Ванил сиптачину ур жула лакрал бусравсса арс Мямма Мяммаев
П. Рамазанова
Ва зурул 25-нний МахIачкъалалив бувкIунни ЦачIунхьу Аьрабусттаннал Эмиратирттал Аьрасатнавусса вакил Маад Хареб Аль-Хейли бакIчисса делегация. Вай хьунабавкьунни Дагъусттаннал парламентрал вице-спикертал Камил Давдиевлущал ва МахIмуд МахIмудовлущал. Ххал бивгьунни туризмалул иширттавусса ва дуки- хIачIиялул продукциялул качествалул ялув бацIаву цIакь дуваврил масъалартту.
Хъамаллурал бувсунни Эмиратирттаясса инвестортал Дагъусттаннащал зун хIадурну бушиву. Ва пикри Дагъусттаннал парламентрал депутатътуралгу хъин чулий ккавккунни ва маслихIатрай, бавкьуну зунсса ният цаллагу душиву бувсунни. ХIукму бунни, уртакьну зунсса проектру хIадургу дурну, дузрайн дуккан дуван, проектру хIадур дувайхту, Дагъусттаннал хъунама Владимир Васильевлуйн буккан.
Ва хьунабакьаврил сиптачинугу ур ЦIуликъяннал шяравасса цIанихсса меценат ва жяматийсса ишккакку Мямма Мяммаев. Жула лаккучунал сипталийну хъиндайдихьуну хъанахъисса даву ххуйсса даражалийн гьаз хьуннав тIий буру.
