ХIакинтурацIун – волонтерталгу

Уттиния гихуннай ДГМУ-лул ва Медициналул колледжрал студентътурахь дикIантIиссар Н.ЦIаххаевлул цIанийсса Респуб­ликалул ортопед-травматологиялул центрданулмедициналул зузалтран, волонтертал хIисаврай, кумаг буллансса ихтияр.

З. АьбдурахIманова
Му кьутIилия жухь бувсъсса «Волонтеры Медики» тIисса суккушиндарал активист МахIаммад МахIаммадовлул кIицI бунни ва давривух гьуртту хьун рязи хьушиву 60 инсан. ЗунтIиссар волонтертал Центрданул 6 отделениялий.
— Гьарца студент цала хушрайри ва давривух гьуртту хьун рязи хьусса. Дарсирдахун ва даву къадахчинтIиссар, цанчирча миннахь дуссар ихтияр оьн­насса, данмур дакъасса чIумал бучIан центрданийн. Къашайшалтраха аякьа дан кIулшиву – мугу медициналун оьрму хас бувминнан ххуйсса практикар ва ординатуралувун буххайни хIисавравун ласунсса ишри, — тIий ур М. МахIаммадов.

Медиктал-волонтертал даврийн бувкIсса цалчинмур кьини вайннащал хьунаакьин увкIсса центрданул хъунама хIакин АьвдурахIман ХIасановлул кIицI лавгунни волонтертал шиккун буцин маслихIат бувшиву цан Шагьрулул цалчинмур азарханалул хъунама хIакиннал. Гикку гайнначIа 170 волонтер-медик зий усса ур ва вайнная хъунмасса кумаг бусса бур медперсоналданунгу, къашайшалтрангу.

Вайннал 1-3-ми курсирдал студентътурайн тапшур бан­тIиссар къашайшалтран аьркинсса кумаг, аякьа дан, ми аьркинсса процедурарттайн биян бан ва махъунмай буцлан. Хъуними курсирдал студентътура­хьхьун тIурча, дулунтIиссар ихтияр медсестрахъан кумаг бан – капельница дишин, туннурдайн ххалаххи бан ва щавурду, марцI дурну, дахIлан.

Ца яла ххуйну ва дакI тIай­лану цала буржру биттур був­сса студентътал-волонтертал, Москавливсса ординатуралувун буххайни, льготардугу бусса кIанттурдайн тIайла буккантIиссар.