Апрельданул 16-нний Дагъусттаннай туризм лядуккан даврил масъалартту ххал бивгьунни ДР-лул БакIчи Владимир Васильевлул каялувшиврий хьусса батIаврий.

ХьхьичIмахъ лахълай, республикалул бакIчинал бувсунни туризм лядуккан даншиврул аьркинну бушиву хIадурсса инфраструктура ишла дуллан. Мунал тIимунийну, Дагъусттаннал дур чIала-къачIалачIисса каширду, так мигу аьркинну дур зузи дуллан.

-Аьркинссар дузал буллан жулва агьалинал тIалав­шиннацIун бавкьусса ттизаманнул журалул, мюнпат ххисса курортру, чIявусса аьрасатлувтал жучIанма букIланшиврул, — увкунни Васильевлул.
Туризмалул давуртту ляду­ккан даврил хIакъираву хъунмур махъ лавхъунни ДР-лул Туризмалул министерствалул каялувчи Расул Ибрагьимовлул. Мунал тIимунийну, Дагъус­ттаннайн гьар шинах букIлай бур къачансса туристътал. 2018 шинал жучIана увкIун ивкIссар 685 инсан игьалаган.

ЖучIава захIматну бур туристшиврул инфраструктуралулгу, объектирдал санитариялул тагьарданулгу, транспортралгу масъалар­тту. Ми масъалартту дузал буван аьркинссар муниципал сакиншиннардащал хIала-гьурттуну. ТуристътурачIа яла бусравми объектирттан ккаллину бур Сулакьуллал къуманивалу, Дарбант шагьру, бархан «Сары-кум», Къала-Къурайш ва цаймигу. Республикалий зий бур туристътурал 52 база, 25 санаторий, 125 гостиница, хъамаллурансса 40 къатта.

Туризмалул масъаларттал хIакъираву ихтилат бунни Казбекуллал райондалул бакIчи ХIажимурад Мусиевлул. Мунал бувсунни Дубки поселокрайн туристътал букIланшиврул дуллалисса давурттая.
Мива масъаларттал хIакъи­раву ихтилат бунни «Аьрасатнал паччахIлугърал туризмалул ва сервисрал университетрал» филиалданул директор Зулмира Ханбабаевал.
Ххал бивгьусса масъаларттал хIасиллу дунни Владимир Васильев­лул.