Дагъусттаннал халкьуннал аьдатирттаву ца яла яргмур, аваданмур аьдат хъатIулмур духьунссар. Аьмну Дагъусттаннал халкьуннал хъатIив сайки ца сценарийлийнусса кунмасса бикIай. Мукуннугу, дур гьарца миллат­рал, хIатта жяматиртталгума, чIирисса дунугу, цаннара хасъсса ляличIишиву. ХъатIул аьдатру чIяруну ккаккан дувай культуралул личIи-личIисса шадлугъир­ттайгу. Ва ххуллух Каспийскалий Аьрасатнал халкьуннал аслийсса культуралул центрданий хьунни даргиялмур хъатIул аьдат ккаккан дуллалисса хъуннасса шадлугъ.

Бадрижамал Аьлиева
— Дагъусттан ккаллину бур ляличIиссава улклун, цилгу хъатIул аьдатру халкьуннал культуралул ца агьамсса ва хъунмасса бутIун хIисав бувайсса. Миннул мархригу бур хъинну куртIсса. Дагъусттаннал гьарцагу миллатрал, гьарцагу шяраваллил дур аьвзалзаманная шихуннайра нанисса аьдат­ру. Аьдат­рурив – му халкьуннал рухIри, ниттил накIлищалла дирну, инсаннал щалва оьрмулул лахъишиврийх цащалла ласайсса, махъа нанисса никирттайн диян дувай­сса. ХIакьину жун ччай бур зун даргиялмур хъатIул аьдат ккаккан дуван, — тIий, дайдирхьуна шадлугъ Аьрасатнал халкьуннал аслийсса культуралул центрданул директор Башикар Гадаевал.

Хъуннасса программалий щаллу дурсса, яргсса хъатIул аьдат­равух гьуртту хьунни Каспийскаллал шагьрулул личIи-личIисса идарарттал ва суккушиннардал вакилтал, шагьрулул студентътал ва дуклаки оьрчIру. Музыка, бала-гьалай бакъасса хъатIи хъатIирив – музыкалулсса буллай бия цIа дурксса зюннавчи Сяид Дибиров бакIчисса музыкантътал.
Шадлугъ хьунни хъинну тя­хъасса, гьуртту хъанахъиминнан ва тамашачитуран дакIний личIансса.