[dropcap]М[/dropcap]айрал 20-нний хьунни ДР-лул ХIукуматрал председательнал хъиривчу – шяраваллил хозяйствалул ва бакIлахъиялул министр Аьвдулмуслим Аьвдулмуслимовлул пресс-конференция.
Мунащал архIал журналистътурал суаллахьхьун жавабру дуллунни мува министерствалул экономикалул ва финансирттал управлениялул хъунама ХIажимурад Энховлул ва мелиорациялул ва механизациялул управлениялул хъунама Нисред Нисредовлул.
Министрнал тIимунийну, 50-нния ливчусса процент дагъусттанлувтурал ялапар хъанай бур шяраваллал кIанттурдай.
Агропромышленностьрал комплексраву зий бур 30 процент агьалинал, 20 процент ВРП-лул (Валовый региональный продукт) ласайссар шяраваллил хозяйствалул.
2018 шинал Дагъусттаннай шяраваллил хозяйствалул бакIлахъия ларсъссар 124 млрд. къурушрансса, миннувату ххяххияртталсса – 59,2 млрд. къурушрансса, ризкьилулсса – 64,8 млрд. къурушрансса. Министрнал мукунма кIицI бунни цIанасса ппурттуву агьамминнавасса цану хъанахъишиву мелиорациялул ара. Мунал пикрилий, хъунмасса мюнпат республикалун хъанахъиссар ппиринж дунияллул халкьуннал дянивсса рынокрайн буккан баврия.
«ДукIу жу дазул кьатIаллил билаятирттан даххарду 4 азарда тонна яттил дикIул, ми хъанай бур 150-160 азарва бакI яттил. Мунийну яттил дикI республикалий чан къархьуссар, дикIул багьа лахъ шаврийнгу асар биян къабувссар. Жу ххал барду яттил дикIул багьри хъуншагьрулул базардаву – дикIул килорал дянивсса багьа бур 380 къуруш. Ххяххиярттал ара махъун дагьну дур ризкьилул аранияр. Мунияту мелиорациялун республикалий личIи дурссар 500 млн. къуруш, щин дишайсса аьрщив гьарза хьун даншиврул ва ппиринжрал бакIлахъия чIярусса ласаваншиврул», — увкунни министрнал.
Нисред Нисредовлул бувсунни мелиорациялул давуртту лядуккан даврил хIакъираву.
Пресс-конференциялий журналистътурал суаллахьхьун жавабру дуллай, бувсунни АПК-лул аралуву инвестпроектру дузрайн дуккан даврил ххуллий дуллалисса давурттаятугу, цIуну байбихьлахьисса фермертуран кумаг баврил хIакъиравугу, тIабиаьтрал биян бувсса зараллу бухлаган бансса кумагру бавриягу.
Лажин хIадур дурссар
ХI. Аьдиловлул
