Ахъушиял райондалул бакIчинал хъиривчуну зий бур жула лакку душ

Жунма кIулссар жула чIаххуврайсса даргиял миллатрал дянив зий-занай, яхIирай оьрму бутлай, лакрал цIа лайкьну ядуллай бушиву мукьра лакрал шяраваллил – Бархъаллал,Уручуллал, ЦIуликъяннал ва Хъюллал жямат. 
Сайки ряхра шинай Ахъушиял райондалул бакIчинал хъиривчуну зий бур жула лакку душ, Бархъаллал шяравасса Эльвира ХIасанхIусайнова.
Райондалий хъанахъисса чIярусса ххаллилсса давурттал сиптачину хьусса ва хIакьинусса кьинигу хъуннасса хъар лархъун зузисса Эльвира бусравну бур райондалул каялувшиндаран ва жяматран. ХIакьинусса «Илчи» кказитрал редакциялул хъамаличу вари.

---

— Эльвирай, буси инава бартбигьлагьисса ккалли бансса иширттая.

— Цинявннуя буслан къахьунссар, кIицI банна ца-кIива.
Ттула биялалийсса жагьилтурал политикалул даврицIун бавхIуну, хIакьину чIявучил зума-мазрайсса Чиндерчеро тIисса базалий буварду жагьилсса лидертурал шанма форум – цал республикалул, яла – Ухссавнил Ккавкказуллал, яла – щалагу Аьрасатнал даражалийсса. Ялагу кIицI лаган ччива ттула сипталий байбивхьусса ва аьдатравун багьсса студентътурал форумгу. Гьарца шинах жу батIайссар Ахъушиял райондалул школардал выпускниктал ва МахIачкъалалив ялапар хъанахъисса райондалиясса студентътал, лавайсса кьиматир­ттай школа ва ВУЗ къуртал був­сса, жяматийсса иширттаву чялишсса, миннан дайссар ххуй­сса бахшишру.

Экологиялул шинну баян бувсса 2017 шинал дарду экологиялул форум, хьунабакьавур­тту, субботникру ва цаймигу мюнпатсса давуртту.
Миннул хъирив Уссищиял вацIлуву хьуссия личIи-личIисса министерстварттал ва организациярдал вакилталгу гьур­тту хьусса хъунмасса мажлис, экологиялул министрнал хъиривчугу хIаласса. Мукунна, Хъаннил советрал председатель хIисаврайгу, хъунмасса захIмат бишав райондалий хъаннил суккушинна цIу дуккан дан. Хъаннил бияла хъунмасса бушиву чIалай, гьарица шяраваллаву сакин барду хъаннил совет­ру. Нирхиравун рутав хъуними классирттаву дуклакисса душваращалсса даву, социал къуллугъирттал хъуниминнащалсса хьунабакьавуртту.

— Буссарив Ахъушиял райондалий газ?
— Ахъушав бияннинсса шяраваллавугу, Ахъушавгу газ буссар. Ахъушату гихуннайми шяраваллавун ттигу бувар буцин. Цаппара шиннардил хьхьичI инвесторнащал икьрал дурну дуссия. Ци захIматшивуртту хьунадаркьу­ссарив, цахъи лахъи лаган бунни му масъала. Ца зурул хьхьичIгу мунил хIакъираву райондалул бакIчи хьунаавкьунни инвесторнащал. Шинал лажиндарай щаллу бан куну буссар.

Лакрал щархъая тIурчарив, Бархъаллал шяравун бургъу биявай буссар, ЦIуликъяннал шяравун бивну буссар, так шяравух разводка дан лирчIун дур.
— Ци дуллалиссар райондалийн туристал кIункIу баву мурадрай.
— На дакI дарцIуну бура туризм хьхьичIуннай дансса циняв шартIру жучIара душиврий.
Бюхттулсса зунттурду, ратIру, рахIру, жюружантту, ттарлил хIалурду…

ТIабиаьтрал караматшивуртту дакъассагу, жул райондалий дур туристуран даши дизансса сянатругу. Цайми районну ца-ца сянатрайну машгьурну духьурча, жучIа ми чIярусса дур. Ласунну, мийра жула Бархъаллал тIахIунтту, ягу ХIабиб НурмахIаммадовлул хъиннура сий гьаз дурсса къутта кьяпри, ппалул жуларду (джурабы) къувлул каршив. Мукунна Къайтагъуллалмуниха лав­хьхьусса ХIапшиял гулавати, цайминначIа щичIакIуй ба­къасса Уссищиял гулавати.

Ши­ккува кIицI бан, Уссищиял гулавати бухлагангу бюхъайссар. ЦIана ва гулавати щащайсса усттартал бакъар, ца нину ва душ личIаннин. Мунияту пикри бу­ссар школалий му сянат душваран лахьхьин дуллансса кружок тIитIин.
— Цаппара шиннардил хьхьичI, Бархъаллал шяравун букIлакIисса туристуран шартIру дузал даву мурадрай, шяраву гостиница бансса пикри буслай уссия Бархъаратусса ишбажаранчи Расул Кьаландаров.

— Расул Якьубовичлущал икьрал чирчуну дуссар Бархъалав этнокультуралул центр бан­сса. Каркас бувну буссар. Гихуннайсса давуртту дулланссар райондалул цIусса бакIчинащалгу маслихIат ккавккун.

— Аьмну мукьрагу лак­рал шяраву цими инсан ухьунссар?
— Статистикалийн бувну, кIиазаруннийн бивсса бур.
— Вайми зунттал районнай куннасса, шяраваллурду дачIра дуклакисса тагьар зучIагу дурив?
— Дур ххину-чанну жучIагу му тагьар. Амма дакI ххари дуллай дур шяраваллаву цIу-цIусса къатри дуллалаврил, шяраваллу цIудуклакаврил. Бур шяраваллавун кIура баен ччиссагу.
Дуссар жучIа инсантал бувагу шагьрулийн къабизлазисса Тебекмащиял шяравалугу. Ларгсса шинал шикку цалчинми классирттаву 80 дуклаки оьрчI ия. Хъуни-хъунисса цIу-цIусса къатри дуллай, шяравалу уттара дурккун дуссар.

Ларгсса шинал цинявппагу шяравуминнал ва личIи-личIисса шагьрурдай ялапар хъанахъиминнал арцу рартIун шяравусса кIичIирттавух цемент бавкьунни. Тебекмащилий кьяпри буруххайссар. Сезон дусса чIумал ми баххан лагайссар, яла махъунмай зана шайссар. КIира-шанна шин хьунни шяравун газ бувцуну. Амма газ буциннингу шярава ливхъун нанисса цучIав акъая. Лакралми шяраваллава, цуксса хIайпнугу, бизлай бур. Школардай оьрчIру лапва чанну бур. Ци чулийгу, аьм­сса тагьар хIисавравун ларсун, зун­ттал районнал бучIантIимур нигь рутлатисса бакъашиврий дакI дарцIуну бура.

— Цими школа бур Ахъушиял райондалий? Циксса дуклаки оьрчIру бур? Бурив гьашину школа мусил медальданий къуртал буллалисса оьрчIру? Бурив миннавух лак?
— Байбихьулул школардугу хIисавну, Ахъушиял райондалий 53 школа бур. Райондалул центрданий, лагмасса мащивгу хIисавну, 6-7 школа буссар. Лак­рал щархъаву так Бархъарав бур 11 класс. Вайми шяраваллаву 9 класс буссар. Ахъушиял 1-мур школалул директорну уссар ла­ккучу – Уручуллал шяраватусса Имраннул арс МутIалим. Цала даву лавайсса даражалий дуллалисса ххаллилсса каялувчи ур.
Школа медальданий къуртал буллалисса оьрчIру жучIа гьарица шинах бикIайссар. Гьашину мукунсса 27 оьрчI уссар, цинявннал ласунсса-къаласунсса къакIулли, ЕГЭ-дал баллах ялугьлай буру.

— Дихьлахьиссарив ла­кку мазрал дарсру лакрал шяраваллавусса школардай?
— Дихьлахьиссар.
— Эльвирай, хьхьичIва хьусса ихтилатраву ина увкуна «ТIайлашиврул ххуллу» («Путь истины») тIисса райондалул кказитрай лакку мазрайссагу ца лажиннарагу рищаван ккаккан дурну дуссар куну.

Ци сававнур му къадуклакисса?
— Цаппара шиннардил хьхьичI, кказитрал устав баххана бувну, жу хIукму бувссия зуруй цал (кказит нюжмардий цал буклакиссар) лакку мазрайсса лажинтгу итадакьлан кусса. На цимилагу тавакъю бав жула лак­рал шяраваллал агьалинахь – администратортурахь, учительтурахь, библиотекарттал, культуралул зузалтрахь макьалартту гьан дуллали куну. Амма цалсса му иш щаллу хъанай бакъар.

— Лакралми районнащал цукунсса дахIавуртту, хIала-гьурттушиву ду­ссар зул?
— Лакрал ва УнцIукIуллал районнал школарттащал жул хьуссар уссушиврийсса акцияртту. Ва проектрал лагрулий, цала-цала дукрардащал, миллатирттал лаххиялуву, кувнначIан кув хъамалу лавгссар Самамащиял ва ГьунчIукьатIрал школарттал дуклаки оьрчIру. КIира нюжмардий ГьунчIукьатIатусса оьрчI ивкIссар ялапар хъанай жучIа, жулма кIайнначIа. ГьунчIукьатIрал оьрчI тикку усса чIумал на нава лавгссара Самамащилийн. Миннал увцуну ия му Бархъалав, Дарбантлив, ккаккан бувну бия цаймигу кIанттурду. Школалий итабавкьуну бия экскурсиялийсса мунал суратирттащалсса ла­кку мазрайсса чIирал кказит. Му цала кулпатравун иян ан лавгсса чIумал, ГьунчIукьатIувгу хьу­ссар ххаллилсса байран. Ми­кку Ахъушиял райондалиясса делегациялун дакIний-мазрай дакъасса бахшишну хьунни ГьунчIукьатIрал шяраву жула райондалиясса чIявусса дарги лякъаву, кувннал дянив гъан-маччашивугума дия.

— Барчаллагь, Эльвирай!
Ххариссару жу Ахъушиял райондалий лакрал цIа лайкьну дуручлачисса жула лакку душния. ТIайлабацIу баннав!

Ихтилат бувссар
Андриана Аьбдуллаевал