Хъун дяъвилий жанну дуллуминнащал архIал Ххувшаврил байрандалул гьантрай жула билаятрай дакIнийн

 бичай личIи-личIисса данди бацIавурттаву, талатавурттаву оьрмурдацIа хьу­сса ватанлувталгу.

Зулайхат Тахакьаева
Хъинсса аьдат цIакь хьуну дур шамилчинмур Львовскаллал къутандалийсса Кьубиял школалий. Гьарца шинал шикку ларайсса сакиншиндарай шай 1999 шинал август зурул 2-нний ЦIумадиял райондалул Агъваллал шяраву къачагътурайн данди уккавриву жандалуцIа хьусса виваллил аьралуннал аьрали хIакин МахIаммад Берцинаев дакIнийн утлатисса батIаву. Ва школалун дирзун ду­ссар МахIаммад Берцинаевлул цIагу, хIаятраву дацIан дурну дур гьайкалгу.

Гьашинусса батIаву хас дурну дия чапхунчитурал кьюкьри Дагъусттаннайн ххярххун 20 шин там шаврин.
Муний гьуртту хьунни виричунал кулпат Шагьрузат, арс Сяид, ссу Светлана, мачча-гъанми, дус­тал, школалул учительтал ва дук­лаки оьрчIру.
Митинг тIитIлай, школалул директор Зубаир МахIаммадовлул бувсунни МахIаммад Берцинаевлул дурсса виричувшиврия. КIицI лавгунни дуклаки оьрчIругу, учительталгу пахрулий бушиву ванал цIанийсса школа бушиврия. Дуклаки оьрчIалгу бувсуна МахIаммад Берцинаевлул виричушиврия, дурккуна мунан хас дурсса назмурду.

1999 шинал, август зурул 2-ннил хьхьуну, Чачаннал чулуха чапхунчитурал кьюкьри ЦIумадиял райондалул дазуйн ххярхсса базилух, МахIаммад Берцинаев ивкIссар санитарнал чятирдануву. Бита-ххитаврил чIу баяйхту, левчуну ур тиккун. Ярагъ ганахь къабивкIун бур. Гьалмахтурал бусаврийн бувну, ганал ярагъ кIунттил тачIаввагу къабугьайсса бивкIун бур, “на хIакинна, ттул бурж инсантуран кумаг бавур, инсантурайн битаву бакъар» тIисса пикрилий.

БлокпострачIа МахIаммадлун ххал хьуну бур янна-ярагъуннил балгусса чIявусса къачагътал ва ливтIусса цала гьалмахтал – милицанал сержантътал Закарья ХIусайнов ва Сулайман Сагибулаев. КIиягу лявкъуну бур ссурссулуха бивххун.

Берцинаев щинчIав ккавккун акъар ва ганаща бюхълай бивкIун бур хавар къахьунну лихъан. Амма кьюлтIну ххярклий лавгун, боевикнал тинмай бивхьусса пулемет лавсун, чапхунчитал бувкIсса “УАЗ” кIурчIулттуйн буккан бувну бур. Талатаву дусса кIанттайн бувкIсса гьалмахтуран га цувагу лявкъуну ур кIурчIулттуйн увккун – ганал чурххай диркIун дур 17 ккуллалул щаву. МахIаммадлул кIурчIулттуйн буккан бувсса УАЗ-раватугу дуккан дурну дур урчIра жаназа.
Му хъуннасса къучагъшиврухлу Аьрасатнал Президентнал Указрайн бувну, МахIаммад Берцинаев лайкь хьуссар Чувшиврул ордендалун.