Лакрал жагьилтал цачIунмай бансса ца проект уттигу дузрайн дуккан дунни жагьилтурал цала сипталийну. Жагьилтурал ккурандалул сипта хъинчулий ккарккун, муницIун кабакьу бунни лакрал шаннагу райондалул администрациярттал хъуниминналгу.

Зулайхат Тахакьаева
МахIачкъалалив хьунни Да­гъусттаннал лайкь хьусса ветеринар, захIматрал ветеран, чIярусса шиннардий Дагъусттаннал волейболданул цачIундур командалул капитанну ивкIсса, РСФСР-данул волейболданул цачIундур командалувух уклай ивкIсса цIанихсса спортсмен, Бадруттиннул арс Нуруллагь Оьмаровлул завалунсса волейболданул Кубок.

Увну ур Нуруллагь 1936 шинал Муккурдал шяраву. Та заманнай зунттал щархъаву яла машгьур­сса тIуркIу бивкIун бур волейбол. Арулчинмур классраву дуклакисса чIумал ацIулчинмур класс­рал оьрчIал Нуруллагь уцайсса ивкIун ур цавухва уклан. Шяраваллил хозяйствалул институтравун дуклан уххайхтугу, атлетикалийн занай айивхьуну ур. 1954 шинал, дуклаки оьрчIал дянив­сса республикалул спартакиадалий диск лирчуну, дирхьуну дур республикалул рекорд.

Куклумур атлетикалухнияр чIивинива машхулсса волейболданух гъира буну, цIунилгу мува тIуркIулухун агьну ур. Гужсса команда хIисаврай, шяраваллил хозяйствалул институтрал команда дуклай диркIун дур республикалул цачIундур командалуву. Нуруллагьлулгу ацIния кIира шин дурну дур му командалуву уклай, ивкIун ур му командалул капитаннугу. Лакрава, ца цува акъа­сса, цама акъа, луглайна икIайссияв тIар цачIундур командалувун уцин гьунар бусса лакку оьрчIах.
Муния махъ кIира шин дурну дур РСФСР-данул цачIундур командалуву уклай. Му командалувугу Дагъусттанная увагу ва ивкIун ур.
НуруллагьлучIа яхьуну дур чIярусса грамотартту ва дипломру.

ХIакьинугу кьиматрай ур илданул дянив.
Нуруллагь Оьмаровлул завалунсса цалчинсса турнир хьу­ссия кIира шинал хьхьичI Гъумук. Хъуннасса сийлий хьунни ва базилухсса турниргу. Гьуртту хьунни муний лакрал шаннагу райондалиясса кьура команда.
Турнирданул финалданий ва му лакьлакьисса шадлугърай гьур­тту хьунни Лакрал райондалул администрациялул бакIчи Юсуп МахIаммадов, ДР-лул Халкьуннал Мажлисрал депутат Амирхан Амирханов, олимпий чемпион Ширвани Мурадов ва цаймигу бусравсса хъамал.
Ххув хьунни ЧIурттащиял ко­манда. КIилчинмур кIану бувгьунни ЦIуссачIурттащиял командалул, шамилчинмур кIану – ЧIяйннал командалул.