Жижара

АЬВДУЛЛАГЬЛУЛ АРС
СУНГЪУРОВ ЗАГЬИДИ

Апрельданул 18-нний, захI­матсса цIуцIаврища ххассал къавхьуну,дунияллия лавгунни шяраваллил жяматралгу, лакралгу дянив бусравну оьрму бувтсса ххаллилсса лаккучу, Сунгъуров Загьиди Аьвдуллагьлул арс.

Загьиди увну ур 1953 шинал Кьукуннал шяраву Аьвдуллагьлул ва ПатIимал кулпатраву. 1964 шинал Кьукнив 4 классгу къуртал бувну, яла Къянив 8 классгу бувккуну, увххун ур Щурагьиял финансирттал техникумравун. Муния махъ 3 шинай хьхьирил флотрай армиялул буржгу би­ттур бувну, зий уссия «Сбербанк­рал» идарарттай, М. ХIажиевлул цIанийсса заводрай ларайсса разрядрал токарь-фрезеровщикну, Каспийскаллал ччатIул заводрал директорнал хъиривчуну.
Махъсса сайки 20 шинал мутталий зий уссия Каспийскаллал «Горгазрай»: диспетчерну, отделданул хъунаману, хъунама мастерну.
Цува чув зий ухьурчангу, даву дайссия лавайсса даражалий, лажин кIялану, дакIнихтуну, ва му­нийн бувну лайкьгу хьуссия личIи-личIисса барчаллагьрал чагъардан, хIурматрал грамотарттан.
Гьарцаннащал хIал-аьмал бавкьусса, аьчухсса, хъярч-махсара бан ххирасса Загьиди ххирассия дустурангу, мюрщи-хъунанангу, шяравусса цинявннанагу, цувагу гьарнал чIарав ацIан хIадурсса, чумартсса дакIнил заллуя.
Загьидинал ляличIисса ччаву дикIайва буттал шяраваллих. Шяраву дуллалисса чIири-хъунсса давурттавух хIала уххайссия цалчин, шяраву бувссия цIусса къа­тта, сант дагьайхту, нинугу дурцуну, уккайссия Лаккуйнай.
Ва ия ляличIину ниттиха аякьа дайсса арс, кулпатран ххаллилсса лас, оьрчIан ва наслулун ххирасса бутта ва ттатта.
Дахчусса цIуцIаврища хха­ссал ан уссурваврал бувссия хъунма­сса хIарачат. Цибанссар, къаивтунни чIяву-чIявусса хияллу бартбигьин.
Загьидинал бивкIулул кьур­чIишивугу кIидачIлай, дакI­нийхтунусса жижара буллай буру ниттихь, кулпатрахь, арсваврахь, душнихь, уссурваврахь ва махъсса цинявппагу гъан-маччанахь. Махънал оьрмурдай барачат бишиннав!
Загьидинал бунагьирттал аьпа баннав, гьав нурданул дуцIиннав, рухI алжаннул ххари даннав.
Кьукуннал жяматралгу,
дустуралгу цIанияту
Нурислан Хавчаев


Салайл арс Сабиров Шагьназар
аьпалухьхьун лагаврийн бувну, хъуннасса къумашивугу кIидачIлай, дакIнийхтунусса жижара буллай буру кулпат Гуржамаллухь, душваврахь Анжелахь ва Дианахь, арснахь Рашидлухь ва махъсса щалагу агьлу-авладрахь.

Цал бунагьирттал аьпа баннав, рухI бигьаний дишиннав.

Дустал, гьалмахтал


МахIаммадлул душ Сагидова Загьидат

Хар-хавар бакъана къашавай хьуну, оьрмулул 66 шинаву, аьпалухьхьун лавгунни МахIаммадлул душ Сагидова Загьидат.

Загьидат бувну бур 1952-кусса шинал Карашрал шяраватусса Билал-МахIаммадлул ва Узлипатлул къушлий. ХъунмурчIин яхъанай ва хъунма хъанай бивкIун бур Щурагь.

Загьидат зий бикIайссия МахIачкъалаллал общепитрал личIи-личIисса давурттай. Махъсса шиннардий маэшатрал хху­ллий лавгун ивкIсса цила лас Аьвдуллагьлущал архIал яхъанай ва зий бивкIссар ухссавнил чуллай.
Загьидат аьпалухьхьун лагаврил пашманшивугу кIидачIлай, жижара буллай буру ванил арсурваврахь Русттамлухь ва Русланнухь, ссихь Марияннухь ва махъсса цинявппагу гъан-маччаминнахь.
Цил бунагьирттал аьпа баннав, махънал оьрмурдай барачат бишиннав.

Карашрал жямат


Аьлиллул душ Айдаева РайхIанат

Оьрмулул 87 шинаву аьпалухьхьун лавгунни дяъвилул ва захIматрал ветеран, Аьлиллул ва ХIаписатлул душ Айдаева РайхIанат.

РайхIанат бувну бур 1932-ку шинал ЧIяйннал шяраву. Ванил оьрмулул 6 шин хьусса чIумал, ппугу дяъвилийн лавгун, мукьва оьр­чIащал нину лирчIун дур. РайхIанатлун багьссар, ни­ттищал архIал, гьарца дайсса давривух хIала буххан. Цала оьрмулий чIявусса ккавкссар РайхIанатлун. Зий бивкIссар личIи-личIисса давурттай. Махъсса 40-хъул шиннардий зий бу­ссия Ккуллал райондалул азарханалий.
ДакI хъинсса, гьарцаннащал хIал бавкьусса РайхIанат мудан хIурматрай бия къашайшалтрал ва азарханалул зузалтрал дянив. Ванил хIалал був­ссар хIукуматрал чулухасса барчаллагьрал чагъардугу. Цила ласнащал, МахIаммадлущал, цала-цала ххуллурдайн буккан був­ссар 3 арс ва 2 душ.
РайхIанат ахиратрал шаврил кьурчIишиву кIидачIлай, дакIнихтунусса жижара буллай буру ванил ичIуваминнахь, гъан-маччаминнахь. Цил бунагьир­ттал аьпа баннав, Алжаннул ххари баннав!

ЧIяйннал жямат


Ххирасса
ссил ПатIал аьпалун

БивкIулун дишай ттурлу
Щунул щуттайх дирхьукун,
Ттул дакIнил вас увкуна –
Вил бивкIулун дурвав тIий.

 

Вил цIуцIаврил леххаву
Ччяни ялун дируна,
КъюкIлийн бувай ххалаххи
Хханххиравун бувуна.

«Ттул душ Щазай, — увкуна,
ЧIарав бацIан бувуна –
Чил шяраву буссара,
ЯхI ххину яхьу», — куна.

Ссувай, ссу дирчIа учин
ЧIарав бацIан къавхьусса,
Чагъардай ххару чичлай,
ДакI рахIат дан шайссарив.

ХIасан-ХIусайннул хIасрат
ПатIиматлун укунна,
МахIаммадил хIасратрал
КIяла кьакьан був ссувай.

ЦIуцIийни чIарав бивкIсса,
ЦIуллуни, ялун бивсса,
Вил чIарав бацIан къавхьу
БивчIивуй вил ххира ссу.
Вих аьтIийнмасса вил ссу Шавлухъ, ш. ЦIуйши