковник), ванала арс Вагьаб, Аьли Султанов (майор), ШихмахIаммад МахIаммадов (полковник), ХIа­жимурад Кьадиев (полковник), Насруллагь Оьма­ров (подполковник), ХIасанбаг ЧимахIаммадов (майор), Ссапижат Дибирова (майор), Арслангарей Айгубов (майор), Зулпукьар Оьмаров (капитан) ва м.ц.
Лап ккалли бансса, мюнпатиран лаласунсса бур, хъинну мюршну, аьщуй-ххуттай бав­цIуну, автортурал цала шяраваллил личIи-личIисса аьдатир­ттая, эбадатирттая, дукрардая бусласисса бутIагу. ЦIа диркIун дур Уручуллал дукьрахIанттил. Польский ХIажигу, мунал ххаллилсса кулпат Розагу (Карашатусса) ттул ниттиуссил чIаххуврай яхъанай бикIайссия. Ца чIумал ттунгу бах­тти хьу­ссар миннал дурсса ххаллилсса дукьрахIан хIачIан.
Цал уттигу тикрал бан, хъинну бунияласса хIуччардайн чулгу бивщуну, Аьвдулкьадирдул арс ХIажинаща ва Кьадинал арс Чупаннуща бювхъуну бур бакIуйн буккан бан гьарца чулуха шавхьсса, бювхъусса лу.
Ттуна ччянива кIулсса ва дакIнил лавсъсса ХIажинан хас дурну, чичав на ва хъун дакъа­сса назмугу.

Ина ура, ХIажий,
Чув хIакьсса зунттал,
Чурххалгу оьвхъусса,
Даврилгу лайкьсса.

Доктор Польшанаву
Хьун бювхъуну тIий,
«Польский ХIажи» тIисса
Дур ларчIун цIагу.

Мазгу вин польшанал
Лавхьхьуна лайкьну,
Лахьлан мазру чилми
Ура усттаргу.

Математикалул,
Агь, кIулну элму,
Ккалли адабият
Агь, дара хъинну.

Тарих Дагъусттаннал
КIул куртIну буллай.
Агь, ца тарихчину
ИкIара чIалай.

Гьан чIарах дучIимур
Гьич къаритара,
КуртIнивун оьрмулул
Ухлан икIара.

Инсантал бювхъуми
Вин ххирар хъинну,
Бан хъинбала хъиннан
Къашара чIалгу.
Мазяйхъал Казбек