[dropcap]М[/dropcap]айрал 14-нний Ма­хIач­къалалив Хал­кьу­н­нал хозяйствалул университетраву хьунни налогру датIаврин хасъсса хъуннасса семинар-батIаву.

З. АьбдурахIманова
Ваний гьуртту хьунни ДР-лул ХIукуматрал председатель Артем Здунов, ДР-лул БакIчинал ва ХIукуматрал Администрациялул каялувчи Владимир Иванов, личIи-личIисса министерстварттал ва ведомстварттал къуллугъчитал, районнал администрациярттал пишакартал, налогирттал идарарттал зузалт ва экспертътал.

БатIаву тIитIлай, В. Ивановлул хьхьичIва-хьхьичI кIицI лавгуна шагьрурдай ва щархъаву ялапар хъанахъисса агьулданул багьу-бизулул, ялапаршиндарал даража муниципалитетирттал каялувчитурал биялдарайсса зат бушиву ва мунияту хIукуматрал хъуннасса къулагъас кIанттул каялувшиндарал къуллугъирттах душиву.
В.Ивановлул бусаврийну, укунсса журалул батIаву жучIара дуллай бусса бия цалчин. Ва ххуллух сиптачитурал пикри бувну бия районнал бакIчитуращал архIал зузимигу ва давривун кIункIу бансса.

— Гьарца муниципалитетрал дур цалла даврил низам. Цавайннаща най буна бюхълай бухьурча цайва бивхьусса буржру биттур бан, гайми бур чIун лахъи дуккан дуллай, дурну бакIуйн къабуклай. Мунияту жун ччан бивкIунни, зу зула дяниву ихтилатру ва ххалбигьавурттугу дуллали бувну, республикалул БакIчинал хьхьичIун був­ккун, зува гихунмай ссаха, цукун зунтIиссарив бусласи бан, — кунни В.Ивановлул.

Гьурттучитуран тIайлабацIу чIа тIисса цала мукъуву ДР-лул ХIукуматрал председатель Артем Здуновлулгу мукунма кIицI бувунни укунсса журалул батIавуртту жучIара аьдат­равун дагьну душиву ва гьарца батIаврия махъ, агьамсса масъалартту хьхьичI ххуттайн лавсун, муниципалитетирттая ми щаллу бан тIалав байшиву.
— ХьхьичIми шиннардих бурувгун, ларгсса шинал жущава мяйжаннугу республикалул маэшат лахъ бан бювхъунни. Му зу кIантту-кIанттурдай дур­сса давурттал биялагур, жул, республикалул бакI дургьуминнал, зуятусса тIалавшинна ххи давугур. Республикалул ва муниципалитетирттал бюджетирттавун дучIаймур ххи хьунни, цанчирча бувчIлай буну тIий зун аьркиншиву цIусса тIалавшиннардайн чул бивщуну. Уттинин жува жула маэшат лахъ бавриха зий бивкIун тIий, вана гьашину бюхъантIиссар мелиорациялуха, хIачIай щин дуцавриха, школа-садикру бавриха зун,- увкунни ванал.

Махъру лавхъуна ялагу ДР-лул Халкьуннал Мажлисрал бюджетрал, налогирттал комитетрал председатель С. Исакьовлул, ДР-лул ХIукуматрал председательнал хъиривчу Е. Толстиковал, республикалул УФНС-рал каялувчи Г. Апсалямовлул ва ДР-лул ХIукуматрал председательнал цалчинма хъиривчу ХI. ХIусайновлул.
— ХIакьинусса жула батIаврил хъунмур мурадну хъанахъи­ссар республикалул муниципалитетирттай ряхрагу налог ратIаврил чаранну ва «ххуллул картарду» ххал дигьаву. Зуятусса тIалавшиннанугу хъана­хъиссар ми налогру ратIин зухунна ци дахчилай дуссарив хъирив лавну, дайшишру ххал дигьаву. Налогру ратIайни, зуща щаллу бан къахъанахъими масъалартту жу жуйнма ласунну, щаллу бан бюхъайми зуй бишинну. ЦIана тIурча, жулла республика налогру къаххуйну ратIлатIисса регионнал сияхIрай цалчинминнувух дур. 2025 шинайннин жува хъунмасса хIарачат бан багьлай бур дучIайсса налограл маэшат 80 миллиардрайн биян бансса. ЦIана тIурча, 40 миллиардрайнмагу лахъан бувару, — увкуна ХIажимахIаммад ХIусайновлул.

КIицI бувна ванал, республикалул инфраструктура 80% дух хьусса, дияйнийн дирсса душиву. Налогру дагьайсса низамрай ратIлай сукку къавхьуссаксса жула ххуллурду, школартту, азарханарду ва садикру бакьин бан къабюхълахъишиву.
БатIаврил агьаммур бутIуя махъ дайдирхьуна муниципалитетирттал налогру ратIайни ишла дувайсса «ххуллул картарду» ххал дигьаврилмур даву.

Хъиривмур кьини вава ма­съалалул хIакъиравусса батIаву хьуна Къизлардай. Гиккун оьвкуну бия республикалул шагьрурдал бакIчитурайн ва миннащал муниципалитетирттай зузисса пишакартурайн.