Яла хьхьичIунма пишакар

МахIачкъалаливсса ОМОН-лул базалий хьунни «Яла ххуйма пишакар» цIанилусса вневедомственный къаралданул зузалтрал пишакаршиврул даража ххал буллалисса конкурсрал кIилчинмур ятIап.

Конкурсрай гьуртту хьунни щалагу респуб­ликалиясса 8 команда. Бяст-ччаллу хьунни зузалтрал аьмсса кIулшивуртту, пишакаршиврул даража, цIуллу-цIакьшиву ххал буллалисса.
Шикку ххув хьуми гьантIиссар июнь зуруй Воронежрай Аьрасатнал МВД-лул институтраву хьунтIисса конкурсрал махъва-махъмур ятIапрай гьуртту хьун.

СаллатIнал ккурччул тIин-тIааьн ххал бунни

МахIачкъалаллал 38-мур гимназиялий хьунни Хъунмасса Буттал кIанттул цIанийсса дяъвилий Ххувшаву ларсун 74 шин шаврин хас дурсса «Мюрщи патриотътурал парад» цIанилусса балайрдал смотр-конкурс. Шикку гьурттушинна дунни Дагъусттаннал Росгвардиялул управлениялул зузалтрал ва аьралитурал. Конкурсрай гьуртту хьунни шагьрулул КIулшивуртту дулаврил личIи-личIисса идарарттаясса 16 команда, миннувух генерал-полковник Г.Н. Трошевлул цIанийсса Дагъусттаннал цалчинмур кадетътурал корпусрал командагу. Конкурс хьуну дия кIива бутIуя. Цалчинмур бутIуй дуклаки оьрчIал, ссаламгу буллуну, ккаккан бан аьркинну бия стройрал упражненияртту, амру бувсса куццуй сукку-кьютIу шаву, амру бан кIулшиву. КIилчинмур бутIуй командарттан кьюкьа дурну лагма бу­ккан багьлай бия, укунсса чIумал учайсса балайгу тIий. Конкурсрал программа къуртал хьуну махъ 38-мур гимназиялул дуклаки оьрчIал ккаккан дунни хъамаллуран ва конкурсрал гьурттучитуран цаламур программа. Увкунни дяъвилул балайрду, ккаккан дунни къавтIавуртту ва дяъвилул иширттацIун бавхIусса парчри.
Хъирив конкурсрал хIасиллу дуллалисса ихтилат бунни Рос­гвардиялул управлениялул хъунаманал кумагчи, полициялул полковник Константин Шияннул.

— Ттун дакI даркьунни цинярдагу командарттай. Цавай кьюкьлуй лагавриву хьхьичIунну бивкIхьурча, гайминнал балай учаврил гьунар ккаккан бунни. ЧIявуми командиртурал кка­ккан бунни кьюкьрай каялувшиву дан бюхъайшиву, цивппа лайкьсса командиртал бушиву. ТIааьнну бия командарттавусса душру ссавукIуй оьрчIаяр махъун багьлай бакъашиву. Укун­сса байраннахь хъунмасса бияла буссар оьрчIру Ватан ххирану тарбия бан, — увкунни ванал.

ХьхьичIунсса командарттан ва дуклаки оьрчIан дуллунни грамотартту. Яла-яла оьрчIан дакIний личIансса хьунни Росгвардиялул зузалтрал тIивтIусса полевая кухня. Цинявннаща ххал бан бювхъунни саллатIнал ккурчлил тIин-тIааьн.
— ХIакьину жу хъамалу барду 500-нния ливчусса дуклаки оьрчIру. Миннан жула дукра нахIу дирзхьунссар ва хIакьинусса хьунабакьаву тIааьнну дакIний личIанссар тIий буру, — увкунни Росгвардиялул аьшвашханалул хъунама, полициялул хъунама прапорщик Вали Валиевлул.
Мероприятие лакьлай, ихтилат бунни 38-мур гимназиялул директорнал хъиривчу Инга Гиковал. Ванил барчаллагь увкунни Росгвардиялул зузалтрахь ва давриву гьурттушинна дурну тIий.

Къахьунмур хьурча

Дагъусттаннал Росгвардиялул зузалт гьуртту хьунни щалагу Аьрасатнаву нанисса МЧС-рал командалул ва штабрал учениярттай.
Цалчинсса кьинива цинярдагу подразделенияртту иш багьний леххаврий буккан хIадурну бия. Хъиривсса кьинирдай къахьунмур хьусса чIумал (ЧС), сукку тIунсса куц ккаккан бунни. Мукунма вайннал ккаккан бунни инттухунмай щин ялтту ларгсса чIумал бала-апатIрая цивппа инсантал ва ми яхьусса кIанттурду, экономикалул ва социал инфраструктуралул объектру мюхчан бансса куц.
— Жу гьарица шинах региондалул МЧС-рал зузалтращал гьуртту шайссару ЧС-ву су­кку тIун вардиш хъанахъисса цачIусса учениярттай. Ва ххуллухьгу ккаккан барду жула буржру лайкьну биттур бансса даражалий бушиву. ЦIанасса учениярттай жу ккаккан барду, Росгвардиялул авиациягу ишла дурну, тIабиаьтрал пожарду лещан дансса куц, — тIий, буслай ур Росгвардиялул управлениялул хъунаманал кумагчи Константин Шиян.

Спортрахсса гьавас
Дарбантлив, Каспий хьхьирил зуманив, «Трезвая Россия» тIисса федерал проектрайн бувну тIивтIунни спортрал майдан. Шадлугърал мажлисрай гьуртту хьунни «Трезвая Россия» проектрал каялувчи Султан Хамзаев, АьФ-лул Жяматийсса Палаталул член Григорий Дрозд, АьФ-лул Жяматийсса палаталул член, АьФ-лул спортрал музейрал директор Елена Истягина-Елисеева, ДР-лул жагьилтурал иширттал министр Камил Саидов, Дарбант шагьрулул бакIчи Хизри Абакаров, Ухссавнил Ккавкказуллал федерал округрал Росгвардиялул личIисса бригадалул аьралитал, машгьурсса спортсментал.
— Жагьилтал цIуллу-цIакь­шиврул цIанийсса, спортрацIун бавхIусса оьрмулул ххуллийх най бур. Муния ххаришиву дур. Щак бакъар, ва проектрал лагрулий тIивтIусса укунсса спортрал майданналгу, муданнасса тренировкартталгу жува, оьккимуния арх бувну, тIайласса ххуллийн кIункIу банссару, спортрах­сса гъира-шавкь ххишала хьун­ссар тIисса, — увкунни цала ихтилатраву Султан Хамзаевлул. Ихтилатру къуртал хьуну махъ спецназрал аьралитурал кка­ккан дунни карунний бияврил приемру.

— Ва майдан тIитIаврил спортравусса цIу-цIусса бюхттулшивурттан дайдихьу данссар, жагьилтуравун спортрахсса гьавас бутанссар тIий ура, — увкунни Росгвардиялул зузала, хъунама лейтенант Артем Сулаевлул.

Наркотикру лявкъунни

Росгвардиялул управлениялул ОМОН-лул зузалтрал Виваллил иширттал министерствалиясса даврил уртакьтуращал архIал ххалбигьавуртту дурну, Къарабудахккантуллал райондалийсса цанначIа лявкъунни гашиш бусса 14 личIи-личIисса лагрулул кьуцуртту. Заллу мукIру хьунни. Ванал хIакъираву силистта най бур.

Суратирттал конкурс

Росгвардиялул зузалтрал баян бунни гьашину щалагу Аьра­сатнаву нанисса шамилчинсса оьрчIал суратирттал конкурс. Гьашину конкурс най дур «Ттул Росгвардия. Бюхттулсса Ххувшаврил варистал» тIисса цIанилу.
Шикку гьуртту хьун тIий бур 7 шинава 17 шинавун бияннин­сса оьрмулул оьрчIру.
ДикIантIий дур шанна номинация: «КIулссар, дакIний бу­ссар, пахрулий буссару», «Гай Ватандалухлу талай бивкIссар», «Ххувшаву оьрчIал итталух». Гьарица номинациялий оьрчIру кIива бутIуйх бавчIуну кьимат бишлантIиссар: 7-12 шин хьуми ва 13-17 шин хьуми.
Конкурсрай ххув хьусса давуртту Росгвардиялул сайтрай дишинтIиссар. Миннувагу язими личIи дантIиссар онлайн чIурдайну. Ххув хьуминнан лахъа-хъунну бахшишру дантIиссар июнь зурул 1-нний, ОьрчIру буру­ччаврил кьини. Ххув хьу­сса давуртту ялунчIил (2020 шинал) Хъунмасса Буттал кIанттул цIанийсса дяъвилий Ххувшаву ларсун 75 шин шаврин хасну итадакьинтIисса Росгвардиялул календарьданийн дагьантIиссар.

ОьрчIан ххаллилсса байран

Дагъусттаннал Росгвардиялул Управлениялул зузалт ва аьра­литал биюнни республикалул «Забота» интернатрайн.
ОьрчIан байран дан вайннал оьвкунни интернатрайн машгьурсса Дагъусттаннал эстрадалул артистурайн. Вайннащал къавтIий, балайрду тIий, оьрчIал мадара хIаз лавсунни.
Аьралитурал тIивтIунни оьрчIан нацIу-кьацIулул чIюлу бувсса стол, дунни ххаллилсса бахшишру.
— Жу хIарачат бару цумурцагу байрандалул гьантрай республикалул социал идарарттайн биян. «Забота» интернатрайгу жу цалчин бакъару хьусса. Вай оьрчIру ччянива жул дустал хьуссар. Вай жух ялугьлай бикIайссар. Жунгу ччан бикIай вайннан жущава шайсса кумаг-аякьа дан, — тIий ур Росгвардиялул управлениялул хъунаманал хъиривчу Натик Балабеков.
Интернатрал директор Ума Качаловал барчаллагь увкунни аьралитурахь, оьрчIру, укун тяхъасса байран дурну, ххари бувну тIий.
Росгвардиялул зузалтрал икьрал дунни интернатрал каялувчитуращал бюхъавай гьарица байрандалий оьрчIачIан бияван.

Андриана Аьбдуллаева