ГьаркIассун

КутIасса справка

[dropcap]Ч[/dropcap]Iарах нанисса неххацIухсса ххяллул ялунгу гьаз хьуну, дакI хъихъину дарцIусса исвагьисса ГьаркIассуннал шяравалу диркIссар Гъумучату кьиблалул ва баргълагавал чулийннай, 4 км. манзилданий.

Оьрмулул бугьараминнал бусласаврийн бувну, кIа даралуву ГьаркIассун сакин хьуну бивкIун бур кIийлва. ЦIу бутIуй шяравалу диркIун дур цахъи шихуннай, КIубрав нани­сса ххуллул ялув.

Амма ца ппурттуву, бала-хатIасса бабаъ цIуцIаву (холера) дирну, кIикку яхъанай бивкIсса агьлу, цаягу ххассал къавхьуну, цаннал хъирив ца ливтIуссар тIар циняв. КIа кIанттайн хIакьинусса кьинигу учайсса бур Лирщар куну. КIиккун изан ва миналул хьунгу къасивсуссар тIар муния махъ цучIав. Ахиргу, цалла буттал аьрщарай миналул хьунна куну, так ца инсаннал салкьи дур­ссар тIар кIикку тIюва, цурдагу кIиккура дакъача, кIа кIанттуяр чансса кIиххуннай. ЦIуницIакул ГьаркIассуннал жямат утта буккан буллай айивхьусса му инсаннан цIагу диркIссар тIар ХIажисулла. КIа оьсса бала ливксса чIумал, му цувагу ивкIун ур, дуккин лавгун, тихавай, Аьрабус­ттаннай.

Зунттава арив бизан буллалисса шинал ГьаркIассуннал шяраву бивкIун бур 16 къатта, яхъанайгу ивкIун ур кIикку 45 инсан.
1941 шинал дяъвилийн лавгун ивкIун ур 10 инсан. Зана къавхьуну ур 3 жагьил: ХIусайнов Бадави, Султанов Идрис ва Султанов Юнус.

ГьаркIассуннал жямат­рал итххявхсса душ ЦIунтIаева Рабият зий бивкIссар ДучIиннал шяраваллил советрал председательну.
ЦIуссалаккуйн бивзун махъ ГьаркIассуннал агьлу яхъанай бивкIссар ДучIиннал жяматравух хIала. ХIакьинусса шамилчинмур миналийгу (Новостройрай) буссар цачIу – ДучIиннал шяраву.
ЦIанасса чIумал ДучIиннал администрациялий каялувшиву дуллай ур ГьаркIассуннал жямат­раясса чув – АбутIалиб Аминов