КутIану

КутIану

Аьрасатнал кардиологтал – Дагъусттаннай

Аьрасатнал кардиологтурал обществалул делегация бувкIунни жулла республикалийн, кардиологиялул аралул медициналул идарарттал даврищал кIул хьун. Делегациялувух ия РАН-лул академик, В. А. Алмазовлул цIанийсса НМИЦ-рал гендиректор, Аьрасатнал кардиологтурал обществалул президент Евгений Шляхто. Цалва аьрххилий ми цалчинма-цалчин бивунни Республикалул клиникалул азарханалийн. Азарханарттал ялтту бувккун махъ Рес­публикалул ЦIуллу-сагъшиву дуруччаврил министерствалий хьунни оператив батIаву.

Миллатрал­мунивух –
рок ва джазгу

МахIачкъалалив «РRО­яв­ление-05» цIанилу хьунни цалчинсса тIиртIусса Дагъусттаннал этно-рок-джаз фестиваль. Му сакин дурну дия ДР-лул Культуралул министерствалул.
Фестиваль тIитIлатIисса шадлугъ хьунни Дагъусттаннал филармониялул Гъинтнил майданнив. Концертравух гьуртту хьунни Дагъусттаннал паччахIлугърал филармониялул джаз-оркестр, 67/82 аьрали бутIул оркестр, Дагъусттаннал халкьуннал инструментирттал оркестр, личIи-личIисса рок-группарду ва таксса балайчитал.
Концертравух гьурттушинна дунни хъамаллуралгу: Нальчикраясса «Мэгик бэнд», Грозналиясса «Стоун», Аьш­ттарханнаясса «План Б», Сан-Францисколиясса Алекс Карлин.

Имам Шамиллул гьайкал цIу дуккан дуван

Республикалул хъуншагьрулул ца яла хъунмур проспектран цал цIа дирзсса имам Шамиллул гьайкалданул реконструкция дувантIишиву баян бувунни МахIачкъала шагьрулул каялувшиндарал. Му даву щаллу дувантIий бур имам дунияллийн увксса кьинилийннин. ДакIнийн бутан, гьашину имам Шамиллун 222 шин хьунтIиссар.

ЧIава журналистътурал цалчинсса школа

ЧIава журналистътурал Дагъусттаннайсса цалчинсса школа тIивтIунни КIулшиву дулаврил центрданул базалий. Му тIитIлатIисса шадлугърай гьур­тту хьунни республикалул ду­ккаврил идарарттал, Жяматий­сса палаталул, Журналистътурал союзрал вакилтал.
Школалийн занан бюхъан­тIиссар республикалул школар­ттал лавайми классирттал дуклаки оьрчIаща, ми язи бугьлантIиссар конкурсрал гьанулий. Дарсру дихьлантIиссар ДГУ-лул филологиялул факультетрай электрон СМИ-лул кафедралий.

Оьттухлу – музейравунсса билетру

Донорнал кьинилун хасну «Аьрасат – ттул тарих» тIисса паркрал чIарав оьтту бутIлатIисса мобил станция тIивтIуну бия. Му кьини оьтту буллуну бур 80 инсаннал. Миннан, аьдатрайсса талонну ва щикIалатру дакъассагу, буллай бия музейравунсса билетругу. Ва кьини билетру цайми станциярттайгу буллай бия. Оьтту буллуминнавух ия шагьрулул бакIчи цува Салман Дадаевгу.

Яла хъунмамур хIавз

Ухссавнил Ккавкказнавусса тIиртIу магъи дусса яла хъунмур хIавз тIитIинтIиссар Да­гъусттаннай – «Каспий» санаториялий, июньдалул ахирданий. Му бикIантIиссар ттизаманнул техникалул ва цаймигу тIалавшиннардацIун бавкьуну бувсса бассейн, хъамал багьай­сса даражалий бигьалагансса цинярдагу шартIру щаллу дурсса.

Назмурду ххираминнан

«Ттун ххирар назмурду» тIисса цIанилусса литературалул челлендж хьунни МахIачкъала шагьрулул Культуралул управлениялул сипталийну. Мунивух гьуртту хьунни искусствалул пишакартал, журналистътал, блогертал. Му давривух хьхьичIунсса гьурттушинна дунни «Аьрасат – ттул тарих» паркралгу. Дагъусттаннай байбивхьу­сса литературалул эстафета кьамул бунни Самара ва Омск шагьрурдал, гихунмай му хьунтIиссар Аьрасатнал цайми шагьрурдайгу.

Татарнал Сабантуй

Июльданул 7-нний Къизилюртлив хьунтIиссар Сабантуй-байран («хъурссул байран»). Ва хъанай дур татарнал миллатрал байран, цил тарихрал мархригу азарда шинал хьхьичI байбивхьусса. КIюрххия махъатунин лахъи лагантIисса байрандалул кьини чичинтIиссар Татарсттаннал ва Дагъусттаннал дянивсса машлул ва экономикалул, элмулул ва техникалул, культуралул уртакьшиврийсса зузаврил кьутIирду.

ХIадур бувссар
Бадрижамал Аьлиевал

Читайте также: