Апрельданул 16-нний ДР-лул БакIчи Владимир Васильев гьуртту хьунни Москавлив АьФ-лул экономикалул министр Максим Орешкиннулва Пермуллал улклул губернатор Максим Решетниковлул каялувшиврий дурсса экономикалул ва финансирттал масъаларттал хIакъиравусса ПаччахIлугърал Советрал зузи группалул видео-конференциялий.
Ххал дигьлай бия зузи подгруппарттал давурттал хIасиллу.
Дагъусттаннал БакIчинал, подгруппалул жаваблув хIисаврай, бувсунни цува зузисса подгруппалул «Ишбажаранчишиву закондалул ххуллийн дуккан даврил ва ххютулусса экономикалийн къарши буккаврил» ххуллий дуллалисса давурттая. Мунал тIимунийну, зузи группалувун бувххун бур АьФ-лул 27 субъектрал вакилтал (37 инсан). Ихтилатраву чIалачIи дунни Аьрасатнал ххютулусса экономика: хасият, мунил сававртту.
Владимир Васильевлул тIимунийну, подгруппалул давурттал мурад бур ишбажаранчишиву чаннайн дуккан даву. БатIаврий цаймигу жаваблувминнал бувсунни личIи-личIисса подгруппарттал давурттал хIасиллая.
Видео-конференциялий гьуртту хьунни мукунма ДР-лул ХIукуматрал председательнал 1-ма хъиривчу ХIажимахIаммад ХIусайнов, ДР-лул БакIчинал ва ХIукуматрал Администрациялул Каялувчинал хъиривчу Нюсрет Оьмаров, ДР-лул БакIчинал маслихIатчи Галина Емельянова.
