Ларгсса нюжмардий «Лезги газет» кказитрал конференц-залдануву «ХIажи-Давуд» тIисса луттирал презентация хьунни.
З. АьбдурахIманова
Ваний гьуртту хьунни лу итабакьин цала бакIрайн лавсун бивкIсса «Институт финансов и права» вузрал ректор, экономикалул элмурдал кандидат Рамиз Аьлиев, луттирал редакторшиву дурсса «ЦIубарз» журналданул редактор Хизри Илиясов, цIахъюрдал «Нур» кказитрал хъунама редактор Байрам Аьбдуллаев, МахIачкъалаллал администрациялучIасса Хъунилсриннал советрал вакил АьвдулмутIаллиб ХIамзатов, жяматийсса ишккакку Руслан Гереев ва цаймигу.
Лу сакин бувну бур тарихрал аьлимтурал ва жяматийсса ишккаккултрал элмийсса макьалартту цачIун дурну.
Луттирал ялув зий бивкIминнал кIицI бунни ванивун ларсъсса элмийсса макьалартту тарихчитурал ккурандалуву хъинну агьамсса ва куртIсса хъиривлаявурттан ккаллийшиву.
— Жула авадансса тарихраву миллатрал, Ватандалул цIаний жанну дулун хIадурсса вирттал чансса къабивкIссар. Укунсса журалул давурттугу жула жагьилтурал цIанийсса, миннал ялунбучIантIимуний дакI цIуцIисса давурттан ккалли дувара, — увкунни луттирал автор Рамиз Аьлиевлул.
Хизри Илиясовлул кIицI лавгуна луттираву ишла дуршиву В. ХIажиевлул, А. Комаровлул, С. ХIабиевлул, ХI. Данияловлул, Ф. Нагиевлул ва цаймигу машгьурсса тарихчитурал макьалартту.
— Дагъусттаннал аьрщарайн ишан ларсун бивкIсса душмантурайн, хаснува Надир-шагьнал аьралуннайн, къарши бувкминнаву ца яла махъ нанисса, Кьиблалул Дагъусттаннал гужру цачIун бан сий дусса ХIажи-Давудлул хъуннасса дахIаву диркIссар Гъази-Гъумучиял Сурхай-ханнащалгу. Ираннал ва Туркнал канихьхьун Кьиблалул Дагъусттан къагьаншиврул хъуннасса виричушиврий ва аькьлулий къуццу тIий ивкIссар ХIажи-Давуд, — куна ванал.
Руслан Гереевлул ва АьвдулмутIаллиб ХIамзатовлул, бивхьусса захIматрахлу барчаллагьгу куну, Хизри Илиясовлун ва Рамиз Аьлиевлун ХIурматрал грамотарттугу дуллунни.
