Жула Росгвардия

Жула Росгвардия

СаллатIнал ккурч ххал дунни
500 инсаннал

Дагъусттаннал Росгвардиялул аьрали цIигьуртурал дунни саллатIнал ккурч «Хъинбалалул ххуллийсса спорт» цIанилусса чирилул лечавривух гьуртту хьуминнан.

Ва акция гьашину шамилчинни хъанахъисса, ва дуллалиссар цIуллу-сагъшиврул ссуссукьу­сса оьрчIацIун ва жагьилтурацIун кабакьу баву мурадрай. Мероприятие хьунни Лениннул комсомолданул цIанийсса паркраву. Ванил сававкарну дия «Макь дакъасса оьрму» тIисса Да­гъусттаннал жяматийсса организация.
Росгвардиялул цIигьуртурал ккурч дуллалиссаксса хIаллай гьурттучитал левчунни личIи-личIисса манзиллай – 50 метралия байбивхьуну, 2 километ­ралийн бияннин. Хъирив цинявннан ккаккан дунни концертрал программа. Мюрщиминнал бунни личIи-личIисса хIазсса тIуркIурду. Ва кьини 500 инсаннал ххал бунни саллатIнал ккурччул тIин-тIааьн.

Росгвардиялул зузалт цив­ппагу гьуртту хьунни лечавриву.
«Ястреб» СОБР-ал зузалтрал бувгьунни кIилчинсса кIану 600 метралийх левчуну. «Макь да­къасса оьрму» тIисса организациялул председательнал Барчаллагьрал чагъар буллунни Да­гъусттаннал Росгвардиялул управлениялул хъунама МахIаммад Баачиловлун, акциялий чялиш­сса гьурттушинна даврихлу.

Щинавун буххултрал гьунар

Ххюва гьантлий Дагъусттаннай най дия Национал гвардиялул Ухссавнил Ккавкказуллал округрал щинавун буххултрал пишакаршиву магьир дуллалисса теориялул ва практикалул давуртту.
Вай давуртту наниссаксса хIаллай кьуния ххюйлва (аьмну 20 ссятрайсса) щинал вив був­ххунни пишакартал. Хъунна­сса къулагъас дия щинавун бу­ххултрал станция ва катерданул экипаж бавкьуну зузаврих. Мукунма ххал бивгьунни ца къахьунмур хьусса чIумал щинавун увхманан кумаг баврил масъалагу.
— ЧIалай бур зузалтрал пишакаршиврул даража ялу-ялун гьаз хъанай бушиву, щинавун буххулт цала къуллугърал буржру биттур бан хIадурну бушиву, — тIий ур Росгвардиялул Ух­ссавнил Ккавкказуллал округрал хьхьирил къуллугърал хъунама инспектор, капитан-лейтенант Алексей Камигунов.

ХIурматлувсса донортал

Дагъусттаннал Росгвардиялул управлениялул 30-нния ливчусса зузалт гьуртту хьунни щалагу дунияллий кIицI лагай­сса Донорнал кьинилун хасъсса ­оьтту булаврил акциялий.
Акция хьунни Республикалул чIяру профиллу дусса оьрчIал азарханалул отделениялий. Росгвардиялул чIявуми зузалт хIурматлувсса донортал хъанай бур. Ва кьини цалчин оьтту буллалиссагу бия. Цаппара ссятурдил дянив 36 зузалал 16 литра оьттул дуллунни. Миннавасса 7 зузала ия хIурматлувсса донор.

Андриана Аьбдуллаева

Читайте также: