Ккацран

КутIасса справка
Ккацраннал шяравалу диркIссар Ваччату кьиблалул ва баргълагавал чулийннай 8 км. манзилданий, Гьамиящиял ва 2-мур ЦIувкIуллал чIаххуврай.

Аьрасатнал статистикалул комитетрал итабавкьусса информациялул бюллетеннайн бувну, 1914 шинал Ккацраннал шяраву яхъанай ивкIун ур 159 инсан.
Ва шяраваллил пашмансса кьадардания бусласисса суратну дуссар лагмара мюрщи-хъунисса хIалурдугу дусса ца зун­ттул хъазамрай вив кьатI увкусса къатрал эяллу, хъахъи лавгсса чIиртту ва чартту.
Шяравалу сакин хьу­сса кIанттай цалчин миналул хьусса инсанну ивкIун ур Къиримхан тIисса чув-адамина. Хъирив миккун бивзун бивкIссар тIар Ххячарахъул тIисса тухумрая­сса инсантал.
Агълар-ханнал заманнай Гъази-Гъумук ханначIа къуллугърай ивкIун ур Ккацранниясса Къирим-Кьурбан тIисса адамина.

Щалагу Дагъусттаннайх Ккацраннал цIа хъиннура машгьур дурсса инсанну хъанай ур революциялул чIумал граждан дяъвилий Виричунал цIа ларсъсса чув МахIмудхъал Апанни, яни Ккацраннал Апанни. Хъунмасса Буттал кIанттул цIанийсса дяъвилийгу Апанни ивкIссар бурттигьалтрал полкрал командирну. Ва шамийла лайкь хьуну ур Талатаврил ЯтIул Ттугълил ордендалун. Зувилку шиннардий сакин дурсса «Красный чабан» тIисса колхозрал цалчинсса председательнугу ивтун ивкIун ур вава Ккацраннал Апанни.
Лаккуяту бизан буллалисса чIумал, Ккацраннал шяраву диркIун дур 35 тIюва, ми тIювардай яхъанайгу ивкIун ур 169 инсан.
ЧIирисса Ккацраннал шяравату Хъун дяъвилийн лавгун ур 22 жагьил, миннава махъунай зана къавхьуну ур 17.
Ккацраннал шярава бувксса агьалиная сакин хьусса щаллусса диаспора яхъанай бур хIакьину Къабардин-Балкьарнаву.
Ккацраннал жяматрал арс Загьиди ХIажиев зий ивкIссар ЦIуссалакрал райком партиялул цалчинма секретарьну, «Новочуртах» совхозрал директорну.
Лаккуя бивзун махъ ЦIуссалаккуйгу, ЦIуссалаккуя Новостройрайн бивзун махъгу Ккацраннал жяматгу, Гьамиящиял жяматгу бивкIссар, буссар цачIу, ца шяраву – Гьамияхь.