«Оьруснал илкиншивурттайх» – илкинну
[dropcap]И[/dropcap]юньдалул 29-нний жулла республикалий дайдихьлахьиссар «Оьруснал илкиншивуртту» («Русские просторы») тIисса цIанилусса этнокультуралул проект.
Ванил сакиншиндаралсса буллай бур Республикалул Халкьуннал творчествалул къатта.
Фестивальданул дайдихьу хьунтIиссар Къизлар шагьрулия. Мунил лагрулий хьунтIиссар «Казачье подворье» тIисса цIанилусса этнокультуралул выставка, «Кирилл и Мефодий – славянские первоучители» цIанилусса луттирдал выставка, концертру. Фестивальданул лагрулий, творчествалул сакиншиннардал, аслийсса культуралул центрдал, жагьилтурал организациярттал вакилталгу гьурттуну, хьунтIиссар ккуркки столгу.
[dropcap]Ф[/dropcap]естивальданий гьуртту хьунтIиссар Ярославуллал, Саратовуллал, Ростовуллал областирдаясса ва Марий Эл республикалиясса творчествалул коллективру ва таксса гьурттучитал.
Фестивальданул лагрулийсса шадлугъру хъиривмур кьини хьунтIиссар МахIачкъалалив.
ДайлитIунтIиссар фестиваль июльданул 5-нний Яруссаннал театрданул хьхьичIсса шадлугърайну.
Ватандалул тарих язину кIулми
Дунияллул халкьуннал дянивсса аналитикалул отчетрал ккаккиярттайн бувну, Хъунмасса Буттал кIанттул цIанийсса дяъвилул тарихрал язими кIулшивуртту дагъусттанлувтурал дусса дур. Му акциялий так Аьрасатнаву гьуртту хьуну ур 805 азара инсан.
Тест буллалиссар АьФ-лул ПаччахIлугърал ДумалучIасса Жагьилтурал парламентрал сипталийну. Ва ххуллухмур тест мукьилчинссар.
Дагъусттанная гьашину мунивух гьуртту хьунни 23 азаллий 729 инсан, оьрмулул 21 шинава 71 шинавун ияннинсса. Ва даву хъанахъисса агьаммур майданнугу хьунни ДГПУ-лул тарихрал факультет. Щалла республикалий мукунсса майданну цинявппагу бивкIссар 432. Гьурттучитурал сияхIрайн бувну жулла республика дия щалагу билаятрай 7-мур кIанай.
Дагъусттанлувтурал кIулшивурттал дянивсса балл хьуну бур 20,28, му хъанахъиссар щала билаятрайсса язимур ккаккияну.
Му проектрал региондалийсса координаторну хъанахъиссар ДР-лул Халкьуннал МажлисрачIасса Жагьилтурал парламент.
Мугъаятну бикIияра хIарамзадатурая
Махъсса ппурттуву, шикку-тикку тIий, чIявуссанная баллай бур «Сбербанкрал» зузалтру тIий (бюхъай цамур банкраягу бикIан) оьвтIутIисса, инсантурахь цала банкрал карталул аьш-бакI, хIатта парольданийн бияннингума, цIухлахисса иширттая.
Арцухсса, цаманал хъуслихсса къанихшиврул, инсантал хъяврин бувансса цIу-цIусса кьяйдарду ляхълай бур хIарамзадатурал. Банкирдалминнуха лавхьхьусса, къалпсса номердая оьвтIий, чIявусса инсантуран тIааьндакъашивуртту дуллай бур, банкрал зузалара тIий, клиентнахь пин-код буси тIий оьвтIутIисса инсантал. Мукун щак багьансса номерданий щак багьансса инсаннал зучIанма оьвкусса чIумал, анавар мабуккари жаваб дулун ва цукунчIав мабусари цукунчIавсса информация. ДакIний битияра – цавагу банкрал цаягу зузала къаоьвтIунтIиссар зучIан ва буси, та буси тIий, яла-яларив – пин-код.
Мукун щак багьансса занг зучIанна дагьукун, оьвчияра банкрайн, ягу, банк гъанну бухьурча, насияра миккун, банкрал хIакьсса зузалтрал бусантIиссар зухь ци буван аьркинссарив, багьлай бухьурча, зул карта блокировать дувантIиссар, зула арцуйн тамахI бивхьуминнаща карталия ми ликкан къабюхъаншиврул.
[dropcap]Ш[/dropcap]икку ихтилат лахъи буван, чIявусса мисаллу буцлан хьунссар. Амма агьаммур пикририв цар – мугъаятшиву, цимилагу мугъаятшиву, чув-дунугу, та-дунугу, ва жула бигьа бакъасса заманнай.
Асия КьурбанмахIаммадова,
ДГУ-лул филологиялул
факультетрал журналистикалул отделениялул 1-мур курсрал студентка
«Аьдатирттал театр»
ДР-лул Халкьуннал творчествалул къатлул баян баврийну, июльданул 3-нния дайдирхьуну, июльданул 6-ннийнин хьунтIиссар Каспий хьхьирицIухсса паччахIлугъирттал ва Аьрасатнал регионнал халкьуннал театрдал фестиваль «Театр традиций». Муний гьуртту хьунтIиссар Къазахъисттаннаясса, Азирбижаннаясса, Ираннавасса ва Аьрасатнал циняв регионнаясса коллективру. Фестивальданул лагрулий ккаккан бувантIиссар халкьуннал театрдал ва драмалул театрдал хIадур бувсса спектакллу, хьунтIиссар «Театрал открыткартту» тIисса цIанилусса концертгу.
Роза Рамазанова,
ДГУ-лул филологиялул
факультетрал РДО-лул 3-мур курсрал студентка
Циняв цачIуну наркотикирттащал талан
«Росгвардиялул» зузалт гьуртту хьунни щалагу Аьрасатнаву нанисса «Трезвая Россия» цIанилусса наркотикирттайн къаршисса форумрал даврий. Форум най бикIантIиссар, июнь зурул 23-нния байбивхьуну, 26-ннийн бияннин Къумтуркъалаллал райондалийсса Тюбе поселокрай. Ванил сакиншинначиталну хъанахъиссар «Трезвая Россия» федерал проект, Дагъусттаннал жагьилтурал иширттал федерал агентство ва Жагьилтурал иширттал министерство.
Шикку гьуртту хьунни Дагъусттаннал ХIукуматрал вакилтал, Росгвардиялул Ухссавнил Ккавкказуллал округрал хъунаманал хъиривчу генерал-майор Михаил Романов, Дагъусттаннал Росгвардиялул управлениялул хъунама, полициялул генерал-майор МахIаммад Баачилов, оператив бригадалул командир, генерал-майор Сергей Алейник.
Ва иширацIун бавхIуну, Росгвардиялул хIаятраву ккаккиялун бивхьуну бия аьралуннал ярагъ ва техника.
[dropcap]З[/dropcap]узалтрал мукунна гьурттушинна дунни форумрал пленар батIаврийгу.
— Наркомания – хIакьину ца яла цIурувкьюмур масъалалун ккалли хъанай бур.
Наркотикирттайн къаршисса акцияртту чара бакъа аьркинсса ва чIумуй сукку дурсса давур. Росгвардиялул зузалтрал хъуннасса даву дуллай буссар жагьилтал наркотикирттая арх баву мурадрай. Жула агьали ва балаллуя мурахас бан жугу шаймур булланну, — увкунни Михаил Романовлул.
«Трезвая Россия» форумрай гьуртту хьун Дагъусттаннайн бувкIун бур 60-нния ливчусса регионнаясса делегатътал.
Аьралуннал гуж майшан учин
Аьрасатнал Федерациялул обороналул министрнал хIукмулийн бувну (13 декабрь 2018 шин), Аьрасатнал Ярагъуннил гуж майшан чаву, аьралуннал сий гьаз даву ва жула агьали, хаснува ялун нанисса ник, Ватан ххирану тарбия даву, мукунна аьрали частирдал командованиялул, паччахIлугърал ва муниципал органнал властьрал, жяматийсса организациярттал, лавайсса даражалул дуккаврил идарарттал хIала-гьурттушиву цIакь даву мурадрай, Каспийск шагьрулий хьунтIиссар «Армия – 2019» цIанилусса Дунияллул халкьуннал дянивсса аьралуннал ва техникалул форум.
Форум хьунтIиссар Каспий флотилиялул 71-мур аьрали округ дусса кIанттурдай.
Ванил лагрулий хьунтIиссар ярагъуннил ва аьрали техникалул выставка, цала гуж-кьудрат ва каши ккаккан дантIиссар Каспий флотилиялул жамирдал, хьхьирил бахьттагьалтрал подразделениярттал, гьаваллаву – авиациялул.
[dropcap]Ф[/dropcap]орумрай гьуртту хьунтIиссар республикалул промышленностьрал предприятияртту. Вайннал тIитIинтIиссар Дагъусттаннал экономика хьхьичIуннай дан цала дуллалимуния, бихьлахьисса захIматрая бусласисса павильонну. Хъунисса предприятияртту дакъассагу, шикку гьуртту хьун, цала каруннил дурмур ккаккиялун дишин ва даххан бучIантIиссар мюрщи производстварттал вакилталгу. Форумрал лагрулий хьунтIиссар региондалул агьамми масъаларттал, тарихрал ва ттизаманнул иширттал хIакъиравусса ккуркки столлу.
ЛичIи бантIиссар мюрщими бялахъансса майданнугу.
Хъамакъабитулул чирахъру
Хъунмасса Буттал кIанттул цIанийсса дяъви байбивхьусса аьпалул ва хIасратрал кьинилун хасну дуллалисса мероприятиярттал лагрулий хьунни «Аьпалул чирахъру» лахълахъисса патриот акция.
Акциялий цала хъунама МахIаммад Баачилов бакIчину гьуртту хьунни Дагъусттаннал Росгвардиялул управлениялул зузалтгу. «Аьпалул чирахъ» акция хьунни Лениннул комсомолданул цIанийсса паркраву. Росгвардиялул зузалтрал дирхьунни тIутIив СаллатIнал гьайкалдануцI ва Совет Союзрал вирттаврал суратру лархъсса Славалул аллеялий.
ТIутIив дирхьуну махъ ливтIуминнал аьпалун минутIрайсса пахъ багьаву дунни. Хъирив МахIачкъалаллал школалул дуклаки душварал ккаккан дунни «Кьурукьру» къавтIаву ва, му щаллу дайхту, цинявппагу оьрчIал итабавкьунни гьаваллавун кIяласса шарду.
Амина Юсупова,
ДГУ-лул филологиялул
факультетрал журналистикалул отделениялул 1-мур курсрал студентка
