АлхIаткьини МахIачкъалалив тIитIлатIиссар дунияллул халкьуннал дянивсса ссихьрал театрдал фестиваль, «Волшебный мир театров кукол стран БРИКС» тIисса.

Зулайхат Тахакьаева
Ва агьамсса иширан хас дур­сса пресс-конференция хьунни «Дагестанская правда» кказит­рал редакциялий.
Муний гьуртту хьунни Дагъусттаннал театрал иш­ккаккултрал союзрал хъунама Айгун Айгунов, Дагъусттаннал паччахIлугърал Ссихьрал театрданул каялувчи Аминат ЯхIъяева, ДР-лул Культуралул министерствалул консультант Мариян ХIажиева, искусствовед Гулизар Султанова.
Ва сий хъуннасса фестиваль дан Дагъусттан язи бугьаврил тIайлабацIу чассарив буслай, Аминат ЯхIъяевал кIицI лавгунни дунияллул магьирлугърал оьрмулуву ссихьрал театр чялишсса гьурттушинна дуллай бушиву.

— Жул театр хьхьичIунсса даражалий гьуртту хьуссар Болгарнаву, Финляндиянаву, Туркнаву, Литвалий, Украиннай, Белоруссиянаву, Арманинаву ва ца­ппарасса цаймигу билаятирттай хъанахъисса дунияллул лагрулийсса фестиваллай. Ва проектгу хIасул хьуссар 2017 шинал Москавлив, «Образцов-фест» тIисса ссихьрал театрдал фестивальданий, — кунни ванил.
Мукунна ванил чIурчIав дунни паччахIлугърал чулуха хъуннасса къулагъас дуллалисса проектрал кабакьу бантIишиву БРИКС-равун бухлахисса билаятирттал дянивсса магьирлугърал уртакьшиву цIакь дангу.
— Фестивальданул лагрулий гьуртту хъанахъиминнаща бюхъантIиссар цала магьирлугъ цIусса даражалийн дуцин, цала тамашачитал гьарза бан, лякъин цIу-цIусса уртакьтал, БРИКС-рал билаятирттал халкьуннал культурарду кувннин кув мачча дан, — ххи бунни Аминатлул.

Фестивальданул лагрулий хьунтIий дур хъамаллуращал­сса хьунабакьавуртту, «ккуркки столлу», семинарду, гьуртту хъанахъисса билаятирттал мазурдий театрал магьирлугъраву ишласса махъру бавтIсса чIюлусса «Театрданул словарьданул» презентация.
Цинма Ссихьрал театр лява­личIину ххирасса бушиврий чIурчIав дуллай, Гулизар Султановал кIицI лавгунни ссихьрал театрданул хъинну агьам­сса кIану бугьлай бушиву художествалул цIу-цIанпир тарбия бавриву. ЧIава тамашачитал бялахъан буллай, оьрчIаву чантI учин дуллай душиву аькьилшиву, ххуйшиврийнсса кIункIу тIаву.
Пресс-конференциялий гьуртту хъанахъиминнал бусаврийн бувну, фестивальданул программа дикIантIий дур хъинну авадансса ва яргсса. Кьиблалул Африканал республикалул Ссихьрал театрданул ккаккан бантIий бусса бур фестивальданун цIа куну хIадур був­сса дунияллул премьера. Дагъус­ттаннал паччахIлугърал Ссихьрал театрданул ккаккан бантIий бур «Образцов-фест» дунияллул халкьуннал фестивальданий лавайсса кьиматран лайкь хьу­сса «Алые паруса» тIисса спектакль.