ПартIу ПатIимал гьайкал вив ларсъсса Ниттил Аллея

Апрель зурул 27-мур кьини Гъумукун нанимигу, Гъумучату ялавай нанимигу машинартту аглан буллай, тамаша бу­ллай бия ПартIу ПатIимал гьайкал ду­сса кIанай.Я къабацIансса ишгу бакъая: гьайкалданучIан чIявусса агьлу бавтIун бия – мюрщимигу, хъунимигу, жагьилмигу. ГьайкалданучIансса чурттул тихагу, шихагу шарду бавхIуну, цивппа чурттурдугу кIяла бувну, дакIру шад дуллалисса даву дурну дия. Му кьини бавтIцири бугьлай бия булувкьуну мурхьру. ТIитIлай бия кIикку Ниттил Аллея.


ПатIимат Рамазанова
[dropcap]В[/dropcap]а даврил сиптачинугу бия Мариян Илиясовал цIанийсса «Дараччи» фонд­рал президент Гульшан Хасаева. Мурхьру бугьлагьимигу хъунмурчIин «Дараччилул» душру бия. Мариян Илиясовал ва мунил уртакьтурал хIарачатрайну дурсса гьайкал духьувкун, гьай-гьай, цалчинми мурхьругу бувгьуна ПартIу ПатIиман ва Мариян Илиясован цIа куну. Бувгьуна аьпалу­хьхьун лавгсса лакрал машгьур­сса хъаннин цIа кусса мурхьругу. Амма, Гульшан Хасаевал тIиссакун, ва акция дия цинявппагу лакку хъаннил аьпалул хIурмат буллалисса, цинявппагу ниттихъал бюх­ттулсса захIматран кьимат бишлашисса.

Му давривух чялишну хIала бувххун бия, Сиражуттин Илиясовлуя тIайла хьуну, Сиражуттин ва Мариян Илиясовхъал оьрчIругу. ЛичIиссава кумаг бунни тIий бия Марат Илиясовлул. Бия райондалул администрациялул вакилтал, Гъумучиял школалул учительтал ва дуклаки оьрчIру, чIявуя ва ххуйсса давривух гьуртту хъанахъими ва гьур­тту хьун ччими.
Ххуйсса даврицIун кабакьин кунма, ляличIинура дару­сса хьуна кьинигу. Тасса-танингу гьайкалданул ялувсса ссавния хIура хъанай дакъая къюкIлил къалип­райсса кIяла ттуруллул къурхъгу, ваца Жабраил малаикнал хъа ялтту лирчусса кунна. Ца зумату кунма, душру бия кIа Марияннул рухI духьун­ссар тIий.

ТIутIайх бичинтIиссар, ИншаАллагь, Ниттил Аллеялуву бувгьу­сса мурхьру. Жугу дуаьрдай бивкIру, цIуну бувгьу­сса жулва мурхьирдахь, узданну зана-кьулу тIутIисса, жулва ни­ттихъан лайкьсса куццуй узданну гьаз хъанай бачияра, яхI буллай, кьянкьану бацIияра тIий. Аьзизсса нитти­хъал аьпа уттавасса мурхьирдайну абад бувавривугу дурхха аьрщарай оьр­му цила ирглий най бушиврул аьламат.

Мурхьру мудангу ккалли бувай аьрщарайсса оьрму уттавашиврул лишанну. Нину тIурча, – оьрмулул дайдихьуну, хъиншиврул ва ттюнгъашиврул гьануну. Ниттил Аллея, ниттихъал аьпа ва цIусса мурхьирдал хъюлчай – вагу караматну тIайла дарцIусса хIикмат хъанай дур. Бюхъаннав вил хъюлчай, ­Ниттил Аллеяй!